عشق محرم

الحلقة 54

طاير فالطريق.. حرقو حرقان.. يجري فال200.. حاجتو الوحيدة توا يلقا حل باش يوصل لبريطانيا..

لازمو يمشي يفهم الحكاية و علاش لعبو بيه التليفون معاش ينفع بعد ما عداوها عليه

:قتلك نحب طيارة لبريطانيا تواا.. باش تفهم ياخي
الراجل: مسيو هدي روحك راو ميجيش لي تقول فيه لي يريزرڥي بياي داڥيون راو قبل بنهار موش بعد ما تخرج الطيارة ..يعيشك باش تفهم ٱخر طيارة خرجت 16:15 معناها قبل بربع ساعة ماللي طلبت إنتي و ما فماش طيارة مبعدها كان غدوة الصباح و أول طيارة مع......
قص عليه طارق
طارق : ر** دبر فيا إنتي وقتاش نريزرڥي باش تفهم تو نتي أنا نحب طيارة تواا توااااا في الوقت هذا.. تصرف خرجلي طيارة على حسابي و أنا نخلص البقايع لي فيها الكل و الي بش تتطلبوه فلوس انا نعطيكم جوسوي ڥريمون ترايز يرجون
الراجل: مسيو يعيشك راك قاعد تعطل فيا على خدمتي هذا مطار دولي موش محطة تاكسيات بش نخرجلك طيارة على حسابك سامحني مسيو مانيش فاضي شغل نضيع في وقتي تيت تيت تيت
وعلق عليه
طارق ضرب الڥولون و ديراپا بالكرهبة قريب يقلبها و عيط بالقوي لين وجهو حمار و عروقو بانت: ٱٱٱٱٱٱٱٱٱٱٱ السخط ...السخط
بقا يجري فالطريق و بعد شد فران بالقوي و ريكا على جنب و هبط يتنفس عالبحر و بعد دار مشا يزرب للكرهبة و ضرب العجلة برجليه و يعيط: لا تربحكم سخط عديتوها عليا..و دار و شد راسو و بقا يدور على بلاصتو و يتلفت داخل بعضو موش عارف شيعمل و بعد دار للكرهبة هبط البلار و جبد التليفون ما بقالو حتى حل غير إنو يطلبهم و يستفسر منهم لي عملوه