عشق محرم

الحلقة 156

دزت باب الڤاراج و دخلت، تمشي بكل استفزاز ، و دبوزة الماء في يدها حلتها و طيشت الغطاء و كملت تمشي

طايحة في القاعة ، شعرها مشبشب، كرسيها مقلوب ، الكلها غبابر ،هزت راسها و شافتها ولات تمرد و تقول : ماء ماء، نحب ماء ،
وصلت بحذها هبطلها و تبسمت في وجهها ،
هزت راسها تخزرلها في نظرة بندم كبير كائنها تقلها راني بش نموت كان ما تعطينيش نشرب :ماء نحب ماء أعطيني
:قتلي ماء  أه
قامت من بحذاها و هي تخزرلها في عينيها و بسمة الشر ما تنحاتش من وجهها هزت الدبوزة و بدات تكب فيها في القاعة و هي تخزرلها بكل غرور ، كاينها تقلها يشربو التراب و ما تشربوش انتي
تشوف فيها تكب فيه قداما بدات تفرفط و تعيط: لاااا لااااا
كملت كبتها و هي عينيها ما بعدتهاش عليها ، طيشت الدبوزة : ريت ،..حتى من شربت الماء بش نحرمك منها، كيما حرمتني مالنفس متاعي، كيما حرمتني من أمي و بابا السنين هذي الكل ، الا ما نتوبك الا ما نشعفك و نخليك تموت قدامي بالشوية بالشوية و الدود ياكل في لحمك
بعدت عليها و بزقت و خرجت تلفتت للرجال البرة: سكرو عليها بالباهي و حتى شربت الماء ما تمدوهالهاش لا نحبها لاتاكل لا تشرب خليوها هكاكا و ردو بالكم عليها تصيرلها حاجة تتحملو مسؤوليتكم
مشات خطوتين و دموعها سبقتها قوات في البكاء عيطت وطاحت في القاعة جاوها الحراس أما هي وخرتهم بيديها خلاوها كملت بكات و قامت تمشي جهامة بلاش روح، حاسة بروحها ضايعة، السنين لي سرقتهملها ما تنجمش تعوضهم ملي حرمتهولها و ما تنجمش تعذبها بالاحساس لي حستو ولا بمجرد انها تحرمها من انها تشرب حستو هذايا لكل و شوي فيها ، ما ينجمش يبردلها قلبها ، حاسة روحها بلي بش تعذبها ،تبقى مهزومة وخاسرة قدامها، هالمرا شوتها شوية في ثنين، حرمتها من حنان أمها و بوها سنين بلي بش تعمللها و شويا فيها
طلبت أمين
أمين: اه مريومة سافا
مريم و هي تبكي: أمين يعيشك تجي تهزني من هوني
أمين: مريم،! ياخي تبكي ؟!،.... باهي باهي انتي وينك

قاعدة تحت الشجرة ضامة سافيها لين ترا في ضو جايها، دمرج الكرهبة و وقف و هبط يجري حتى الباب خلاه محلول : مريم ، مريم شبيك ، وشتعمل هوني وحدك
مريم: فديت يا أمين ، فديت و تعبت ، نحب نقهرها كيما قهرتني ، فديت و أما نرا فيها كل يوم مزالت تتنفس و زيد نوكلوها و نشربوها موش برشا ، ماليوم أنا بش نعذبها و مش بش تاكل ولا تشرب ماليوم بش تقتلها و بدات تبكي و أمين عنقها
اششش، يزي مريم يزي ، زيد شمجيب لهوني وحدك في هالليل ، وريتك لبلاصة وندمت
مريم: هيا نمشيو من هوني
قام هزها للكرهبة صكر عليها الباب و مشا ، طريق كامل و هي سارحة ، أمين حب يكسر الصمت : بش نمشيو للفيلا
مريم ما جاوباتوش ولا كإنها سمعتو
: فيبالك لقاو بابا طارق
مريم على الكلمة دورت راسها مصدومة ملي سمعتو موش مصدقة : أه!
أمين: أي مرسم لقاو بابا طارق ، لقاوه في البحر مضروب برصاصة و هو توا في السبيطار و مالك معاه
مريم : كيفاه، كيفاه لقاوك و شكون ضربو و هو توا لاباس و مالك وينو ؟
أمين: مالك معاه هو و أنطونيو
مريم: كيفاه؟
امين: والله هذا لي سمعتو أنا زادا
مريم: و أميرة و طا بسمة فيبالهم
: اي اي فيبالهم أما أمي بسمة مزال ما فيبالهاش لي هو مضروب برصاصة قالولها لي هو لقاوه في البحر و أكهو
مريم: وعلاه ما قتليش يا أمين في الوقت هذايا لازمني نكون مع أميرة علاه
: و أنا عقلي مزال فوقي الدار خايضة و ما تفهم شي
مريم شدت التاليفون : لازمني نكلم مالك
و أمين شدلها يدها: لا مريم،منغير ما تطلبو صدقني هو موش في حالة انو يتكلم
مريم: شنواااا، كيفاه، أمين ما تخبيش عليا قلي مالك سافا
أمين: تي يا مريم سافا أما مزال داخل بعضو ومصدوم
مريم: أمين لازمنا نمشيو لبريطانيا
أمين: أه ، لا يابنتي تس فاش تحكي
: أمين، بش تمشي معايا ولا تو نمشي وحدي