ပျင်းနေပြန်တဲ့ကိုယ့်ဆရာ (ဘာသာပြန်)

အခန်း ၁၆၈ ။ ကောင်းကင်အလွန်မှကောင်းကင်များဆီ ဝင်ရောက်ခြင်း

168
အခန်း ၁၆၈ ။ ကောင်းကင်အလွန်မှကောင်းကင်များဆီ ဝင်ရောက်ခြင်း

လူတွေအများကြီးမို့ ရှန်းရင်နဲ့အုပ်စုက ကိုးလွှာနန်းတော်တံခါးများကို ဖြတ်သန်းဖို့ လဝက်ကျော် ကြာခဲ့တယ်။ အရပ်ဆယ်မျက်နှာလှေကာ တံခါးကနေ ထွက်လာချိန် ဆူညံပွက်လောရိုက်နေသံတွေ ကြားလိုက်ရတယ်။

ဓမ္မလက်နက်ကြီးတွေက သူတို့ပတ်လည်မှာ ရပ်တန့်သွားကြတယ်။ အရွယ်အစားမျိုးစုံ၊ ပုံစံမျိုးစုံ။ တချို့က ကြာပန်း၊ တချို့က စစ်တုရင်၊ တချို့က အမတစည်းတံဆိပ်၊ တချို့က သူတို့လို ရွက်လှေတွေ။ အဝေးကနေပြီး သူတို့တွေ အမတပုဂ္ဂိုလ်တွေ လှုပ်ရှားနေတာကို မြင်နေရတယ်။ သူတို့ကို အထဲကလောကနေ ခွဲခြားထားတဲ့ အင်းကွက်အစီအရင်ကြောင့် ရှင်းရှင်းလင်းလင်းတော့ မမြင်ရဘူး။ သူတို့ အမတဓမ္မလက်နက်တွေ ဘေးကဖြတ်သွားချိန် တစ်ခုချင်းစီက အရင်တစ်ခုထက် ပိုပိုပြီးကြည့်ကောင်း ခမ်းနားလာတယ်။ လေထဲက မသေမျိုးချီကလည်း အတော်လေး ပြင်း‌လာလေရဲ့။

ဒါပေမဲ့ ဘယ်လက်နက်ကမှ သူတို့ဟာလောက် အသစ်အတိုင်း သန့်မနေဘူး။ သူတို့ရဲ့ ရွက်လှေက ရွှေရောင်တောက်ပနေတယ်။ ထူးထူးဆန်းဆန်းအရောင်တွေပါတဲ့ ရွက်လှေတွေနဲ့ ယှဉ်ရင် သူတို့ဟာက အများကြီးပိုခမ်းနားတယ်။

အမတရွက်လှေတွေထိပ်ပေါ်က လူတွေက အစည်းအဝေးမှာပါဝင်ဖို့ ရောက်နေတဲ့ပုံစံနဲ့။ ဒါပေမဲ့ သူတို့က ဘယ်တိုင်းပြည်ကလဲနဲ့ ဘယ်ဧကရာဇ်လက်အောက်ကလည်းဆိုတာ မသေချာဘူး။ ကူယွဲ့ စဉ်းစားရင်း လှေ၈စင်းထက် ပိုနေတာ နားလည်သွားခဲ့တယ်။ ဒီလူတွေက သူတို့ထက် စောရောက်နေတာ အသိသာကြီး။ အချိန်နဲ့အမျှ အမတတွေက တခြားလှေတွေကနေ ပျံသန်းလာပြီး သူတို့ဓားတွေပေါ် စီးရင်း စကားစမြည်ပြောဖို့ပုံစံနဲ့ တခြားအမတလှေတွေပေါ် တက်သွားကြတယ်။ အဲဒါကြောင့် အားလုံးရှေ့ဆက်နေတာတောင် သူတို့ရွေ့နေတာ အတော်လေးကို နှေးနေတာပဲ။

အရပ်ဆယ်မျက်နှာရွက်လှေ ပေါ်လာတာနဲ့ လူတွေက ရပ်ပြီး စိုက်ကြည့်ကျတယ်။ တချို့တွေဆို လှေပေါ်ဘယ်သူရှိနေလဲစစ်ဖို့ အရပ်ဆယ်မျက်နှာလှေဆီ ကောင်းကင်စိတ်အာရုံတောင် လွှတ်လိုက်တယ်။ ဒါပေမဲ့ လှေပတ်လည်က အင်းကွက်အစီအရင်က ဒါတွေကို တားမြစ်ထားတယ်။ တစ်ခါတည်း လူတွေအများကြီး လှေကို လှည့်ကြည့်ကြတော့တယ်။