قدر مراهقة

الجزء 25

#قدر_مراهقة
الجزء 25
فقت صباح صليت الفجر ودعيت ربي يسهلي اموري ورجعت تكيت مقدرتش نرجع نرقد وانا نخمم فحياتي قبل شهر كنت براشي نضحك نلعب همي الوحيد الرقاد والتمسخير من صاحبتي في لحظة تبدل كلش وخسرتها وخسرت ثقتي فناس وشرفي وبرائتي وضحكتي والشخص الي كنت نكرهو ومزالني منحملوش لحد الان لوكان يموت نستشفى فيه راح يرجع راجلي اليوم. طلع نهار وانا مزال نخمم نضت فطرت معاهم لقيتهم كامل نايضين والحس تاع لولاد راكم تعرفو كيفاش حالة لعراس والهرج هذاك، خلصت روحت لبست الحجاب الشرعي فلكحل والاسدال وصندالة فلبيض مع ساك كحل جيت نهبل بلا مكياج بلا والو صراحة خرج عليا خير ماكنت بلا حجاب. خرجت عندهم كامل حارو فيا لانو من قبل حاولو بزاف معايا باش نتحجب وانا رفضت رفض قاطع حتى ختي اسيل داراتو وحدها اما انا مكنتش حاباتو وذوك كي درتو ندمت على ليام الي كنت نتعرا فيهم والله مكانش قد السترة مليحة وتبعد عليك الابتلاءات ونظرات الرجال واصلا فدين تاعنا لازم نشترو رواحنا باش منكونوش فتنة فالمجتمع وياما صراو مشاكل في جرت النسا ولعرا تاعهم. باركولي كامل على الحجاب وخرجنا راحت معايا اسراء واسيل وريتال وخليل ووائل وبابا وخالتي، ماما بقات مع الضياف عيب تخليهم وحدهم. ديمارينا نص ساعة وصلنا للمحكمة راح نعقد لثم بحكم مزالني قاصر، نزلنا لقيناه واقف لابس سروال جين فلكحل وشوميز وفاست كلاسيك وصباط كحل نواظر (كلش كحلو اصلا لازم يلبس اللون هذا يعبر على قلبو المفحم الكلب الله لاتربحو) بصح منكذبش جا يهبل عندو جاذبية كبيرة وحضور طاغي، جات يماه واختو الصغيرة ورنيم وخوه وباباه وخالتو ولد عمو، سلمنا عليهم وكي العادة وصلت رنيم مطلقتنيش تبوس وتحضن وتطلب فسماح، دخلنا عقدنا خرجنا البرا ضربنا البارود مع بعض ولبنات يزغرتو ويعاودو (لوكان غير جاو يعرفو زي الدجاجة كي تعيط ههههه) ولبستلي يماه براسلي تاع ذهب وعطاتني باكي تاع ورد وصاشي منعرف وش فيها كينروح ونشوف. جينا مروحين قالهم معليش نحكي معاها شوي من بعد نجيبهالكم، قبل ماننطق قالو بابا مكلاه تسقسيما ذوك راهي مرتك وراي رايك _لا اعمي بما انو هي مزالها فدارك فشور شورك _ربي يحفظك ولدي ويكثر من امثالك. هوما روحو وانا رحت ركبت معاه ومزالني خايفة منو مع انو رجع راجلي حلالي بصح مزال الخوف داخلي ياكل فيا نخاف يعاود نفس العفسة تاع المرة الي فاتت، مشينا ربع ساعة وحبس قدام جاردة كبيرة قالي ننزلو ولا نحكيو هنا_لا هنا وازرب قول وش حبيت باش نروح ياربي نوجد روحي _متخافيش يكفيك الوقت.
#فريال