The Mysterious Girl of Terrensia Academy [Completed]

Chapter 76: Shopping

SHAMIERE'S POV

Nagising ako sa sinag ng araw na tumatama sa pisngi ko.

Pagmulat ng mga maya ko ay unang tumambad sa 'kin ang kulay puting kisame ng silid ko.

Nanatili lang akong nakatitig sa itaas habang inaalala ang mga nasaksihan at nalaman ko kagabi lang.

Nagtagal pa ako ng ilang minuto sa pag-iisip hanggang mapabuntong-hininga ako bago ko tuluyang napagpasyahang bumangon sa higaan at dumiretso sa banyo para maligo.

Dalawang araw nalang.

Dalawang araw nalang bago sumapit ang gabi kung saan magdidiwang ang lahat. Ang gabi kung kailan maaaring lumusob ang mga kalaban.

Mabilis akong napailing sa mga naisip ko.

Hindi dapat ako magpaapekto.

Agad ko ng tinapos ang paghahanda at nang makuntento na sa sarili ay lumabas ako ng kwarto.

Naabutan kong nag-uusap sina Bea at Yvonne sa may sala.

Napatigil naman sila nang makita ako.

"Morning, Sham." bati sa 'kin ni Yvonne na agad ding sinundan ni Bea.

"Alam mo na ba 'yong nangyari kagabi?" usal ni Bea.

May ideya na 'ko sa kung ano ang ibig niyang sabihin  pero umiling nalang ako para hindi na sila maghinala pa.

"Nawasak 'yong maliit na gusali sa kanlurang bahagi ng academy."

"At hindi lang 'yon, gumuho rin ang lupa sa mismong harap ng gusaling iyon." segunda ni Yvonne. Mabilis naman akong napaiwas ng tingin sa kanila.

"Pero mabuti nalang at naayos na. Pero iniisip ko pa rin kung sino ang maaaring gumawa no'n. Ikaw, Sham? May ideya ka ba kung sino?" tanong ni Bea sa akin na nakapagpabilis ng tibok ng puso ko.

"W-Wala, wala akong alam."

"Ah, o, siya hayaan nalang natin 'yon. Kumain nalang muna tayo, nakahanda na ang almusal sa kusina." pag-anyaya niya bagp tumayo mula sa pagkakaupo. Gano'n din ang ginawa namin ni Yvonne. Nauna si Bea papunta sa hapag habang kami ni Yvonne ay nakasunod lang sa kaniya.

"Sham? Saan ka nga pala pumunta kahapon? Wala ka kasi rito nang magising kami, tapos pagkarating namin kagabi, tulog na tulog ka na." mahabang pahayag ni Yvonne. Tumigil naman ako sa paglalakad at tiningnan siya.

"Pinuntahan ko lang si Miko, saka nag-usap lang kami kaya masyado akong natagalan."

"Ah, gano'n ba? Pero, Sham-"

"Hoy! Bilisan niyong dalawa r'yan, lalamig ang pagkain!" hindi na natuloy ni Yvonne ang sasabihin niya nang sumigaw na si Bea. Pilit na ngumiti lang siya akin bago nagpaumunang maglakad.

Nakakunot ang noong sinundan ko naman siya ng tingin.

"Sham, tara na!"

Nagtuloy-tuloy na ako sa paglalakad pasunod sa kanila.

Umupo na kami sa hapag at maya-maya pa'y nagsimula ng kumain.

"Saka nga pala Yv, pagkatapos nating kumain kailangan nating pumunta sa bayan para bumili ng susuotin natin sa ball, dalawang araw nalang 'yon." nasasabik na pahayag ni Bea kay Yvonne.

"Sige, p-pero paano si Sham? Wala siyang kasama rito, hindi rin kasi siya pwedeng sumama sa atin kasi suspended siya." malungkot ang tinig na tugon niya bago lumihis sa 'kin ang paningin niya.

Binaba ko naman ang hawak kong kubyertos bago sumagot sa kaniya.

"Huwag niyo na akong alalahanin pa, ayos lang ako rito." nginitian ko silang pareho para mapanatag ang loob nila.