قدر مراهقة

الجزء 29

#قدر_مراهقة
الجزء 29
فاتت سمانة تجري وحنا مع التوجاد. فالسمانة هذي زدت شريت حوايج كانو ناقصيني ماما اصرت عليا نشري نويزات وانا رفضت اصلا معندي مندير بيهم مستحيل نلبس لفضيحة هذي وهي تندب عند راسي ومتصلحش تروحي عروس بلا بيهم وتحتاجيهم بزاف وش يقولو علينا الناس بعثو بنتهم بلا نويزات وحنا وش ناقصنا ياك عندنا والحمد لله كل خير يطايش شوي شلالڨ منقدروش نشريوهملك، قعدت فوق راسي حتى خرجنا شريناهم ويا وش نقول فضيحة وخلاص نخرج عريانة ومنلبسهمش، شراتلي 10 انا راح نندب قولتلها وش ندير بهذو كامل والله منلبسهم قالتلي بلعي برك هكا وكي يفوتو شهرين زيدي اشري، عجزت معاها راسها خشين كيف تقول كلمة خلاص متتراجعش. اليوم الجمعة يوم عرسي راح نودع دارنا ونخرج منها ونروح مع الشخص الي دمرلي حياتي وقضا عليها ونكمل حياتي معاه، نعيشو تحت سقف واحد ويكون ديما في وجهي منعرف كيفاش راح نقدر نتحمل شوفتو ومنغلطش فيه، نخليها على ربي وخلاص والحاجة الي متأكدة منها انو راح نتعاركو بزاف ونلقاو صعوبات. نضت دوشت وفت صبحت عليهم لقيت لفامي كامل عندنا لانو راح نخرج من الدار بابا قالي نديرو فلاصال اما انا رفضت وحبيت نخرح من دارنا. فطرت ورحت لشومبرتي شوي هكا جات لكوافوز وبدات تمشطلي ماجات تكمل حتى طبت من الكرسي والنعاس حاكم فيا لوكان مش عيب نروح نرقد ونقولهم عرسو وحدكم. لبست الشدة التلمسانية مع الاكسسوارات تاعها (عاداتنا لعروس تخرج بيها من دار باباها من بعد كي تلحق لدار لعريس وتلبس لاغوب بلونش). لبست وعدلت خرجت شطحت جاو لفامي تاعنا تصورت معاهم ماجينا نخلصو لحقت 17،شوي هكا نسمع البارود والزغاريت والقرقابو الحالة مقلبة برا طليت على الطاقة ونشوف فالكلب يشطح مع خاوتي وصحابو فرحان لابس كوستيم نوار (لبستو تقريبا نوار) ومطراسي اللحية وشعرو يهبل قعدت غير نشوف معاه عجبني من بعد تفكرتو وش دارلي دخلت وخليتو، جابو ساعة وهوما يشطحو والنسا لداخل يزغرتو، شوي هكا دخل هو ومعاه خاوتي كيف شافني قعد يشوف ويستوعب كي شغل معرفنيش (انا كي ندير المكياج نتبدل بزاف) قرب باسني على جبهتي  قدام خاوتي وماما خواتاتي والله ماحشم انا قريب نذوب من الحشمة وهو ولا على بالو فرحان ويضحك ضرسة لعقل بانت وااه من ضحكتو تقتل، دخلت ريتال بيناتنا ودزاتو _متحشمش تبوس ختي قدامنا عيب عليك _وعلاه عيب ياك مرتي حلالي _تبوسها هي ومخليني انا _اااا الاميرة الصغرونة غارت _ايه غرت وبزاف انت تاعي وحدي موالف ديما تبوسني وتحضني وذوك بدلتني بالمهبولة هذي، طرطقو كامل بالضحك تحكي من نيتها وقريب تبكي، هبط رفدها وباسها ويقولها هكا سامحتيني ولا مزال، باسها شي 10بوسات باش رضات _لوكان مجيتش نحبك منسمحلكش_نقدر ندي مرتي ولا لا_ايه اديها وربي يعينك ويرحمك_وعلاه تقولي هكا_هاو انت راح تتزوج مصيبة باين راح تقتلك_ههههه منعرف كلش ممكن. حطها فلرض وجاب برنوس لبسهولي وغطاني مليح حتى تغميت وحكملي يدي هبطنا وصلت قدام الباب جا بابا حط يدو عليه وانا خرجت تحت جناحو واااه وش صعيبة اللحظة هذي انو تخرجي من الدار الي كبرتي فيها وتربيتي وتخلي باباك ويماك وحضنهم الدافي وتروحي لدار متعرفيهاش وتكملي حياتك مع واحد كيف الكلب تاع مجد.
#فريال