طلعت لشمبرتي قابلتني. الكوافاز هزيت قرعة باغفان رميتها تكسرت كامل .شوي وصدمو كامل مخلوعين غير دخلو زدت رميت فاز على مراية تاع الخزانة جا عندي حكمني على ذراعي علاه راكي تكسري قتلوا ياك انتم راح تحطوني في سبيطار لمهابل خلي تشوفو هبالي تاع صح مالا . طلقلي ذراعي قالي كسري وش تحبي . اي حاجة تاع زجاج في شمبرة كسرتها الباقي راحو بقا غير هو مربع يديه و يتفرج عليا حتى تعبت وقعدت. شاف معايا قالي صاي كملتي هبالك هنا وين زدت اكدتيلي بلي صح خصك سبيطار . شفت معاه اصيل تعيش منقدرش نعبدعلابالي بروحي نفشل قالي حتى هنا متقدريش شوفي وش درتي هاد الحالة تاع وحدة راهي في عقلها ، هادي آخر هدرة عندي وجدي روحك غدوة صباح تروحي مع ريان توصلك متخافيش هيا تتهلى توصيهم عليك . ودار خارج عفست على خوفي لحقتوا عنقتوا على ضهرو قتلوا تعيش اصيل منيش باغية نزيد نبعد عليك ياك كي بعدت عليا شفت وش صرى فيا ولا خلينا المرة هاذي نروحو أنا وياك بلاصة بعيدة معاك انت نقدر ندير اي حاجة علابالي معاك نقدر نرجع كيما قبل . تنهدت ودار عندي قالي علابالك تعبتيني جوليا ما لقيت حتى حل معاك ، أنا صاي تعبت منك منيش باغي نشوفك بالحالة هادي ومش بالساهل ننسا وش صرى جوليا صاي واه واصلة معايا لآخر أنا ثاني باغي وقت ننسى فيه وش صرى علابالي كان تبقاي مقابلتني كل ما نشوفك نتفكر ونفرغ غشي فيك . غدوة تجيك ريان روحي معاها صاي . وخرج صاي فقدت آخر أمل ليا هادي هيا نهايتي هكدا فوتت نهار البكا لي غايضتني على قد ما حاولتو مبدلش رأيوا تقول كان يستنى فيها الغدوة التسعة جات ريان بقيت نتكسل نجمع في حوايجي في الكابة ونقول بالاك دوك يبدل رايوا بالاك نغيضهم بالاك يحن والوا . كملت بصح تقول حاجة قاعدة توخر فيا كي يعود ربي مكتب حاجة تصرى مع هبطت لتحت دمعة على الشفر تغيض حالتي جات اسمهان تسلم عليا وتوصي فيا تهلاي في روحك وهما كامل واقفين وواحد ماقال لالا مش لازم تروح ولا مسكينة والوا واقفين ساكتين وهداك غير يشوف حواجبوا مقرونين حتى سمعنا الباب ولعياط تاع رجال يعيطو لخالي وحيد . راح هو فتح الباب نسمعو فيه يقولوا وش نحتاج معندك حتى حاجة هنا متخلينيش نطيحلك قدرك قدام الناس وواحد يقولو يا اصيل ولدي خلي نتفاهموا بالعقل على وجهي أنا لي جيتك حتى لباب الدار ، زاد خرج خالي كيفكيف غير الهدرة . شوي ودخل قالنا ديرو طريق رجال داخلين وشاف معايا قالي انتي اطلعي لشمبرتك ومتهبطيش. وقال لأسمهان اطلعي معاها اقعدي . أنا ما فهمت والوا ياك كنت رايحة علاه يقولي اطلعي طلعنا أنا وختي قعدنا بصح نسمعوا في العياط الدار مقلبة تحت باين حاجة كبيرة قلت لأسمهان نهبط في دروج برك نسمع وش كاين ونرجع . هبطت للدروج نسمع في واحد يقولهم بنتي نديها منكم بال قانون ولا بلا قانون راني مستعرف بيها بنتي . وخالي يقولو وهيا قاتلك منحتاجكش مش قابلة حتى تشوفك بعد هاد السنين كامل جاي تديها بساهل . نطق راجل آخر قالوا اسمعوني أنا لي نعرف شرع ربي ونبي وراني قاري وفاهم القران والسنة من حقوا يطلب بنتوا ويطلب منها السماح والباقي يرجع ليها هيا إذا تقبل ولالا . قعدت في دروج مقدرتش نوقف حطيت يدي على فمي مشوكية يعني لي تحت راه بابا وجاي حاب يشوفني لحقتني اسمهان كي لقاتني على هديك الحالة قاتلي وشبيك جوليا تحوسي يخرج اصيل ويشوفك هنا تصنتي عليهم . قتلها اسمهان بابا لي راه هنا . قاتلي انتي وش راكي تهدري قتلها والله اسمعي وش راهم يهدرو .