عشق محرم

الحلقة 73

والله ما عاد زايد فيها حتى دقيقة..أقعدو فيها...
بوه:موش على كيفك سي الشباب
هو: مالا على كيفك نتي كل وين تقلق تجي تدبر عليا شنعمل مانيش ولد صغير راهو و تو أقعد فيها وحدك
هز مفاتح الكرهبة و خرج
بوه: أشرف...أشرف نكلم فيك ٱٱقف...أأشششرف
خرج
امو : ريح السد خليه يتلف
بوه: عاجبك هكا يا مرا الطفل تعلم يصيح و يعلي صوتو و يناقشني في قراراتي لا و الكلمة الشهيرة عاد في كل مرة و بدا يعكي عليه كيفاه يحكي" أني مخليهالكم أقعدو فيها"

يسوق في الكرهبة العصب يهز فيه و يحط و يحكي وحدو: ملا حالة هذي تعلموها جديدة اعمل اك الحاجة..موش لازم تعمل اذيكا..أذيكا تجي ...اذيكا ما تجيش و لخرا هكة ...عروسة قصب انا يتحكمو فيا كيف ما......و قص على كلامو الدخان لي يرا فيه...الكرهبة مقلوبة والضو مزال يشعل ...شافو على الروتروفيزور عمل مرشاريار و وقف...
بلاصة تخوف...مهجورة ...بعيدة على كل شي...هابط و يسمع في ذيوبة تعوي.. البلاصة تخوف موش نورمال..قدم مالكهربة و خايف لا تتفجر في أي لحظة الدخان لي خارج منها برشا...قدملها يجري بش يشوف كان فما في وسطها عباد ولا

مقلوبة على راسها كيف مالكرهبة الدم في راسها و في رقبتها ضارب فيها ضو القمرة لي قوي برشا....مشالها يجري حل السنتير و حاول يقيمها...مدموازال..فيق...مدموازال....عرفها عندها برشا و ما تنجمش تفيق حملها و هزها للكرهبة طلعها و حطلها السنتير و يحكي وحدو : يا ربي نشالله تكون ما عندهاش نزيف يا ربي
و طلع في الكرهبة و خرج يجري للكلينيك و هو في الطريق يسوق و شاد دبوزة الماء يرشلها على وجها أما شي ما حبتش تفيق