عشق محرم

الحلقة 122

يبكي و تبكي معاه ، تسمع فيه كيفاه يحكي بصوت ذابل و موش منجمة تقلو شي ما حبتش تظهرلو لي هي تبكي حبت تحكي معاه اما تفكرت الحقد لي راتو فيه نهارت لي يحب يعرف شكوني مريم، معاش عارفة تصدقو و تعطيه فرصة اخرى ولا توجعو بش تحاول تصلحو، التليفن في يدها و هي بين نارين
ختارت انها تصلحو، ختارت انها تنحبلو الحقد لي عمالو عينيه و الكره لي في قلبو، علقت عليه، شدت الحيط و طاحت تبكي بالشهقة ، مالك ورا الباب يسمع فيها و اميرة نفس الشيء ، سمعت الكلام لي قالو بوها الكل ، حستو بالحق من قلبو حستو موش يكذب ترا في بوها اول مرة يبكي هكا ،قلبها دم عليه تحب تمشيلو و تواسيه اما موش منجمة ما لازمهاش تسامحو بالسهولة هذي لازمو يتعلم كيفاه يحافظ على عايلتو و يحب الخير لاولادو 
مريم و اميرة قعدو فرد بيت حكاو لين رقدو و ما حسوش ، قامت مريم في الليل مخر بش تشرب ما لقاتش ماء خرجت تحوس عالكوجينة ما لقاتهاش هبطت الدروج، بقات تدور في الدار ، متعدية من بحذا الصالون ،سمعت و كذبت، وقفت مشا فيبالها تستخايل ،تعدات ياخي عاودت سمعت نفس الصوت، صوت متاع ماكينة، متع قلب ،مريم حارت وقفت في بلاصتها بش تتأكد ، اي والله صوت ماكينة وه ياخي منين جاي هالصوت الصالون كاملة و موش بحذاها حتى البيت ، البيوت الفوق و الصوت قريب، قدمت بشويا تتبع في صوت الماكية( باز عرفتوها البناه الماكينة متع دقات القلب لي تعمل تيت..تيت..) تمشي تمشي لين وصلت للحيط، الحيط مسكر وه وعليه ديڤون ، هي قدمت للديڤون و فاطمة وقفتها كيف قتلها :مدموازال مريم، تحوس على حاجة
مريم تفجعت ركحت في بلاصتها ، بلعت ريقها و دارتلها لقاتها وراها اللطف كيفاه جات مام پا سمعت حس الكرسي
مريم:اه مدام فاطمة فجعتني، احم هبطت بش نشرب ياخي ضعت بقيت نجوس عالكوجينة
فاطمة هزتها و حطتها : غريبة عمركشي صالون تلقا في وسطها كوجينة، اي اون بليس عنا ناقوس في كل بيت جيست تنزل عليه توا تجيك لفام متاعنا وتجيبلك لي تحب عليه
مريم: اه پاردون فيباليش مالا توا نطلع للبيت و نحوس هالناقوس
فاطمة: لا عادا توا انتي جيت و انا جيت تبعني توا نوريك الكوجينة منين
مريم: اه وي ما خممتش فيها
فاطمة دورت كرسيها و مشات و عينيها الفوق بمعنى هالقضاء لي بعثهالي ربي في مخها تقول ملا بهيمة هذي و هي مريم تموه في فاطمة خاطر ماللي جات حاسة لي فما حاجة غريبة في الدار و قلبها يقلها لي فما لغز لازمها تطلعو و موش عارفة علاش عندها احساس هكا و زيد بعد لي سمعتو لازمها تشوف شنيا حكاية فاطمة و الحمدلله فاطمة ما شكتش لحظة وحدة انها تكون سمعت صوت الماكينة واللي هي سر فاطمة الوحيد لي مخليها قوية و اللي هي المفاجاة الكبيرة
شمس جديدة و يوم جديد و فيه برشا طاقة ايجابية قامت الصباح لقات اميرة موش بحذاها
مريم: وه وين مشات هذي زادا تلفتت لقات عيشة راقدة في الفرش الآخر ما حبتش تقيمها غطاتها
دخلت غسلت و جهها و خرجت بش تحوس عليها مشات لبيت طارق دقت : بابا طارق ...ما جاوبهاش ياخي دخلت لقتو مطيش راقد فالقاعة قاعد و حاطط كتفو عالحيط قداش سخفها المسكين في اللحظة هذيكا نسات الخايب الكل لي عملو معاها و مع أمها مشاتلو بش تقيمو
:بابا طارق
طارق: اه ...ااا مريم بنتي
مريم قداش فرحت ترا فيه قاعد يتحسن في المعاملة متاعو و تدعي نشالله يقعد هكا ديها :اي بابا طارق قوم ارقد في فرشك راك راقد في قاعة
خزرلها كيف قتلو بابا شدها من يدها و فام و عينيه الكلها فرحة وا تنحاوش من وجهها :بنتي ، ياخي ،ياخي قتلي بابا تو
مريم: اي بابا طارق
طارق يسمع و موش مصدق حملها و بدا يبكي قداه نادم عاللي عملو فيها يبكي و يقلها سامحني بنتي سامحني ، نادم عاللي عملو فيها
احسبني بوك بنتي مالليوم انا بوك موش عمك و بش نعوضلك الي ما عشتوش مع بوك الكل وراس بنتي يشم في راسها و يبوس مريم موش فاهمة اما مسخفها