#حب_تحت_رحمة_التقاليد💏🔥🔫
#الحلقة_24
#Mîss_Rõssįlã
مسح دموعو..وقام جبد تلفونو واتصل بأمو..بقى ينوقز وبعدها ردت تنهج كأنو كانت تجري....
مراد:ألو أمي..بابا في الدار..قلو يستناني مسافة الطريق ونكون عندكم..
خديجة:جاوبتو مستغربة؟!علآه شفما وليدي
مراد: وقت نجي تعرفو...
سكر الخط...بقى يمشي تايه...خايف على أختو من مصيرها..ويتسائل ياترى رح تتقبل الموضوع ...رح تسامحو لأنو ضحى بيها..تغفرلو لأنو كان أناني معاها...واختار نفسو عليها...بعد مدة...وصل للدار...دق الباب ...فتحت عليه أمو...بقات متحيرة عليه وقلبها يغلي عليه من حالتو ...علآمات وجهو عابسة ..باردة ماتبشر بالخير...خلآتو دخل...ودخلت وراه...فات للصالة لقى بوه ..يشرب في قهوتو...قعد مقابلو...وشبك إيديه في بعضهم...يفرك فيهم من توتر...حاير من وين يبدى...قطع عليه تفكيرو وقت تكلم بوه بتمقعير وتمسخير...
أحمد: ياولد خديجة شبي حالتك هك...تقول خارج من القبر ولا تقول ماتلك حد....احكي علآه قلتلي نستناك..شصاير ...إذا مشكلة فلوس...متعبش روحك وتطلب مني...مش رح نعطيك ولا فلس معنديش😒😒.....تبسم بوجيعة من كلآمو...هو وين ...وبوه تفكير كان في فلوس وروحو....وتكلم
مراد: متفكر كان فيهم....اطمن مش محتاج فلوسك...فما موضوع. ...لآزم تعرفوه.....
خديجة : سألتو مستغربة...غير الخير وليدي ..اتكلم والله حيرتني ..احكي وطفي ناري...قلبي محروق عليك ياكبدي...
مراد :تعرفو الي صار بيني وبين عايلة الغامدي...وتعرفي انو جاسر طلبني اليوم...الحقيقة «تردد شوي ملقاش حروف ولا جملة يعبر بيها علي في داخلو ولكن لآزم يحكي وينهي كل شي ...»هو أتخذ قرار بحقنا(تسمع فيه ومركزة مع كل حرف يقول فيه)...قرر إنو يصير تبادل...
خديجة: بهتت وضربت صدرها...ماتكملش عيش ولدي...نعرف مش بضرورة تكمل...أسكت أمانك...أسكت...آاااه....ياناري عليك يابنيتي...وعلي رح يصير فيك...مش رح نسامحك يامراد...شذنبها جوري فلي صاير...شذنبها هي تخلص فاتورة عملتكم...شذنبها تي أنطق...أتكلم ياسخطة...علآه...علآه...حرقتوها معاكم...وبقات تضرب في فخاذها...رجعلها شاهد العقل وسألتو(أ...أنت شقلت لجاسر..تترجى فيه بعيونها...لعله يطمنها....رفضت مش هكا )...أما هو خذلها وقت هبط راسو ...راح شمال ويمين...بمعنى لآلآ....تفلقت بالبكاء...آه يابنيتي..مكتوب عليك غير الشقاء....والعذاب....حسبي الله فيكم ياعايلة الغامدي..حسبي الله فيكم.....قطع عليها ...راجلها وقت تكلم .....وفرحة تطاير منو
أحمد: ضحك من شق لشق...وعيونو ولآت قلوب...تي أسكت ياوجه البومة علآه تندب...بنتك ربحت راجل زين ...وفلوس.....آغا كبير كل الناس تحلف بأسمو.....رح تعيش كيف الأميرة في هذاك القصر الكبير...مش رح تنفعها قرايتها ولآ تنفعها أنت ...آخرتها معرسة...تعرف حاجة (تبسم بخبث)...وأخيرا ربحت شي من ورى هذيك المنحوسة...رح نصير سهر...أكبر أغوات ...😂😂😂 رح نصير نلعب بالفلوس لعيب...😍😍😍😍
خديجة:أسكت بربي أسكت.....تخمم كان في الفلوس ...آخر همك بنتك...معندكش قلب تحس فيه.. مش بنتك هي...معندك عشرة من غيرها...علآه الحقد هذا...علآه الكره والأنانية هذي ماتخمم كان في روحك...تعرف الحديث خسارة فيك....أنا بنتي مستحيل نسلم فيها...خلي يصير الي يصير ...هذي جوريتي...ونور عيني...منسلمش فيها بالساهل...لو تعطوني فلوس الدنيا خذو روحي ولآ تمسوها.
