The Mysterious Girl of Terrensia Academy [Completed]

Chapter 56: The Mermaid

MITCH'S POV

Nasilayan ko ang dahan-dahang panghihina ng mga halimaw dahil sa tinig na nagmumula kay Shamiere. Maging ako at ang mga kasama ko ay parang nahihipnotismo sa sensasyong nadarama hatid ng tinig na aming naririnig.

Hindi ito pangkaraniwan at sadyang kaaya-aya kung pakinggan. Lubos na nakakabuyo, nakakaakit.

Nakakahumaling ang kaniyang napakagandang tinig at nanaisin mo na lang na magpadala sa kaniyang adhikain, sa kung ano ninanais niyang gawin.

Makalipas ng ilan pang segundo ay nasaksihan namin ang pag-iiba ng mga buliga ng mga halimaw.

Kung no'ng una'y parang nanlilisik ang kulay itim nilang mga mata ngayon naman ay biglang naglaho ang emosyon mula sa mga ito.

Nagsimula silang umungol at umatungal dahilan para mabalik kami sa wisyo't mapatakip kami sa mga tenga namin.

Nagsimula silang maglaban-laban na tila ba ay napasailalim sila sa isang mahika, sa isang salamangkang hindi nila makayanan. Nilalabanan nila ang kapwa nilang mga halimaw.

Doon na 'ko napatitig ng husto kay Shamiere.

Napagtanto kong maaaring kagagawan ng tinig niya ang lahat ng kaganapang ito.

Hindi kalaunan ay nagsimula siyang lumangoy papunta sa amin.

Muli ko na namang nasilayan ang napakaganda niyang buntot. Ang panibago niyang anyo.

Isang sirena.

Ngunit ang sunod niyang ginawa ay ang mas nagpamangha hindi lamang sa akin kundi maging sa aming lahat.

"Dalian niyo! Hindi magtatagal ay mawawalan din ng bisa ang ginawa ko!"

Nagagawa niyang makapagsalita sa ilalim ng tubig!

Gulat at hindi makapaniwalang napatitig naman sa kaniya si Dawn na mahahalatang naggugulumihanan sa kaniyang nasasaksihan.

Hindi nagtagal ay nakaramdam ako ng kakaiba.

Parang sumisikip ang hininga ko.

Parang mauubusan ako ng hangin.

Nang tingnan ko ang iba ay bigla na lang din silang napahawak sa mga dibdib nila na tila ba'y hindi na makahinga.

Nawawalan na kami ng hininga!

Hindi ko rin magawang bigyan sila ng sapat na hangin dahil nasa ilalim kami ngayon ng tubig.

Nahalata ni Sham na nahihirapan na kami sa paghinga kaya't buong lakas siyang sumigaw.

"Kumapit kayo sa 'kin!"

Hindi na kami nag-atubili pa at agad nang kumapit nang mahigpit sa kaniya. Ang iba ay nasa kabilang balikat niya at kami naman ay nasa kanang balikat niya. Puno ng kaba ang puso ko dahil sa pag-aakalang hindi niya kami makakaya dahil sa dami ng bilang namin.

Ngunit nagkamali ako, animo'y kay bilis ng kidlat siyang lumangoy paibabaw ng karagatan.

Ilang segundo lang ang nagdaan ay tuluyan na kaming nakarating sa ibabaw at sabay-sabay kaming napasinghap ng hangin.

"S-Sirena ka?" agad na bungad na tanong ni Dawn kay Sham. Tinitigan lang siya ni Shamiere at hindi sinagot.

"Where's the Aquos?"

Kahit basang-basa ma'y hindi iyon inalintana ni Theo at sa halip ay marahang lumapit patungo sa kinaroroonan ni Dawn. Halatang hindi niya pinapansin si Sham.

"Nandito- teka, nasaan na 'yon?"

"What are you talking about?! Ikaw ang may hawak no'n!" inis na anas ni Serene sa kanita. Nagulat man si Dawn ay mabilis lang niyang ibinalewala 'yon at agad na luminga-linga sa tubig.