قدر مراهقة

الجزء 04

#قدر_مراهقة
الجزء 4
روحت غسلت ودرت روتيني وفت للكوزينة لقيت ختي مشنفة عين محلولة وعين مقفولة قاعدة تفطر، انا سربيت كاس جو وصاي هذا هو منحبش نكثر الماكلة مع الصباح. كملنا فطورنا نضنا درنا الميناج ماجينا نكملو حتى آذن الظهر روحت دوشت وصليت جهدي خلصت راح نرقد وتجيني ماما نوضي تتقراي ولا والله غير نحيلك التلفون لاتزيدي تشوفيه وراني حلفت وتعرفي حليفي ميروحش باكل وهاذ المرة نحيهولك ديما حتى في الصيف احشمي على روحك ونوضي _اففففف _بلعي وامشي تقراي _صاي رايحة _والله ونجي ونلقاك راقدة غير اليوم نبردك بطريحة _هيه صاي. هي خرجت وانا نضت على زهري لمسود نقرا علبالي لوكان منقراش اليوم تنحيلي التلفون وانا هذا مانحب يونسني بزاف، قعدت نحفظ مطولتش وخصلت انا خفيفة نهز ليه ليه شوي هكا نسمع صوت عماماتي وولادهم ونسا عمومي ايه ياربي كل جمعة هكا يهزو الجيش تاعهم ويجيو مايروح حتى لنص الليل وولادهم جنون مايخليو حتى حاجة في بلاصتها. خرجت سلمت عليهم ورجعت لشمبرتي قفلتها وفتحت الفيس لقتي رنيم بعثتلي ميساج راني قولتلو جوابك وقالك طيري لسما وترجعي غير انا الي نديك، افففف ياربي على اللصقة هذا الكلب المجروب اللصقة، بعثتلها قوليلو روح ت&&& هكا بعد _المهم انا كرهت دبر راسكم حلوها بيناتكم _مكان حتى حاجة باش نحلوها هو في طريقو وانا في طريقي منيش حاباتو ومنحملوش خلاص وزيد هو شاؤف على روحو_اخلايا على شارف مزالو صغير _هههههه وين صغير في ناناك الراجل كثر مني وانت تقولي صغير _عندو 28سنة مزالو صغير _صغير عندك انت_ايا خلاص علبالي ذوك نتقابضو على جالو خلينا منو كشما حفظتي_ايه بديت اليوم _هههه متكون غير خالتي سلمى برداتك بطريحة_شكون قالك _باينة لعمى بعد نعرفك مليح ماتحبيش تقراي واذا نضتي تحفظي معناها ديتي طريحة ولا هددوك باش ينحيولك التلفون _سكتيني برك ياخي نضت نقرا ميهمش السبب_ايه صح روحي راجعي علوم متنسايهاش هي الاهم من كلش _فليل نراجعها ذوك عندنا ضياف_جيش المخربين جا ثاني ههههه_ايه جاو_وعلاه ميحكموش دارهم السمانة الجاية اختبارات ياخي عندهم ولاد يقراو _راكي تشوفي يديروها مكرة ولادهم يخليوهم يقراو وحنا يحرمو علينا كلاب_خليك منهم فليل نراجعو مع بعض واي حاجة مفهمتيهاش نشرحهالك_ايه لعشية ان شاء الله انا نروح نرقد تعبت _اوك باي.
#فريال