أحمد: أسكتي ولآ نقوم ليك نهدلك هذاك الفم...ديما مفسده علينا الفرحة...هاني مخليهالك...رايح نعبي كاس ونعمر راسي....نفرح...ونحتفل بهذا نهار المبروك...من اليوم مش رح نخمم في الفلوس....وخلي بنتك منحوسة توافق ...ولآ تعرف شنوا يصيرفيكم.....وخرج..
مراد: يخزر فيه باشمئزاز وكره...يتمنى يقوم يفشخو بطريحة...أما يبقى بوه الي جابو للدنيا...وتكلم ...( نعرف ياأمي..نعرف روحي غالط....سامحني عيشك...والله فوق طاقتي...موش بإيدي...لو رفضت...رح يقتلنا...أنا مش خايف على روحي...خايف على شهد...وو ...ولدي (قالها بتردد)...
خديجة: انصدمت وحلت فمها من البهتة...شنوا قلت ...عاود...مسمعتش...صحيح الي تقول فيه...خزرت فيه بنقمة... عمري لتصورت يجي نهار ونسمع هذا الكلآم من فمك....خسارة تربيتي فيك...ياولد كرشي...ومش رح نسامحك...ودورت وجها عليه...أخرج عليا منحبش نشوف خليقتك...أخرج وصاحت فيه..
جاء رح يحكي ...أما قصت عليه وقت دخلت فرحانة...
جوري: أمي ....أمي....هات لبشارة...أما تحولت بسمتها وفرحتها....لحزن...وقلبت شفايفها...وطلعت حاجبها مستغربة...تسأل فيهم بعيونها...(أمي شصاير ...علآه تبكي...مراد شبيهم عينيك حمر..)
مراد:مسح دمعتو...حمحم وتكلم بصوت غالبتو بكية(جوري...سامحني عيش أختي وباسها من خدها ...بوسة مرصوصة تعبر...على كمية الحزن والأسف ...تجاها.....خلي أمي تخبرك ...بلي صار....وخرج هارب من نظرة عيونها البريئة...الي تبع فيه...)...
تلفتت لأمها...مستغربة ...تسأل فيها بعيونها...وتترجى فيها..
_خرج يجري وطربق الباب وراه...هارب من أحساسو
جوري:أمي أحكي ...أمانك علآه ساكته ...طمني ...عيشك...متبقاش ساكته..علاه كنت تصيح وتعيط وقت جيت...ياخي صاير شي خايب..
خديجة: مسحت دموعها...وتلفتت ليها...بقات تخزر فيها...في برائتها وعفويتها...وجها ملآئكي الي من وقت زادت منورلها حياتها ومصبرها على هم الزمان...تكلمت (أقعد عيش بنتي..ايجا بحذايا جوريتي....رح نحكيلك ...كل شي...ومتقاطعنيش حتى نخلص ...باهي عيش بنتي)...
جوري:باهي أمي...نسمع فيك..اتكلم
خديجة: قصت عليها كل شي...وعيونها كلها أسف وحزن على نوارتها...وصغرونتها...مهبطة راسها متأسفة على بنتها...وشافقة على موقف إلي انحطت فيه...
