قدر مراهقة

الجزء 107

#قدر_مراهقة
الجزء 107
كي خرجت من سبيطار داتني ماما قعدت عندها يامات غير هي تهتم ببنتي وانا زي الميت ليل مع نهار وانا راقدة الطبيبة قالتلهم اكتئاب وذوك يتنحى عليها، مجد دار عقيقة لبنتنا الناس الكل عرضهم عحوزتي سلافاتي نسا سلافي كامل جاو باركولي ماخلاو ماجابولي لجين من يد ليد خصوصا وائل هبل عليها دات مني غير لون العينين الباقي تشبه لباباها، انا نرفدها ساعات بصح نتقلق نحطها. قفلت ربعين ورجعت لداري مجد هو يدير كلش يهتم بطفلة انا يوم مليحة ويوم مش مليحة ضعفت بزاف وجهي صفر ليساغن دايرين حالة هو بقا شايط خدمتو حبسها وبقا مقابلني في دار . لجين قفلت 3شهر ولات دبدوبة تهبل تهبل تتاكل انا صح نرفدها ونوكلها بصح مش ديما اكتئاب الي حكمني حاد زرت طبيبة نفسية قداش من مرا وهي تقول فنفس الهدرو اغلب للنساء يعانيو منو بعد الولادة وبالشوي يروح عليك وتتهناي علاقتي انا ومجد رجعت كيما كنا في بداية زواجنا منحكيش معاه ومندورش بيه هو يحاول يهدر معايا كي يشوفني نسمطو ولا نقلق يسكت . اليوم نضت مخنوقة كارهة كلش وبالاخص مجد تفكرت وش دار فيا وكيفاه اغتا. صبني وكيفاه دافع على بنت خالتو ودخل للحبس على جال شرفها وكيفاه انا سكت مدرتلو والو كل حاجة صراتلي معاه تفكرتها وماصدقت دخل لشومبرة ونشعل فيه. شفتو راقد لجين ويبوس فيها جات في بالي فكرة نحرقلو قلبو كيما حرقلي قلبي ياك يقول الشرف مهم ويدافع عليه خلي نوريلو وش ندير بصحالي مكنتش دايرة حسابو هو اني ندمر حياتي بيدي وانا نحاول نحرقلو قلبو . عجباتك الطفلة تحبها _ شي طبيعي نحب بنتي ونبغيها ونعشقها ونموت عليها حبيبة باباها هذي _ شكون قالك اصلا بلي هذي بنتك وش عندك دليل بلي مخنتكش قول _بلعي فمك خير مانفزدلك خليقتك راكي بديتي تخلطي _كي قلت الحقيقة بغيت تضربني منيش نكذب عليك هاذ الكبولة شكون قالك بلي بنتك انت ومهيش بنت غيرك ، مافقت غير بالكف طروشني _ زيد اضرب اصلا انت كي متحڨرنيش انا شكون تحڨر عندك الحق انا رخيسة ومنسواش مخلية الي يبغيني ويموت عليا وجيت لواحد كيفك _غاضك امالا يالكلبة راكي مرتي لكان نسيتي نفكرك وانا راجلك ماشي طحان باش تقوليلي الكلام هذا ونسكت_بغيت تسكت ولا تقعد انا قلت الي عندي وانت خمم فيها مليح وش الطفلة بنتك ولا نو وزيد يكون في علمك اي بنت حرام ممكن تكون بنت كاش واحد كنت نخرج معاه بعد ماديتلي شرفي ولات ساهلة عليا ندير كلش. حط لجين في سريرها وجا عندي مافقت غير بالكف طرطق في وجهي ومن كف ولاو كفوف حكمني من شعري ويجبد ويعيط شايفتني طحان قدامك حتى تقوليلي هك وش بغيتي نديرلك قولي فهميني كل مرة تتماداي معايا وانا ساكت ونساير فيك قولت الطفلة مجروحة مني وانا غلطت خلي نساعفها مكانش مشكل مزالها مراهقة ومتعرفش صلاحها بصح انت لا كل يوم تزيدي تطغاي وذوك واقفة قدامي وتقولي في الهدرة هذي علبالي كلش كذب بصح توجع وتقيس الشرف _ هههههههه الشرف نسيت انت عندك شرف وانا لا انت تقتل وتدخل للحبس على جال شرف عائلتلك اما شرف الناس تعفس عليه ودنسو وتفوت عادي كأنو حاجة ماصرات كيما درت معايا ديتلي شرفي ولعبتها زعما تصحح غلطتك وتزوجتني بصح كي جات في بنت خالتك دخلت للحبس على جال شرفها الغلطة مني مش منك لوكان نهار لول حكيت لدارنا وش درتلي راهم حطوك عند حدك ورباوك رخيس كلب طحان ونقولك حاجة الشي الي قولتلو ذوك كامل صحيح منيش نكذب هذي مش بنتك. ماحسيت غير براسي تخبط على الحيط والشي الي صرا بعدها كامل جابزربة كي نقولكم قتلني بالضرب منيش نكذب دڨدڨني خلاني طايحة فلرض بدمومات محسيت بوالو مافهمتش اذا رقدت ولا تغاشيت بصح الي متأكدة منو اني تهنيت من الكلب هذا بعد ضربو ليا مستحيل نبقى معاه وهذا الي بغيتو.
#فريال