قدر مراهقة

الجزء 45

#قدر_مراهقة
الجزء 45
جبنا شهر كامل بتمام والكمال وحنا ندورو فليل وفنهار نرقدو غير 4سوايع  درنا ولايات الشرق كامل شبعت تحواس وتصاور نتحرك خطوة نصورها هبلت وهبلت مجد معايا وهو غير يساعف فيا وحاملني، في الفترة هذي نقصت من فمي شوي ولا نقولو مقعدتش باش نسبو اغلب وقتنا فوتناه برا وبين لغاشي عرام، ولايات الشرق يهبلو خلاص وصراحة عجبوني بديناها بعنابة قعدنا فيها يومين مدرناش بزاف محبش كي شافني عشقت فيهم وفي هدرتهم وكنت ناوية نكمل الشهر عندهم قالي ياربي ماندورو كلش ومرة اخرى نرجعك ووالله مازاد رجعني  ،بدينا بالولايات الساحلية  قعدنا فيهم يومين كامل كملنا روحنا لداخلية ويا ماما وشنو هذا تنوع كبير في اللهجات ومناظر والمناخ وكل ولاية فيها قداش من لهجة ومناخ، ولاية وحدة تلقاي فيها شوي من الصحرا وشوي من الجبال وشوي عادي مفيهم والو وفيها آثار رومانية روعة بمعنى الكلمة. متحف هيبون وميناء عين بربر وشاطئ عين عشير في عنابة ، زرت جسر سيدي مسيد المعلق بمدينة قسنطينة ، واد يرجانة و شاطئ المغارة العجيبة و شاطئ صخر البلح فجيجل، السفينة الجانحة ( هذه السفينة اسمها صوفيا تتواجد بشاطىء لبلاجات في واد الصابون) والمنارة الخضراء في سكيكدة، آثار رومانية وضريح ايمدغاسن الي في باتنة، جبال شليا  و المحطة الحموية حمام الكنيف البخارية في خنشلة، آثار الرومانية الي معبية تبسة فكل بلاصة تلقايهم خصوصا فسونتر فيل تاعهم روعة، شلال حمام دباغ في قالمة،بحيرة الطونغا والاوبيرا والملاح والطيور في الطارف هذو البحيرات الاربعة يهبلو فبهم واحد الهدوء يريح النفس ولاية شابة بزاف وفيها كلش انا مكفانيش الوقت باش ندورها كامل،  سد بني هارون ميلة،الباب الذهبي أو باب قلعة يما قورايا قمة القرود في بجاية ، نافورة عين الفوارة وحديقة التسلية والحيوانات وبارك مول في سطيف، جبل فرطاس وجبل نيف نسر حديقة التسلية بوزابين (ببلدية عين مليلة) آثار مدينة قاديوفالا(وهي مدينة بيزنطية تتواجد بقصر الصبيحي) ام لبواقي ، أطلال القصر البيزنطي مدوروش  مناطق و آثار مدينة تيبورسيكون النوميدية القديمة خميسة في سوق اهراس، مسجد اولاد سيدي ابراهيم وبرج المقراني برج بوعريريج، ماجا يخلاص الشهر هذاك حتى خلصنا دوران ومن كل ولاية شريت حاجة تفكرني بيها.  شريت لبسة تاع قبايل بحوايجها الكل وزدت شريت ملحفة شاوية وجبة الفرقاني (قسنطينية)  وقفطان الفتلة العنابي وزدت شريت اكسسوارات وحجابات وصيكان وبشامق وصنادل (تقول راني نجهز). مخلا مايشريلي الي نحط عيني عليها يشريهالي ميقوليش لا معنديش دراهم خلصو علاه تفزدي، الي نبغيها يشريهالي وهذا الي خلاني نتأكد من شكوكي ونعرف السر وراء اللون الاسود الي مغيم على حياتو وياخوفي لايزيد يغيم على حياتي انا ثاني.
#فريال