جوري: وخرت لتالي...باهته...من عايلتها الي سلمت فيها...من أنانية خوها لأختار نفسو عليها...اختار يعيش على حساب تعاستها...اختار يعيش في الجنة...وهي في جهنم...رح يحرموها من قرايتها..حريتها..برائتها...حب حياتها. وحلم حياتها.... رح يحرموها من تعب سنين ...وساعت عينيها الخضر ..الي تحول لونهم للعسلي من حزن. واحمارو.....وتعباو بالدموع...نزلت دمعة من عينيها حرقت خدها وحرقت قلب أمها عليها...وسألت أمها تترجى فيها بعيونها المدمعين(مراد وافق ...وضحكت بوجيعة)...عملتلها براسها إيه....تفلقت بالبكاء..تبكي بحرقة...بشهقة على روحها...لأنها الضحية الوحيدة في كل شي صاير..تبكي على روحها الي ظلمتها الدنيا...وتلعن في التقاليد وساعتهم.... وتكلمت (ا...أمي علآه التخلف هذا بربي...علآه لآزم كان أنا نعاني...علآه..سلمتو فيا بالساهل...علآه جبتوني لدنيا إذا متحبونيش...علآه ظلمتوني....علآه تحبوني نسلم في قرايتي ومستقبلي....علآه مراد ضحى بيا (تحكي بوجيعة...قلب أمها مكوي عليها)...ياأمي حرقتوني...أمي نوعدك نعمل الي تحب عليه والله نوعدك كان قرايتي مانسمحش فيها ..خليني نكملها....منحبش نعرس بيه...منحبش نعرس ..نحب نبقى عندك...في حضنك...منحبش نبعد عليك..نمرض ياأمي ونتقهر...أشارت لقلبها ...أمي هذا تعب ...تعرف علآه...لأنو بابا يكرهني...وعمرو لآ أسأل عليا...يحب كان مراد...ولآ مرة حضني. ولا مرة باسني ولامرة سألني على حوالي...ديما يضربني...ويبهدلني على طالعة ونازلة...تعرف ياأمي (تبسمت بوجيعة)...مراد هو سندي...نحسو كيف بابا...هو قدوتي في دنيا هذي...هو عشيري...وقت نتعب نهرب لحضنو يحسسنيتعرف ياأمي (تبسمت بوجيعة)...مراد هو سندي...نحسو كيف بابا...هو قدوتي في دنيا هذي...هو عشيري...وقت نتعب نهرب لحضنو يحسسني بأمان وقت نخاف....أما هو سلم فيا...وخلآني يتيمة...رجعت كيف قبل...كسرتو جناحاتي...ياأمي....سمحتو فيا...قهرتوني.....أما طمن مش رح نعمل شي ....رح نبقى رايضة....رح نوافق...مش على خاطركم.. على خاطر الملآيكة...الي مازال ماجاش لدنيا هذي...ومستحيل نسامحكم...ومن اليوم انسى اني بنتكم...وقامت مسحت دموعها...وحملت كرطابتها..وراحت لغرفتها وطربقت الباب وراها...(أمها ...حرقتها بكلآمها...دموعها حرقوها...تبكي على كبدتها الي تحرقت)..دخلت لغرفتها ورمات روحها على السرير وتفلقت بالبكاء...تبكي بشهقة...على روحها...وعلى حياتها الي ضاعت...بسبب التقاليد الي عفست على بنات ...وخلآت القوي ياكل الضعيف ويعيش على حسابو...وحساب كرامة.......
***تبا لعادات دمرت حياتي...واخمدت شعلة قلبي....أطفئت نور وبريق عيوني...وسرقت برائتي وعفويتي...تبا لك يا تقاليد****
____________________________________________
تعاليق داخل الريبوند....ورايكم في أحداث الجديدة ...شنوا رح يصير في شهد بعدما تعرس بجاسر...ياترى رح ينقلب كرههم لبعض لحب ..#Mîss_Rõssįlã
______________________________________
أنت تقرأ
كرونيك💕 " حب تحت رحمة التقاليد " 💕
عاطفيةكرونيك جديدة من نوع جديد تحكي على عشق❤ عاش وسط نيران ،الدم وعروشية💣💣💣،ووسط ناس أدمنت الكره والأنانية وتبادل المصالح🔫🔫🔪، ترعرع في حكم القوي ياكل الضعيف🚬🚬 ...قصة تحكي على اثنين كل حد فيهم يختلف على آخر من حيث ثقافة،عادات،تقاليد🎲💪🏇، ..ولكن...
