The Mysterious Girl of Terrensia Academy [Completed]

Chapter 95: Cloak

THIRD PERSON'S POV

NANLAKI ang mga mata ng lahat na nasa labas ng barrier habang nakatingin sa kabuuan ng anyo ng dalaga.Hindi lang doble kundi triple ang laki nito kumpara sa mga normal na lobo.Ang balahibo nito ay kasing puti ng nyebe na tila kumikinang sa liwanag kung mamasdan.

Nagsimula itong tumakbo ng pagkabilis-bilis papunta kay Haring Zokus.Gamit ang mahahaba nitong buntot ay pinagagalaw niya ang mga ito at hinahayaang atakihin ang kalaban.

Ngunit nang magpalabas ng itim na salamangka si Haring Zokus at pinatama sa katawan ng dalaga ay agad itong napatalsik papalayo.

Dahan-dahan itong bumangon mula sa pagkakasalampak sa naguhong lupa at muling hinarap ang kalaban.Maya-maya pa ay tumingin ito sa itaas kung nasaan ang bilog na pulang buwan at nagpakawala ng isang malakas at mahabang alulong.Agad itong tumakbo ng napakabilis kasabay ng muling pag-anhag ng ginto niyang mga mata.

Kitang-kita ng lahat kung paano nitong talunan si Haring Zokus at saklamin ang leeg nito gamit mismo ang sarili niyang bibig.Dahil sa ginawa niya ay napasigaw sa sakit ang kalaban at mabilis na kinontrol ang patay na punong-kahoy hindi kalayuan sa kanila at agad na hinagis sa likuran ng dalaga,subalit dahil sa laki ng anyo ng dalaga ngayon ay tila wala itong naging epekto sa kaniya.Tinuloy lang nito ang pagsaklam sa leeg ni Haring Zokus na mas lalo nitong ikinahiyaw sa sakit.

Makalipas pa ng ilang minuto ay binitawan ng dalaga ang leeg nito,nang tingnan niya ito ay nakapikit na si Haring Zokus at hindi gumagalaw.Ang akala niya ay tuluyan ng nagwakas ang buhay nito,ang akala niya ay napaslang na niya ang kalaban.Pero saktong pagtalikod niya ay siyang pagmulat ng mga mata ni Haring Zokus at tumalon papunta sa likod niya.Pinahaba nito ang mga kuko at walang pagdadalawang-isip na tinarak ng mga ito sa dalaga.

Umalingawngaw sa loob ng panangga ang atungal na nagmumula kay Shamiere.Halos lahat ng nasa labas ay muling sinubukang sirain ito ngunit hindi pa rin nila magawa,halos magliyab na sa galit ang binatang si Theo habang walang tigil sa pagkalampag sa barrier.Wala silang nagawa kundi ang sumigaw sa nakikita nilang senaryo sa kanilang harapan.

SHAMIERE'S POV

ISANG malakas na atungal ang pinakawalan ko nang makaramdam ako ng matinding sakit nang bumaon ang mahahabang kuko niya sa likuran ko.

Walang tigil siya sa ginagawa niyang pagtarak sa likod ko dahilan para maramdaman ko ang pag-agos ng dugo mula dito.Rinig na rinig ko rin ang sigawan ng mga kasamahan ko sa labas ng barrier na ginawa ko.

Ginalaw ko ang mga buntot ko upang maalis siya mula sa likuran ko na napagtagumpayan ko namang gawin,hinagis ko siya at tumama ang likuran niya sa panangga.Matumba-tumba naman akong humakbang bago ko tuluyang maramdaman ang pagbalik ng dugo sa katawan ko at ang paghilom ng sugat sa likod ko.

Hinarap ko si Zokus na ngayon ay tumatayo na mula sa pagkakahiga.Bago pa man siya tuluyang makabawi ay mabilis na akong umatungal,pero sa pagkakataong ito ay sobrang lakas na hanggang sa puntong nagkandabungkal-bungkal ang mga lupa papunta kay Zokus.Dahil sa bilis ng mga pangyayari ay hindi na siya nakagawa pa ng harang,mabilis na tumama sa kaniya ang enerhiyang pinakawalan ko dahilan ng muli niyang pagtilapon.

Subalit ganun nalang ang gulat ko nang sunod-sunod na pagkabasag ang narinig ko.Kitang-kita kung paanong mawasak ang barrier na ginawa ko.Agad na nahagilap ng mga mata ko si Theo na matuling tumakbo papunta sa akin.Nang ibalik ko ang paningin ko kay Zokus ay nakangisi na ito habang naatitig kay Theo!

Hindi!

Tumakbo ako pasalubong kay Theo.Tipong nagiging malabo na ang paligid ko sa sobrang bilis ng pagtakbo ko.