عشق محرم

الحلقة 3

أحم أحم پاردون مادموازال تحب نعاونك في حاجة دارتلو أما ما ثبتتش فيه مليح مالربثة لي مخلطة بالخوف
مريم: اااا لا يعيشك
أختي ما تخافش عليك أمان الله انتي جيست قلي على شنوا تلوج
مريم وقفت حشمت بش تتكلم أما مبعد تكلمت "
: نلوج على خبزة و الكوشة خلط عليها كان كي وفاء و توا الحوانت الكل مصكرة و أنا لازمني نشري خبزة ماكانش ترصيلنا.... مريم سكتت ما حبتش تقولها عارفة روحها فقيرة أما ما تنجمش تقولو لي بش يباتو بلاش عشاء حشمت باش تقولهالو و هو من لبستو باين عليه ولد شكون و شكون تي منڨالتو برك تشري بلاد 
:شبيك سكت ياخي حاشمة مني
مريم :لا مانيش حاشمة منك أما حاشمة من..... فقري
إي أنا فقيرة و حاشمة بش نقلك باش ترصيلنا بايتين بلاش عشاء و حاشمة زادا بش نقلك لي عندي جمعة ما كليتش خاتر ما عناش فلوس باش نشريو خبزة
و بدات تبكي قلبها وجعها كيف حكات هكا و هو قلبو دم عليها قداش غاضتو و غاضها حالها
: اششش ما تبكيش  حب يحملها أما عارفها طفلة نظيفه و ما تعملش العيب ربت على كتفها مرتين و قلها عادي الفقر مش عيب حتى أنا فقير
مريم ضحكت ضحكة براءة و مسحت دموعها و قتلو: ههه و الرانج روڥر البيضاء هذي لشكون
تلفت و حك راسو و قلها : ااااا موش... متاعي أنا نسكن غادي في الحومة هذي بحذاك... تلقاها تع مولا الكوشة
ضحكت و قتلو :و مفتاحها شيعمل في يدك ولا تنطر بالصدفة و ما ريتوش
حك لحيتو و قلها: أأأأ تحكي على هاذي ماني... ااا..نخدم شوفور عند مولا الكوشة تي نقصد يعني هو مولا الكرهبة.. إي تي ماو هو نفسو مولا الكوشة...
مريم: هههه فيبالك ما تعرش تكذب بالكل فيسع ما يبان عليك و تدخل بعضك و وجهك يحمار أما ميسالش منغير ما نحشمك خاتر أنا بيدي ما نعرش نكذب تو نحسب روحي صدقتك تبسمت
خلاتو و مشات هو بقا مبهم في ضحكتها طيرتو لعالم ٱخر خلتو واقف منغير حتى حركة
مشات خطوتين و رجعتلو : حقا الكوشة عندها مولاتها موش مولاها هذيكا بيدها لي كنت نتعارك معاها أنا بكري و عندهاش رانجروڥر عندها 206 و موش عاملتلها شوفور تسوق فيها بيدها