عشق محرم

الحلقة 51

كان ما قالتلهاش عيشة لي هو عمها كانت بش تشك في روحها.....ياسر يشبهو لبعضهم أما هو ٱقصر شوية من بوها و أسمن زادت .. صحيح ماهمش تواما  أما يشبهو البعضهم ..
تفكرت بوها قداش كان يحبو.. كان ديما يحكيلها على خوه الصغير... كان يحبو برشا..

مريم مبهمة.. عينيها معبية بالدموع..ماهياش مستوعبة لي قاعد يصير..

عيشة شدت مريم من يدها و تحكي مع العايلة : عايلة العايشي.. ماعاش نحبكم دورو بيا و لا ببنتي
..أخرجو عليا ..و البر هذا ماعاش تعفسوه.. و الدار هذيا تنساوها... رزيتوني في راجلي.. دمرتولي حياتي و حياة بنتي لي ماتت في جرتكم... شمزلتو تحبو ٱخر... أخطاونا و إبعدو علينا... خلونا عايشين و لاهين في رواحنا.. ماللي عرفنا سلالتكم المنتنة ما شفنا خير ..

و إنتي للا أدخل تحرك للبيت (و دزتها للبيت )
سي مالك في الأمان البنات برشا دور بغافلة تقبل بيك و بعايلتك أي سيرتو(تلفتت لطارق هزتو و حطتو) ببوك ..
صحيح مريم عندها عرق من سلالتكم أما عمرها ما كانت كيفكم ولا بش تكون......

خلاتهم يخرجو دفلت و سكرت الباب ...

طارق يمشي و يزرب في مشيتو بغُل ...لازمو يفهم علاش مزالت حية..... لازمو يفهم علاش ما قتلوهاش و كذبو عليه ...علاه خلاوه يمشي في بالو لي هي ماتت  ....

بسمة تحكي و  تعيط على طارق بش تنطق من جنابها.. مالك شي يهز و شي يجيب... ماشي لكرهبتو شارد موش فاهم شنوا يعمل ..طلعو أمين بجنبو،  ربطلو السنتير و ركب هو بش يسوق بيه..

طارق عرضوه أكا الصغار متاع الشكلاطة : عمي ويني الشكلاطة أي عمي إنتي قلت شتعطينا
طارق ماهواش لهنا مطفيهم و متعدي...  
الصغار: يا جماعا تقريب عمي تغشش خاطر خذينالو شكلاطو.. زعما يحبنا نرجعوهالو ؟
واحد اخر من الصغار: اي كيفاه تو اما احنا كليناها و مشات من فمنا في كرشنا
واحد اخر. : انا عندي فكرة نقتلو رواحنا و واحد يعمل هو طبيب و يحللنا كرشنا يخرج الشكلاطة و يرجع يسكرلنا كرشنا
طفل: اي واللهي فكرة ...
(فقط لللمزح البنات 😂 قلقت و انا نعمل في الدراما)

نرجعو للاكشن

طارق يغزل كيفاه حية ....علاه غدروه...علاه قالولو راي ماتت و هي حية.....

بسمة و مليكة ركبو و ماهمش فاهمين شي...
روحو طريق كامل و هوما ساكتين.. لا واحد حكى مع لاخر...     أمين كل مرة يخطف طلة على مالك لي كان يخزر مالشباك و سارح ماهوش اللهنا....
بسمة و مليكة كيف كيف.......

.... طارق يرحي فالدخان على بعضو موش عارف شيعمل :عيشة الق......مرت أحمد الجيعان لي كان يخدم عندي تهيني انا و تطيحلي قدري ..... و يضرب في الفولون......اااااه.... اااه........موتها ما يكون كان على يدي.... هي و للا مريم لي كان ماشي فيبالي قتلوها ..ظهرو عداوها علياا الكلاب....الاوباش لي ما يسواوش فرنك اه....يعديوها على طارق العايشي..... يحكي وحدو يضرب فالفولون : عداااااوهاا عليا السقااط ..شكونهم هوما بش يعديوها عليااااا........اااااخخخ......ااخ......ااااخ....
والله ما ن°°°° واحد واحد....والله ما ندمهم علي عملوه......ما نخليهم يركعو في التراب و يبوسولي ساقي......ما نخليهم يتمناوُو الموت و ما يراوهوُوش.... نوريهم شكونو طارق العايشي.. يضرب فالفولون و يعاود..يعيط و يرحي فالدخان.. الطريق حرقو حرقان ..موش عارف وين ماشي.....هوما جابو ثنية الدار و هو كسر الثنية   شيمشي يقص بياي داڥيون ..

عمر و أميرة كل واحد في كرهبتو و التليفونات على وذنيهم يحاولو يفهمو أش صار.