هزيت الكابة خارجة لقيتوا دخل وغلق الباب قالي وش شي لي درتيه لتحت كيفاه أنا نقول كلمة وانتي تعكسيها قتلوا علاه شكون انت حتى نسمع كلامك متعنيلي والوا . قالي بصح انتي تعنيلي علابالي راكي درتيها مكرة على هدرتي بصح احسني عوني لي صرا مكانش صعيب غير عليك انتي وإذا حبيت أنا والله ما تخرجيها من هاد الدار كون يجيب حتى شكون يجيب ماعندو ما يقضيلي .قتلوا علابالي بصح أنا راني حابة نروح أصلا وش نعنيلك أنا من غير وحدة بنت حرام وراك تلعب بيها كيما تحب ولا راني غالطة . جبدني عندو قالي وش راكي تقولي انتي علابالك وش تعنيلي جوليا . قتلوا بصح مش هدرتك تاع لبارح هادي .قالي راكي تلقاي في سبايب غير شفتيه نسيتي كلش . قتلوا ايه نسيت كلشي خليني اصيل نروح معاه بالاك نلقا راحتي وشفايا معاه .تنهد قالي ديري لي يعجب أنا المهم عندي نشوفك مرتاحة إذا حابة تروحي روحي بصح ، إذا واحد غلط برك وقاسك بكلمة تهزي حوايجك وتعيطيلي نخرجك بسيف عليهم قاع وواحد ما يقدر يمنعني . قتلوا علابالي حكملي وجهي بين يديه قالي متحكي لحتى واحد على حالتك ياك ، لازم واحد ما يسمع بشي لي صرى معاك ومثيقي في حتى واحد ياك . درتلو براسي ايه كمل هبط راسو حاب يبوسني بعدت عليه شاف معايا قالي مزالكي خايفة مني ؟؟ درتلوا براسي ايه مزال ما نسيت الشي لي درتوا فيا قالي معليش يجي نهار وترجعيلي ، المهم كي نعيطلك تهزي عليا ومتخرجيش بلا ما تقوليلي . عاود قدم عنقنا شوي وطلقني هز الكابة تاعي وهبط شفت مع الشمبرة علابالي راح نتوحش كل بلاصة في هاد الدار غلقتها وهبطت لقيتوا واقف مع بابا يوصي فيه عليا جاو عندي لبنات ونسا خوالي يودعوا فيا تصدقوا كامل دمعتهم على خدهم مكنتش نتوقع راح نكون عزيزة عليهم قاع هكدا حتى لولاد سلموا عليا كامل يوصوا ويعاودو سيرتوا مسلم و وسيم ومروان تحسي صح أختهم وراهي رايحة تبعد مهم فاتت بسيف حتى خرجنا ركبت مع بابا شفت اصيل ركب في طنوبيلتوا لاحقنا والله لا ثقيلة على قلبي هاد الخرجة من الدار بصح لازم نبعد بالاك نتعافى بالبعد وننسى شوي وش صرى فيا . المهم وصلنا لدار لبابا. دخلني كانواخياتي زوج ولاد وبنت اقل مني يقراو في ليسي يشبهوني الحق فرحوا بيا بصح مرتوا حكات معايا فوق القلب يعني شعور متبادل مام أنا محملتهاش تبان شرانية . قعدت في الشمبرة مع اختي في عمرها 16 تبان عاقلة أصلا من لي جيت عندهم تخرج الصباح وتجي عشية تقرا . السمانة لولة فاتت عادي صح مرت بابا تهدر بالثقالة معايا بصح بابا يحاول بكل الطرق يعوض على ليمات لي فاتوا كان يخرجني معاه ندور برة يديني للسوق يقولي اشري وش حبيتي لبرة من يفوت على صحابوا و الجيران يقلهم هادي بنتي لكبيرة كانت عايشة عند جدودها ودرك رجعت تعيش عندي يقولي باه يعودو يعرفوك ولا يجيك مكتوب يعرفوا انتي بنت شكون . المهم فوّتت معاه ايامات كيما كنت متمنية على الأقل حققت حاجة كيما كنت متمنيتها . اصيل كان كل يوم يعيطلي نحكي معاه حسيت علاقتنا أنا وياه بدأت ترجع كيما كانت . هنا عرفت روحي درت قرار صحيح كي بعدت عليه حالتي نفسية تحسنت بزاف بديت نحب لحياة بديت نخمم في مستقبلي بابا قالي نمدلك دراهم وافتحي مشروع تاعك اي مشروع دراهم باباك كائنين نمدهملك مدام عيني حية مندريش على هاد الدنيا وش مخبيه على الأقل اضمني مستقبلك في هذيك الليلة بعد جابلي 400 مليون حطهالي في يديا قالي مدام مش هازة لقبي مش راح تقدري تورثيني نمدهملك في حياتي . محبيتش نقبل بصح كي زيرني قبلتهم في ليل هذيك نسمع فيه يدابز مع مرتوا . لغدوة صبح في حالة قالي منيش قاد نخرجك ليوم أرواحي اقعدي معايا قعدت معاه هذاك النهار في ليل زاد عليه لحال هزو نسابوا للسبيطار أنا ما فهمت والوا شفتوا في حالة منقدرش نوصفهالكم مسكين كان اصفر اصفر ودايخ كي جيت راح نروح معاهم حتى أنا قالولي لا انتي في دار مع خاوتك عسيهم . خرجوا راحو وانا عيطت لأصيل نبكي قتلوا بابا داوه لسبيطار مريض .قالي نجي عندك قتلوا لالا مكان لاه دوك يرجعوا راني مع خاوتي .كوبا شوي وعاودلي قالي افتحلي الباب . فتحت عليه غير شافني عنقني كنت في حالة تفكرت ماما ربي يرحمها هذيك الحرقة منيش باغية نعاود نعيشها قتلوا مخلونيش نروح معاه قالي عندهم حق شا تروحي ديري وزيد لازم شكون يقعد مع خاوتك ديجا راهم خلعانين حطيت راسي على صدرو قتلوا كون يموت كيفاش ندير أنا علاه يعني كي عرفتوا وحبيتوا وسامحتوا يمرض ويموت قالي استهدي بالله هذا ابتلاء ولازم تحكمي في ربي وكثري من الدعاء والاستغفار لي مكتبها ربي هذيك هي . قتلواً ونعم بالله . قعد معايا حتى جاو بصح بابا بقا في السبيطار .بصح مرتوا غير شافت اصيل قاتلي غير فرغت عليك الدار دخلتي علينا راجل . جيت راح نهدر هدر اصيل في بلاصتي قالها بنت عمتي وجيت نشوفها كانت خايفة وحدها عندك مشكل قاتلوا علاه تخاف باك مع خوتها وانا متساعدنيش تدخل راجل على بنتي صبية . قالها منيش حاب نطيح معاك القدر شاف معايا قالي راني رايح تجي معايا ولا تبقاي هنا قتلوا نبقا حتى يخرج بابا . راح خارج لحقتوا قالي هادي ديما معاك هكا قتلوا لالا بصح مين ذاك منعرفلها تتحول قتلوا أستنا دقيقة راني جاية جبتلوا الدراهم لي عطاهملي بابا مديتهملوا قالي وشنو هذا قتلوا دراهمي حقي عطاهملي بابا نحي منهم حق عملية ماما ربي يرحمها وحق دراهمك لي ديتهملك والباقي خبيهولي عندك .تبسم قالي عبالك بيا ميهمونيش الدراهم تهميني غير انتي وصحتك برك حط يدو على شعري بعدلي فيه قالي كي نشوفك هكدا كلشي يهون .