بقات تسمع من بعد شافت معايا قاتلي صح !! وقفت من بلاصتي حكمتني قاتلي وين رايحة قتلها رايحة نشوفو . حبستني تشوفيه نورمال بعد كامل وش صرى فيك مزالكي حابة تشوفيه واصلا اصيل يدير فيك حالة ادا دخلتي عليهم . قتلها علاه ما دارش حالة كي كانً راح يبعتني لسبيطار لمهابل . كملت هبطت فتحت الباب ودخلت كانوا مقابليني ثلاث رجال بصح عرفتوا تقولولي كيفاش نقلكم عرفتوا هكدا بقلبي حسيت كاني حياتي كامل نشوف فيه رأسوا ابيضّ بالشيب يبان طويل بصح ضعيف ويبان تاعب ولا مريض .حتى هو غير شافني وقف وقدم عندي قالي بنتي انتي بنتي يا ربي شحال تمنيت نشوف بقا جاي جيهتي غير وصللي قالي شحال راني حاب نعنقك ونشم ريحتكً نطلب منك السماح وتعيشي تحت سقفي في داري ونموت وانا متهني عليك قلبي . كان راح بعنقني حكملوا يدو اصيل قالوا يدك متحطهاش عليها . شاف معايا اخرجي انتي . دموعي ويدان مقدرتش نهدر يا ربي هاد اللحظة تشوفو شحال تمنيتها نبات نحلم بيها كانت من الأحلام لي مستحيل تتحقق كنت نقول منيش راح نسامحوا مستحيل نشوف فيه نقولو كلمات في قلبي من جيهتوا نلوموا علاه خلاني علاه رماني علاه سمح في ماما علاه دار فينا هكدا علاه ضيعني بصح درك مقدرت نهدر حتى كلمة خانوني الكلمات وش نقول وش نخلي لي كيما حالتي يحسوا بيا الإنسان لي كان ناكرني حياتي كاملة جا ليوم ويحوس عليا ويبكي علجالي لي كان ناكرني جا عندي يطلب في السماح ويطلب في رضايه ويعوضني .ترميت في حضنوا وبكيت كيما جامي بكيت . هادي أقصى حاجة قدرت نديرها وخرجت مني بلا ما نحس حسيت روحي رجعت ب10 لور لطفلة هديك لي كانت كل ليلة تدعي في ربي يجي باباها وتحضنوا وتبوسوا . غير حضنتواً طرشق بالبكا مقدرش قريب ما طاح بيسك أصلا من شكلوا يبان بلي مريض حكموا اصيل قعد على ركبيه في الأرض وانا معاه بقا غير يقول في كلمة وحدة ولي هيا اسمحيلي يحاول فيا يبوس في من جبيني ويديا ويقولي اسمحيلي خليني نموت هاني . نص ساعة وهو في هذيك الحالة غير يطلب في السماح ويقولي شحال ندم وشحال حوس عليا وشحال من مرة جا وكانوا يسحتوه . نكذب عليكم غير شفتوا صاي سامحتوا غير شفت دموعوا كي شافني صاي كلشي من جيهتوا تنحى قتلوا سامحتك غير شفتك صاي . مسح دموعوا فرحانً وقف ووقفني ضحك قالي بنتي زينة ومرا وفحلة ، نوضي من ليوم تروحي معايا تعيشي عندي مع خاوتك راه هابلين باغيين يشوفوك راهم يستناو فيك هادي شحال منً حكيتلهم عليك . جبدني اصيل من قداموا دارني وراه قالوا ياك شفتها صاي طريق سلامة جوليا بلاصتها هنا معندها وين تروح معاك قالوا بابا بنتي تروح معايا خليني نعيش معاها ليامات لي بقاولي من حياتي تتعرف على خاوتها قالوا قتلك جوليا من هاد الدار متخرجش حاب تشوفها كل ليوم تجي هنا وتشوفها أما باه تديها معاك مستحيل . خرجت من ورا ظهرو قتلوا بصح أنا حابة نروح معاه شاف معايا مصدومً قالي وش راكي تقولي جوليا مسحت دموعي وحكمت في يد بابا قتلوا كيما سمعت أنا راني حابة نروح معاه أصلا أنا كنت خارجة منها هاد الدار . بقا يشوف من بعد قدم راح يحكمني زعما باه ميخلينيش نروح. بعدت قتلوا كيما انت كرهت مني ومراكش حاب تشوفني أنا ثاني كرهت وباغية نروح مع بابا معندك حتى حكم عليا . قالي راكي ترجعيلي فيها . قتلوا افهمها كيما حبيت أنا منيش باغية نزيد نبقى هنا . قالي بابا روحي بنتي جيبي حوايجك نروحو راني نستنى فيك هنا ومكانش لي يمنعك . خرجت وطلعت لشمبرتي قابلتني الكابة تاعي سبحان الله ربي لي كاتبها هيا لي تصرى هاد الكابة نفسها لي كنت رايحة بيها للسبيطار ودوك راني رايحة بيها لدار بابا لي كانت في الحلم ومستحيل يتحقق .
