قدر مراهقة

الجزء 66

#قدر_مراهقة
الجزء 66
دانا لواحد البازار كبير يهبل فيه كلش ليفوتاي ليشومبر لماعن لفراشات بزاف حوايج بديناها من لتحت ودرناه كامل ، انا نخير لحوايج ومجد يسلك محسيتش بتعب وعجبني الدوران ورنيم ثاني كثر خيرها عاونتي في كلش انا وياها عندنا نفس الذوق . شريت ليفوتاي في الباج ولكحل ومعاهم طابلة كبيرة وزدت لماعن شريت سارفيس تاع قهوة وحليب وتاي وكيسان ومغارف وفراشط وسحاين شريت كلش فلبيض كرهت من لكحل تاع لخلا هذاك . الشومبرة مشريناش كلش فيها جديد غير لكوافوز شاف مع واحد صاحبو قالو مكلاه اي تتخدم وانا اصلا عاجبتي معنديش مشكل معاها ووالفت بيها، زدت شريت سرير لرنيم ومعاه خزانة وكوافاز (لانو راك طول قعدتها عندي بزاف بزاف حتى نشفي غليلي منها ونخرجها من عينيها لزوج انا مش بالساهل ننسى ونسامح من عوايدي نخلف ضربتي وبالدوبل). شريت واحد ليلومب جايين زي لخيوط يتعلقو فالسقف ويجيو هابطين وشريت نجوم يلصقو في الحيط وكي تكزن الظلمة يشعلو وحدهم ، شريت واحد الكرسي هذاك تاع الارجوحة (منعرفش اسمو بالضبط)، خلي نفرغلو جيبو يستاهل ياك قاليانا مسؤول عليك ووش تحتاجي انا هنا نوفرهولك . ماجينا نكملو لحق المغرب روحنا تعشينا في ريسطو وطبعا كيما موالفة انا ناكل برك وكي نكمل نختمها بقرعة كوكا باش تهبطلي الماكلة ورنيم ومجد غير حالين فامهم فيا مخلوعين مني وليت بڨرة غير نبلع برك
. طرنا لدار لقينا لحوايج وصلو ودخلوهم رتبوهم صاي والعساس هذاك كيما ديما جاب مرا نقات الدار وخلاتها تلمع . بقات غير الارجوحة الي شبعو ضحك عليها خصوصا مجد ماخلى ماعلق قالي متزوج بيبي انا خلي نزيد نشريلك العاب وبوبيات وتكمل عليك. قوتلو يحطها في البالكو تاع الشومبرة وصاي محبيتش نسبو قدام زنيم حتى وعلبالي بلي متحيكش ومتقودش بصح حتى واذا منحبش نقلق من قيمتو قدامها تبقى بنت عمو واختو صغيرة وكي تشوفو ينذل ويتسب راح يطيح من عينها. فت ديراكت لدوش دوشت ورحت تلحت فوق السرير رقدت منيش قادرة نتحرك ولا نحكي خلي نرتاح وغدوا نبدا في خدمتي مع ضيفتنا الغالية ونوريلها كيفاه يكون طلب السماح وكيفاه يكون العفو، راح نقدملها اجمل ضيافة ممكن تشوفها في حياتها .
#فريال