عشق محرم

الحلقة 123

أميرة كانت تعمل في السبور متعدية مالكلوار ،الكيت في وذنها تلفتت للبيت لقات الباب محلول شوية دزتو و دخلت لقاتهم محملين بعضهم ، نحات الكيت و فمها محلول، واقفة تخزر وموش مصدقة، هز عينو لقاها ،
:اه أميرة بنتي
اميرة: ااااا سامحوني ما حبيتش نقص عليكم اما شدتني البهتة
مريم دارت :اه اميرة جيت ،وين كنت قمت ما لقيتكش
اميرة: خرجت نعمل في كورس جاب ربي ما غبتش برشا ولا اللهو أعلم شكان صار،راي أوراق التبني كملت و حوايجي مرميين البرا
طارق و مريم ضحكو بعديكا باسها من جبينها
طارق: أميرة ماليوم انتي و مريم خوات
أميرة: اي اي فيبالي ، مريم نهبطو نفطرو
طارق لتوا متغششا منو اما هو ما عطاهاش اهمية عارفها بنتو و تحبو هكا ولا هكا بش تسامحو
طارق: اي براو مريم بنتي نغسل وجهي و نخلط عليكم
مريم: باهي طونطون طارق
طارق : اهههاااا شتفاهمنا عاد
مريم : ههه اي بابا طارق سامحني نسيت
هابطين فالدروج
اميرة: هاي علاقتك تحسنت مع پاپا
مريم: اميرة يزي انتي زادا سامحو والله كان حالتو تسخف و كان ترا قداه نادم
عيشة: مريم بنتي وينك تفجعت عليك
مريم: اههها امي انتي هوني خليتك راقدة و مشاتلها باستها
فاطمة : ما تخافش عليها مادامي في داري في الحفظ و الأمان
عيشة تبسمتلها، اما ماهياش حاملتها ماللي جات
فاطمة: ايا تفضلو اقعدو
أميرة مشات ديراكت للكرسي لي يترأس الطاولة هي جبدتو بش تقعد
فاطمة: اهااا اميرة في الدار هذي فما زوز اشخاص يقعدو عليه الكرسي هذاكا لي هي انا ، و ولدي ياسين
أميرة: اه صا تومبيان هام بش يوليو 3 ,جبدتو و قعدت : هيا بالشفاء ليكم يا جماعة و بدات تاكل
فاطمة مصدومة من جرأتها عمرها ما واجهت طفلة بالجراة هذي عادة لي تقولو فاطمة هو لي يمشي، ريقها شاح تبلع فيه بالسيف يبست في بلاصتها مالغزول ما تحركتش و قعدت تخزرلها
مريم قربت لامية توشوشلها: وه ماكش بش تستنا طونطون طارق
اميرة:لا
هي بدات تاكل و هوما مزالو قاعدين و يستناو كانت فاطمة شدت بلاصتها توا
طارق هابط : اها اميرة بنتي ما ستناتنيش
أميرة خزرتلو و كملت تاكل
طارق :اه سامحوني بونجور ، و خزر لفاطمة، نشالله تكون رقدت مليح و جبد كرسي و قعد بحذاها
فاطمة: اي اول مرة نرقد و انا فرحانة و موش عارفة علاش
طارق ضحك و موش عارف شنوا لي يستنا فيه
اميرة :مريم انا خارجة بعديكا بش نعمل شوبينغ و ناخو قضيات قبل ما نروحو تحب  تجي معايا
مريم:امم بطبيعة
اميرة: ونتي امي عايشة
فاطمة: لا عاد عيشة خليها بحذايا ماللي جات ما فرحتس بيها توا نقعدو نشربو حاجة في التيراس و نحكيو موش هكا عيشة
عيشة: امم هكا ايطارق: بيان مدامكم خارجين توا نوصلكم أنا بطبيعتي خارج عندي خدمة صغيرة و كان تحبو نروح بيكم
اميرة:لا ما تعبشي روحك ا..... قصت عليها مريم كيف ضربتها بساقيها من تحت الطاولة: اي بابا طارق بطبيعة زيد احنا ما نعرفوهاشي برشا البلاصه هذي و كان كملنا بكري توا نروحو وحدنا
اميرة تحكي بشويا : يا ما وراني شنيا الخدمة عاد و مريم تغمز فيها بش تسكت
طارق قام من علا الطاولة: ايا باهي مالا كملو فطوركم في عقلكم انا هاني طالع ندوش و نبدل حوايجي و نهبط نستناكم هوني
فاطمة تسمع و موش مستوعبة العيلة ماخذين راحتهم عالاخر ولا على بالهم ماهمش ناوين حتى يروحو