عشق محرم

الحلقة 30

هابط مالدروج لابس خلعة و سروال بيجاما و شلاكة عرضتو أمل: صباح الخير مسيو أمين
أمين: بنجور أمل ياخي مالك خرج موش في بيتو
أمل: لا مسيو أمين سي مالك في بيت مدام بسمة
أمين: أأأ باهي شكون على الطاولة مالا
أمل : كان مسيو طارق و مدام مليكة موازال أميرة
أمين : و نور لا
أمل: لا مدموزال نور مزالت راقدة
أمين : باهي أمل عيشك
أمين رجع طلع الدروج حب يمشي يقوم نور هو وصل لبيتها و بيت نوم بسمة تحلت حسب روحو خارج توا أما مالك شلق بيه كان ماشي لنور تبسم
مالك: مما هاو أمين ولدك
بسمة: ههه صار قالك بلي أنا ستبنيتو
أمين : أأأ أمي صباح الخير و مشالها باسها من راسها
مالك حل فمو: مما ياخي تحكي بجدك
أمين :ريت بربي أمي مزال موش مصدق
بسمة: ههههه تي أي مالا نفدلك
هبطو للفطور
طارق :صباح الخير
مالك:صباح النور پاا
أمين:صباح الخير بابا
مالك خزر لأمين: وبوك زادا
أمين : مالا عندي أم وبلاش بو
مالك تفلق بالضحك و بسمة و أميرة و مليكة ماهمش فاهمين شي يضحكو كهو
طارق: ههههه أي يا مالك أذاكا ماليوم خوك
مالك: أي مام قالولي و من ٱمس موش ماليوم.... وقلي بربي بوك و أمك شعملت فيهم بعتهم
أمين: هههههههه لا أذوكم في مقام أمي و بابا
طارق : أناهم منهم أحنا ولا هوما ههههه
مالك: ههههه تو شكون في مقام شكون معاش فاهمين شي
نور: صباح الخير
طارق صباح الخير بنتي
مليكة: بونجور عسولتي
مالك فد قال لبسمة هيا نمشيو مما معاش بكري قامت بسمة و أميرة و خرجو نور غزلت
نور: مما أني راجعة نرقد صحة ليكم عرضتها منى قتلها خلطلي فطوري للبيت
طلعو في كرهبة مالك و مالك طريق كامل و هو يوصي في أميرة باش ما تحلش فمها بكلمة بسمة قالت لمالك يحبس في الطريق باش ياخذو بوكاي de fleurs💐 يهزوه فيديهم ما يمشيوش يديهم غارغة
وأميرة هبطت خذات شوكولا لمريم
و صلو للحومة أميرة ما عجبتهاش الحومة أما شادة روحها بالسيف  باش ما تقولش حاجة تغشش مالك بسمة ما قالت شي خاترها مرا متواضعة عكس أميرة لي متربية في القطن كل شي تتقزز منو
وصلو لدار مريم هبطو لقاو الباب محلول و عيشة تستنا فيهم بالبخور : مرحبا مرحبا زارتنا البركة عسلامة للا
بسمة: عسلامة حاجة إنتي جدة مريم موش هكا
عيشة: أي أنا هي
بسمة: هه أي حكالي عليك مالك برشا يشكر فيك و يعاود
عيشة: يعيشك ربي يفضلك أذاكا ولدي الغالي و انتي مدام بسمة أم مالك
بسمة ههه أي بالضبط أنا هي أما أنا كيف بنتك قلي بسمة منغير مدام
عيشة:ههه تدلل بنتي الغالية مرحبا بيكم تفضلو تفضلو زوزو زارتنا البركة ورررررررررررراي

بسمة سلمت عليها و مدتلها البوكاي و دخلت لقات شلايك محطوطين نحات الطالون متاعها و لبست شلاكة
أميرة قعدت تسلم على عيشة و مبعد دخلت تخزر للدار موش عاجبتها الحالة عيشة تلفتت لقات بسمة لبست شلاكة
عيشة: أأووه علاش تقلق في روحك يا بنيتي
بسمة: ههه لا ما فما حتى قلق أنا نرتاح هكا و تلفتت غمزت أميرة بش تنحي صباطها و تلبس شلاكة أما أميرة تقززت و ما حبتش قعدو على الديڥون و بداو يحكيو و مالك قاعد على الكرسي و يطل يراشي مريم يحب يراها توحشها
عيشة تلفتت لقات مالك يتغسور يطل براسو و يقلب في عينية غمزت بسمة و قتلو: مالك و لدي كاينك تفركس على حاجة
مالك حشم طبس راسو و تبسم بسمة و عيشة و أميرة تفلقو بالضحك
عيشة: ههههه يا وحيد ما تخافش هاك بش تاخذها نتي ما عندها وين هاربة عليك و عيطتلها مرييم..يامريم..إيجا هاي حماتك و خطيبك جاو
مريم جات سلمت عليهم و قعدت بحذا أميرة و مالك من بكري و هو يخزرلها قداش عاجبتو حتى في سروال بيجاما و مريول عاجبتو
بسمة وجه مريم موش غريب عليها درا وين راتو بقات تعصر في مخها و شي ما نجمتش تتفكر
مريم جابتلهم القهوة و قعدت تحكي هي و أميرة و عيشة تحكي هي و بسمة
أميرة عجبتها مريم موش نورمال قداش كانت ماخذة عليها فكرة خايبة زيد الطفلة طلعت متثقفة و قارية و تستنى في résultat الباك عكس لي كان ماشي فيبالها فيبالها طفلة جاهلة و ما تعرش زيد طلعت سامبا و روحها خفيفة فيسع ما تفاهمت هي و ياها
بقاو بسمة و عيشة يحكيو و مريم هزت أميرة لبيتها و بقات تحكيلها عداو بحذاهم صبحية و بعديكا خرجو أميرة حبت تزيد تبقا بحذاها و قتلها تو نرجع بسمة عجبتها الطفلة متثقفة و متربية و زيد تضهر كلاس من طريقة كلامها أما مالك مزال متوحشها حب يحكي معاها أما ما نجمش و في نفس الوقت فرح كيف شافها و عجبت أمو
بسمة: واللهي محلاها الطفلة متثقفة و متربية و زيد مزيانة تشره والله مواتيتك يا مالك تهبل أما خسارتها الفقر ظلمها المسكينة
أميرة: أي مما حتى أنا عجبتني قداش طلعت محلاها زيد مزينها مما تفتق أنا تصدمت كي ريتها قلت كييفاه هذي حالتها هكا لي يراها في الشارع بالزين هذاكا يقول هذي بنت ناس هاي منا نحنا أنا بلحق كنت غالطة فيها و خذيت عليها فكرة خايبة حكمت عليها منغير ما نعرفها و نعرف طبيعتها قداش ندمت منبعد
بسمة: ريت نتي كي نقلك معاش تحكم عالناس من أشكالهم كان ما تعرفهم شكان عليك كان بيضت قلبك شويا
أميرة: باهي مما توا صاياي هاني عرفتها الطفلة و كهو...ونتي سي مالك قول معانا كلمة
مالك ما كانش معاهم كان يسوق و إيمتا إيمتا يخلط للدار بش يوصلهم و يرجع يهز مريم
بسمة : يا مالك هاي فاش تخمم ياخي
مالك: أه مما..تي شي مما قاعد نسوق لمفيد نتي عجبتك وكمل يسوق
بسمة أي هذي لي تصلح بيك
بسمة قعدت تخمم منظر مريم موش غريب عليها ما تعرش وين راتها