كانت فاتت سمانتين اصيل مخرجش بصح هذاك الرخيس خرج من الكوما بيسك فطن بصح يدو تعوق منها لأنو قاسوا العروق يستأهل المهم عندي انو ماماتش مش حبا فيه برك كنت خايف على اصيل كان مات راه صعابتلو القضية تاعو . أنا تقولولي وش حًوالك نقولكم راني في اختبار صعيب كثر خير ريان كانت صح تجي عندي بالمهدءات لي راني مزلت نقاوم في الادمان و المرض على خاطر خيطت من وجهي من ضربة تاع اصيل لبلاصة لي بين خشمي وشواربي تقطعت .نشفا كنا نهار الاثنين 16 جوان. جا مسلم فرحان قال ليماه صاي غدوة اصيل يطلقوه ، ناضت تزغرت و تحمد في ربي قالها بصح المشكلة في الخدمة قاتلوا علاه وش كاين قالها راح يوقفوه مدة 6 شهر وهبطوا في الدرجة قاتلوا معليش مهم يخرج برك ونشوفو ونكحل عيني بشوفتواً . ناضت توجد مكانش ماكلة مطيبتها هذاك النهار دارت صداقة خرجتها للجامع . كنا في ليل مجموعين على العشا حتى جا داخل علينا تبدل اللحية مش مسقمة كيما موالف لي ساغن. مام نظرتو مبدلة كل راحوا عندو يجرؤ يعنقوا ويسلموا أنا من بلاصتي متحركتش معنديش الجرأة نقربلو بعد هذاك الضرب ليطراس مازلوا في لحمي . نشوف معاهم كامل عنقوه وسلموا عليه جات راح تقدم عندو يماه بعد عليها مخلهاش اصلا توشيه قاتلوا اصيل ولدي علاه عليك ديرلي هك كبدتي كانت مشوية عليك ودرك متخلينيش حتى نعنقك ونشبع من ريحتك قالها ياك هدرتها من نهار لي غدرتيني مراني ولدك ما راكي يما انتي في حدك وانا في حدي قاتلوا افهمني اصيل وقتاش غدرتك يهديك ربي خبيت خفت عليك وشوف لي خفت منو صرا كان مش لمعارف والدراهم راك في 15 سنة حبس . قالها حياتي وانا حر فيها و فات عليها وكمل طالع . المشكلةجتى من أنا مشافش خلاص جيهتي كأني شفافة . معنتها حتى أنا من الناس لي خرجهم من حياتوا حتى أنا لازم نتعاقب بيسك خبيت عليه . نشوف فيها راحت طلعت لحقاتوا حتى نسمعوا في العياط والتكسار وهيا تقولوا. هذا الشي لي راني نهدر عليه اصيل انت من نهار جات وانت هكدا المشاكل مخطاتكش بناقص منها مكانش غير هيا في الدنيا ادا على الوعد لي وعدتوا لفطيمة قبل ما تموت ربي يغفر ويسامح .قالها وش من وعد يما متفهميش انتي ، صاي روحي عليا مانيش حاب نغلط معاك . خرجت من عندو وخبطت لباب جات ديراكت عند خالي قاتلوا اهدر مع ولدك انت مطيش كلشي عليا بزاف عليا بزاف .وراحت . خالي من نوع المهم اخطوني من المشاكل ما رجعلها لا شاوية لا عربية . طلعت كنت ناوية نروح لشمبرتي ديراكت ونفوت عليا المشاكل . بصح غير فتت قدام باب شمبرتوا مقدرتش نحكم روحي دقيت عليه زوج مرات مرجعليش فتحت الباب ودخلت لقيتو لتم وين خرج من الدوش لابس شورت وحاط البشكير على رقبتوا .