The Mysterious Girl of Terrensia Academy [Completed]

Chapter 79: The Preparation

SHAMIERE'S POV

Lumipas ang isang araw nang hindi ko pa rin nalalaman kung ano ang dahilan kung bakit nagkagano'n nalang si Theo.

Ngunit ang mahalaga ay ayos na kami.

Kasalukuyan akong naglalakad sa mahabang pasilyo para puntahan si Mitch sa dormitoryo nila.

Kailangan ko ng bawiin kung ano ang dapat ay sa akin.

Ngayon din ang araw kung kailan pwede na akong lumabas, subalit hindi pa rin nagbabago ang ipinagbabawal sa akin ng punongguro.

Hindi pa rin ako maaaring dumalo sa gaganaping piging at kasiyahan bukas ng gabi.

Kaya't halos lahat ng mga estudyanteng nakakasalubong ko ay may kaniya-kaniyang dala na kung ano-ano na nakapaloob sa malalaking supot na hawak nila. Lahat sila ay nagmamadali at tila ba ay naghahanda na para sa mangyayari bukas. Halata sa mga mukha nila ang labis na pananabik para sa gaganaping pagdiriwang kinabukasan.

Ilang sandali pa ang lumipas at nasa harap na 'ko ng malaking gusali kung saan ang dormitoryo nila Mitch nang bigla kong namataan si Amanda mula sa hindi kalayuan na maarteng nagbibitbit ng isang napakalaking sisidlan na sa tingin ko ay nakasilid ang kasuotang susuotin niya bukas.

Halata sa mukha niya na nahihirapan siya sa dala-dala niya.

Napailing nalang ako bago ko siya napagpasyahang puntahan.

Mabilis akong naglakad papalapit sa kaniya, at no'ng una ay hindi niya pa ako napansin dahil sa laki ng kahong dala niya, ngunit hindi kalaunan ay natuon din sa 'kin ang paningin niya nang mapagawi sa 'kin ang mga mata niya.

Agad siyang napangiti nang makita ako.

"Oh, Sham! Mabuti at pwede ka ng lumabas." isang marahang pagngiti lang ang iginawad ko sa kaniya bilang pagtugon.

"Saan ka pupunta?" tanong niya sa akin habang inaayos ang dala niya.

"Ah, d'yan lang kina Theo, may kukunin lang sana." sagot ko at nilingon pa ang likuran niya kung saan nakasakdal ang gusali.

"What is it?" mabilis akong napailing.

"Hindi naman importante, ikaw babalik kana sa dorm?"

Agad naman siyang napabuntong-hininga bago napatango.

"Yes, this ball gown is so freaking heavy, that's why I really need to go there immediately!"

"Gano'n ba? Sige, mauna ka na." sambit ko na ikinangiti lang niya. Nang inakala kong aalis na siya ay agad akong natigilan nang muli siyang magsalita dahilan upang ako ay mapagitla.

"Ah, Sham, you will be there tommorow at the ball, right?"

Mapakla akong napangiti bago iiling-iling na sumagot sa kaniya.

"Hindi, pinagbawalan akong dumalo ni Headmaster." daglian namang nagbago ang ekspresyon ng mukha niya.

"But that's unfair!" bakas ang pagkadismaya't lungkot sa tinig niya na ikinangiti ko na lamang habang nakatitig sa kaniya.

"Ayos lang, Amanda."

"Hayst, if only I can do something about it. Anyways, before I forgot, sa tingin ko ay wala sina Theo r'yan. Rinig ko nasa Grand Hall sila for the preperation for tomorrow night's event, tumutulong sila sa pag-oorganize for the party." mahabang litanya niya bago tuluyang magpaalam.

Tinanaw ko pa siya papalayo at nang mawala na sa paningin ko ay ibinaling ko ang tingin ko pabalik sa dormitoryo nina Theo.

Ito na ang pagkakataon ko para makuha ang libro at ang susi ko.