عشق محرم

الحلقة 87

بسمة: الحمدلله على سلامتك عزيزتي
أشرف: الحمدلله على سلامتك مدموازال نور
نور: عي..شك..
اميي، شكونو هذاا
مليكة: اه عزيزتي نسيت ما قتلكش هذايا اشرف، هو لي لقاك و جابك لهوني، وو، و، -حبت تقولها اما ما نجمتش تخرجها- و لو كاان، موش هو، راك نتي توا ماكش معانا
نور خزرت لاشرف: يعيشك اما ما فماش علاش تعبت روحك بالفارغ ، انا عايشة ميتة، كان خليتني خير، اكاكا توا راني مرتاحة في قبري... موش حية، معايا امي ،و قاعدة نتعذب، و خزرت لمليكة بعين حزينة و ذابلة، عين معبية بالدموع، عين تحكي عالوجيعة لي في داخلها، عالسكين المغروسة في قلبها من قبل امها
نور حتي و امها تعنق فيها هي ما حستش اكا الاحساس متع الفرحة، ما تحركتلها حتى شعرة،و ما سالتش عليها حتى شصارلها و شبيها معلقة الصيروم ناقمة عليها و موش حاملتها، ولا حاملة تقلها بنتي، ما تصورتش روحها نهار توصل تتمنى الموت و امها معاها
أشرف عرف لي نور بيها حاجة،يسمع فيها و هي تحكي، تحكي بكل و جيعة، حس بيها و حس بالغصة لي في قلبها، قداه كلامها وجعو كلامها ما تعدا لوذنو،مشا ديراكت سكاكن في قلبو، لازمو يعرف شنيا الحكاية، قلبو تقطع عليها و هي تحكي، قلبو مشا دم، قداه تمنا يعنقها، و يقلها احكيلي ،فرغلي قلبك، احكيلي عاللي مخبيتو و كاتمتو و انتي معنقتني، احكيلي عالي تحس بيه و نتي في حضني
مليكة بدات تبكي ما تحملتش كلام بنتها، نور موش حاسة بيها ولا معدلة عليها، هي ضلمتها، هي كذبتها، هي طفاتها و ما حستش بوجيعتها، علاه بش تحس بيها هي تواا
نور دورت راسها و قتلهم: سامحوني، نحب نرتاح نحس في تاعبة
بسمة هزت الصيروم متع مليكة و خرتها، تمشي معاها خطوة بخطوة، شادتلها يدها و تسايس فيها و هي تبكي، اشرف مزال مصدوم هوما خرجو و هو مزال واقف، جا بش يخرج، تفكر بش يمدلها تليفونها عمل خطوتين و رجع ،
ما نجمش يحكي،: اا.. مدموازال نور، حبيت، نمدلك تليفونك، نهارتها خليتو عندي،ما نجمتش نمدو لحتى حد و زيد، وزيد مدام مليكة كانت في حالة موش باهية بالكل و تفجعت عليك برشا، ما لقيتش وقت بش نمدهولها،
نور: عيشك مسيو اشرف اما كان تحب خليه عندك، ما عندي ما نعمل بيه صدقني، ولا ونتي مروح اول واحد يعرضك في الشارع مدهولو
اشرف ضحك منغير ما يشعر اما حس لي هو موش وقتو بعديكا حشم حك خشمي: ههه سامحني نور اما والله ضحكتني
نور خزرتلو و ماتت بالضحك حتى هي
هوما يضحكو هكاكا و شايخين منغير سبب ماتو بالضحك وحدهم و هوما دخلو
امين: نور ... و تلفت لقا اشرف و كمل لقاهم شايخين بالضحك
بقا واقف في بالصتو يخزر لاشرف فاتتو اميرة مشات لنور : نور عزيزتي الحمدلله على سلامتك
نور شافت مالك تقلبت: عيشك اميرة
و بقات تستنى في مالك يتكلم مالك ما نجم يقلها شي نور بقات تخزرلو ياخي تلفتتلو اميرة غمزتو،
مالك: الحمدلله على سلامتك
بالسيف ما قالها، بالسيف ما خرجها من فمو، قداه يكرهها هالطفلة
نور: مرسي
اشرف: ااا سامحوني انا لازمني نمشي و دخل يدو لجيبو خرج التليفون- و مشا حطو عالطابل دونوي،: نور هاو تليفونك
نور: مرسي اشرف
امين بقا يخزرلو تالمون حاير فيه ما حبش يحشم
اميرة خزرت لامين بمعنى ما تعمل شي
:ستنى اشرف نشيعك للباب
مالك: انا زادا لازمني نمشي، مرة اخرى نشالله لاباس نور
نور: اممم
مالك: امين ازرب روحك هاني نستنا فيك
امين بقا هو و نور
جاب كرسي و قعد بحذاها
نور: مازلت كان نتي ما قتليش الحمدلله على سلامتك ههه
امين: ههه موش لفايدة في اني نقولهاك لفايدة انك انتي صافا.. احم. نور... كان ترا انا شنوا حسيت وقت لي سمعت بيك
نور: هه يزيني امين، تي موش حاسس بيا حتى حد، تي امي ماعاش تحس بيا