شاف معايا قالي اخرجي عليا قتلوا اصيل قالي روحي انتي ثاني منيش باغي نغلط فيك كيما المرة لي فاتت . قتلوا حبيت نهدر معاك قالي معندك حتى هدرة معايا من هنا وجاي تشوفيني تبدلي الطريق قتلوا علاه راك ديرلي هكدا مكفاش وش درتلي قبل نفكرك شوف وجهي شوهتني وش مزال اكثر من هكا . قالي وقليل فيك تستاهلي اكثر من هكدا . قتلوا هذا برك كي خبيت عليك .قدملي علاه انتي خبيتي عليا حبة حلوة قولي خليني واحد ملقط جيعان ك### كيما هذاك يشوفك ويصورك يتمسخر بيك دارك لعبة عندو شوفي روحك كيفاش وليتي .بكيت قتلوا عندك الحق تمسخر بيا علابالي بصح مش بيدي كنت خايفة كنت وحدي انت روحت وخليتني هنا يك قتلك أديني معاك هنا كأنو كامل كل واحد لاهي في روحو . قالي راكي تلقاي في سبايب علابالك بيا كان قلتيلي نجيك حتى وكنت تحت الأرض كان حكيتيلي علابالك بيا عمري كنت نسمح فيك نوقف معاك حتى وانتي ظالمة ياك ولالا . درتلوا براسي ايه بيسك صح شحال من مرة وانا ظالمة لقيتوا واقف معايا .قالي انتي كنتي باغية هكدا قوليها ديراكت جوليا انتي تحبي تأذي روحك جوليا ، انتي لي خليتيهم وصلوك لهاد الحالة لي راكي فيها انتي لي بغيتي هكدا أنا صاي مليت منك كيما درت معاك مخرجش عليك مذابيك تبعديني لي كنت محتاجوا منك ديتو هذيك الليلة والباقي لي راني ندير فيه على وجه يماك متساعدنيش وحدة كيما انتي في حياتي . قتلوا وش قصدك . قالي لي فهمتيها من نهار لي جيت ولقيتك لابسة خاتم تاع راجل غيري وليتي عندي كيما انتي كيما اي طفلة فهاد الدار ولي تسحق تكون مرتي متكونش كيفك .طحت ديراكت نبكي بهستيريا حتى خلعتوا بقا يشوف حار من بعد طبس وقفني يعيط علاه راكي تبكي درك من لول علابالك بلي راح تفض هكا علاه ## لبكا اهدري ياك انتي لي سمحتي لولة علاه راني نهدر معاك .كنت نبكي في بكا تاع مهابل والله المشكلة مش بإرادتي حبس الهدرة بقا يشوف فيا لاحظ بلي لبكا تاعي C'est pas normal . قدم عندي عنقني قالي خلاص حبسي البكا .مسمعتوش أصلا بقا معنقني يشوف معً وجهي يدو على خدي يمسح فيه ويقولي حبسي البكا حبسي جوليا . مقدرتش بعدت وجهي عاود حكمهولي قالي شوفي فيا ، شفت معاه قالي خلاص راني معاك علاه تبكي حبسي صاي .نطقت بسيف منيش قادرة نحبس . قعدني في الأرض وخرج شوي ورجع في يدو الدوا وكاس تاع ما طبس فتح حبة تاع دوا عطاهالي حكمتها عليه حطيتها في فمي وقربلي الكاس تاع الما شربت منو شوي وبقيت قاعدة هكاك نبكي حاولت نحبس مقدرتش وليت بالشهقة اول مرة نحس روحي منيش قادرة نتحكم في روحي كي شافني مقدرتش نحبس قعد قدامي عاود عنقني . بحالتي هادي راني زدت كونفيرميتلوا بلي أنا صح كيما قال عليا . شوي وراحت عليا بقيت مرة على مرة تشهق من بعد شغل فطنت مع روحي كان معنقني مش لابس من فوق تصدقوا خفت منو تفاصيل هذيك ليلة مزالو في راسي خفت يعاودلهالي بعدت عليه شاف معايا قالي راحت عليك درتلوا براسي ايه جا راح يعاود يقدملي بعدت شاف معايا راكي خايفة مني وقفت قتلوا لا برك حابة نروح لشمبرتي وخرجت .
