ပျင်းနေပြန်တဲ့ကိုယ့်ဆရာ (ဘာသာပြန်)

အခန်း ၁၄ ။ နတ်ဝိညာဉ်ဖြစ်ပေါ်ခြင်း ဆရာသခင်

Myanmar Translation of [师父又掉线了] By [尤前]
ဘာသာပြန်သူ - JT

အခန်း ၁၄ ။ နတ်ဝိညာဉ်ဖြစ်ပေါ်ခြင်း ဆရာသခင်

"ရှန်း... ရှန်းရင်" ဘယ်သူ ဘယ်သူလဲ။ သူ တစ်ခါမှ မကြားဖူးဘူးလေ။ ဒါပေမဲ့ အဓိကအချက်က— ဘယ်ချိန်တည်းက ဒီလူ ဒီမှာ ရပ်နေခဲ့တာလဲ။ သူက နတ်ဝိညာဉ်တည် အဆင့် ကျင့်ကြံသူဖြစ်ပေမဲ့ သူမ တည်ရှိမှုကိုတော့ လုံးဝအာရုံမခံနိုင်ဘူး။ ရှီးချိုး သူ့ဂိုဏ်းသားတွေကို မေးခွန်းထုတ်တဲ့အကြည့် ဝေ့ဝဲကြည့်လိုက်တယ်။ ဒါပေမဲ့အားလုံးက ကိုယ်စီ အံ့ဩနေတဲ့ အမူအရာလေးတွေနဲ့။

သူ့နှလုံးသား ချက်ချင်း နစ်မြုပ်သွားပြီး သတိကြီး ထားတော့တယ်။ သူက မိန်းမပျိုကို လှမ်းကြည့်ပြီး သူ့ နတ်ဝိညာဉ်အမြင်စက္ခုအနည်းငယ်ကို ထုတ်လွှတ်လိုက်တယ်။ သူ့နတ်ဝိညာဉ်အမြင်စက္ခုက သူမဟာ ဘာဝိညာဉ်ချီမှပိုင်ဆိုင်မထားဘူးဆိုတာ ပြနေတယ်— သေမျိုးတစ်ယောက်ပဲပေါ့။

ရှီးချိုး စိတ်သက်သာရာရပြီး သက်ပြင်းချတော့တယ်။ သူ စောနက အံ့ဩတကြီးဖြစ်နေလို့ သူမကို သတိမထားမိတာနေမှာ။ ဒါပေမဲ့ ရွှေအမြုတေအဆင့် ဓားသိုင်းကျင့်ကြံသူဖြစ်တဲ့ ယိချင်းက ဒီလိုသေမျိုးမိန်းမတစ်ယောက်ကို သူ့ဆရာအဖြစ်တင်တာ သေချာပေါက် ထူးဆန်းတယ်။ ဓားသိုင်းကျင့်ကြံသူတစ်ယောက်ရဲ့ လမ်းဟာ ခက်ခဲကြမ်းတမ်းပေမဲ့ သူ့အမြုတေ ရင့်မှည့်ပြီဆိုတာနဲ့ အနာဂတ်ဟာ အတိုင်းအဆကင်းမဲ့လိမ့်မယ်။ ဘာကြောင့် ဒီလိုမျိုးဆရာရွေးရတာပါလိမ့်နော်။

"မိန်းကလေး... ရှန်း" ရှီးချိုးက သူမကို အပြုံးတစ်ပွင့်နဲ့ နှုတ်ဆက်လိုက်တယ်။ သူမက သေချာပေါက် သာမန်လူပဲ။ သူထပ်တလဲလဲ စဉ်းစားကြည့်တော့ ဒီကလေးမဟာ ယိချင်း ကျင့်ကြံမှုတွေ မစတင်ခင်တုန်းက လူ့လောကဆရာဖြစ်နိုင်တယ်လို့ မှန်းဆမိလိုက်တယ်။ သူ မသေမျိုးတောက်လမ်းပေါ် လျှောက်ပြီးတဲ့နောက်မှာတောင် သူ့ဆရာရဲ့ကြင်နာမှုကို မမေ့နိုင်သေးတာက သူ့အကျင့်စရိုက်ရဲ့ မြင့်မြတ်မှုကို သက်သေပြလိုက်တာပဲ။ ဒါက ရှီးချိုးကို ယိချင်းကိုခေါ်ယူဖို့ ပိုပြီးတောင် အကြံရသွားစေခဲ့တာပေါ့။