عشق محرم

الحلقة 83

اميرة تفجعت خرجت تجري ،صكرت الباب و حطت يدها على شفايفها تتبسم، تتبسم و تتفكر فلي صار، قداش تعشقو هالمهبول، قداه تعشقو و تموت على ريحتو، ضحكت و دارت مشات بحذا الجماعة
عمر وهو مخدر من شفايفها لي كان ياكل فيهم، رما روحو قعد عالسرير يهدي في روحو لحظة ولا كان بش يعمل حاجة موش باهية مطعم شفايفها لتوا في فمهو قداه يحبها، يعشقها، و يعشق التراب لي تمشي عليه، كان تبعد عليه يموت، ما يتصورش حياتو تتعدى ولو نهار واحد من غيرها يمكن يهبل كيما مالك ولا حتى اعظم
امين و اشرف قاعدين ، يستناو فيهم وقتاه يقولولهم لي ينجمو يراوها
اميرة جايا فرحانة : امين ياخي ويني مما
امين خزر لاميرة عرفها كانت بحذا عمر حشم هبط راسو و قلها: اميرة في فمك دم
اميرة: شنوا
امين قام شيغطي عليها و اشرف ما يراهاش: قتلك في فمك دم و مدلها موشوار و دور راسو بش تمسح
اميرة وجهها حمار و خضار تمنات فاللحضة هذيكا الأرض تتشق و تبلعها ،خذات البابي موشوار حطتها على فمها و خزرت لأمين ( هي موش منجمة حتى تحل فمها)
أشرف لي ماكانش معاهم جملة ولا يسمع فيهم، ولا فالكلينيك من أصلو، اشرف كان في عالم ٱخر، كان يتذكر فيها و في ملامحها، في وجهها و في عينيها، في روحو منين هبط محملها و يجري بيها، قداه عشقها ، و عشق ريحتها لي لتوا في خشمو وما تنحاتش، سارح يخمم فيها و يسال في روحو، أشرف شصارلك،ياخي حبيتها، للدرجة وليت تخمم فيها في اي لحظة، اشرف فيق على روحك ياخي شبيك و كان تطلع عندها شكون و قلبك يتحطم، اناا قلبك؟ ياخي انا حبيتها؟، و تفكر روحو البارح كيفاه ما رقدش و هو يخمم عليها، كيفاه ما روحش للدار و خذا بيت اوتيل بحذا الكلينيك بش يفيق الصباح يمشيلها، يعمل في هذايا الكلو و هو ماهواش فايق بروحو، ماهواش فايق باللي لي يعمل فيه على خاترها و تخمامو ليها، و لحظة الفجعة لي كلاها وقت قالو لي هيا ناقصة دم، قلبو كيف ضرب بالقوي موش عارف علاه، فمو لي تكلم وقال انا دمي +o ، بخوف، قالها و هو يرعش من داخل،قالها و موش عارف حتى كيفاه خرجهم الحروف اذوكم ورا بعضهم، خرجو بخوف، بخوف و غصة ،ووجيعة في القلب، ياخي ينجم يكون هذايا حب، ينجم يكون هذايا حبي الاول، ياخي انك ترا وحدة ما تعرفهاش ولا تعرف طبيعتها و قلبك يدق، معناها حب، هذا لي يتسمى حب من النظرة الاولى؟ هذا لي يتسمى coup de foudre?
يسال في روحو و موش عارف حتى مخو وين قاعد يهز فيه، كل مرة يتفكر حاجة برك و يسال روحو عليها ألف..