عشق محرم

الحلقة 99

قالت موش لازم الكرهبة اليوم تحب تمشي على ساقيها، هزت في يدها الحوايج متع العزوزة و خرجت مدتهم لاول مرا مستحقة و زادتها عليهم شويا فلوس و كملت تمشي بكل ثقة في النفس تستنشق في الهواء تحب تنسى لي هازتو على ظهرها،
تدور ف لاي بوتيك و تختار بكل راحة من عقلها، لازمها تشري حاجة لخدمة الليلة و في نفس الوقت تكون دو مارك خاتر تحب تخليها لروحها تروح بيها قال شنوا كوم سوفونير، كملت خذلت و خرجت هي هابطة فالدروج رولون و هو هز راسو يلقاها يرا فيها واقفة، راسها الفوق، في يدها داي ساك لبستها تفتق، شعرها الحرير هابط على كتفها شنوة هذا، منين جاتو هالقنبلة يا ربي، ما صدق لربي تعدات عليه 3 ليالي ملي راها هاي عاودت طلعتلو ، معاش ينجم قدام زينها قاعد في ستاربكس تاع المول قام من على الطاولة حط الفلوس و مشالها يجري بش يعرضها، اميرة تمشي و تخمم فلي بش تعملو يطل هو قدام وجهها عامل فيها بالصدفة

محمد علي: اهاااا مدموازال أميرة ملا صدفة
أميرة موش مصدقة تقول في روحها منين خرجلي هاللسقة اوووه يا ربي برا عاد ما نخرج من هوني كان مغرب : اهاا مسيو نتي سبحان الله ريت الصدف اما سامحني انا مزروبة توا لازمني نمشي دوماج نشالله مرة اخرى
سرسططهم الكل في جرت بعضهم قالتهم و خلتو و مشات تزرب تحب تتخلص منو اما هو خلط وراها:
تي خليني نضيفك على قهوة او موان
يمشي بجنبها و يحكي
اميرة: لا سامحني والله عندي ما نعمل مرة اخرى نشالله
محمد علي : باهي لحظة لحظة ستنا
و شدها من مرفقها وقفها
اميرة وقفت و هزت عينها الفوق بمعنى يا ربي ملا وحلة
محمد علي يحل في البورتفوي متاعو و يحكي: تي نتي حتى من اسمي ماكش متذكرتو هه ماو قتلك اسمي محمد علي ياخي نسيت
اميرة: اا اي اي محمد علي لا ما نسيتش هيهيهي
اميرة تتصنع في الضحكة بالسيف
محمد علي خرج كارت صغيرة : ايا تفضل هذي انفيتاسيون متع حفلة الليلة عاملينها في دارنا يفرحني برشا كان تقبلها و تيجا

اميرة تجب جيست تمشي من بحذاه و كان بش تقلو لا تعرفو بش يكبش معاها
اميرة: اهااا مرسي بطبيعة نجي مالا لا
محمد علي موش مصدق عينيه قريب تولي قلوب مالفرحة: ياااااا بالحق؟
و خذات الانفيتسيون من عندو :اي بالطبيعة علاش ما نقبلش ياخي و زيد انا نحب الحفلات والجو اما سامحني توا وخرت برشا نخليك و تهنا انا بش نجي
محمد علي : يعيشك اما كان تعطيني نومروك هكاكا نجم نكلمك
اميرة في قلبها: يا ربي شنوا هاللسقة هذا ووووه و تعرفو موش شيفك كان ما تعطيه رقمها
اميرةاي بطبيعة
محمد علي فرح مدلها تليفونو كتبتهولو و ما خلاها تتحرك كان كيف عمللها اپال و عرف لي هو نومروها بالحق بالطبيعة ما صدق لربي لقاها مرة أخرى اكيد موش شيضيع هالفرصة
أميرة: وكيف ما قتلك راني مزروبة و عندي ما نعمل لازمني نمشي
الحاصل خلصت روحها منو بالسيف