Seperti dijanji, keempat2 sahabat baik itu berkumpul di bawah pokok ceri di halaman surau selepas solat Maghrib.
AMRAN: Camno?
RAZAK: Sapo nak mulo dulu?
SALIM: Tak kisah la sapo pun.
LEMAN: Toruih torang den koba, den tak dapek buek keputusan sendiri. Den mintak maap siap2 la yo.
RAZAK: La.. Tak selosai camtu Man. Kono la putuih an boto2.
LEMAN: Den bukan tak pikir apo2. Cumo yg den dapek pikir.... Alamak payah nak cakap la.
RAZAK: Ekau ni Man.. Kut dopan Acik Shidah osah lancar eh ekau bercakap.
SALIM: Dah, dah.. Bak den mulo an. Bagi den, den tak kisah pogi ko tak. Selain dari den, ado lagi 3 org. Ekau, ekau, mo ekau. Jadi den putuih an, kalau la ekau bertigo sumo nak pogi,den ikut pogi. Kalau tigo2 tak pogi,den ikut tak pogi. Kalau ado yg nak pogi,ado yg taknak, den akan ikut yg sikit. Makno eh, samo ado kito ompek2 samo2 pogi atau sumo tak pogi atau duo pogi,duo tak pogi. Itu yg den pikir. Jadi keputusan den bergantung pado keputusan ekau bertigo.
RAZAK: Uih.. Buleh ko camtu?
LEMAN: Sebona eh den pun pikir lobih kurang camtu. Den nak ikut Am. Sobab dio buleh bawak van. Kalau Am tak pogi, apo caro eh den nak pogi kojo nanti..? Jadi kalau kau pogi Am, den ikut. Kalau tak, den pun tak pogi la.
RAZAK: Adui.. Den pun pikir camtu Man. Camno lak tetibo gelombang otak kito samo ni?
AMRAN: Woi.. Mano buleh camtu. Kut camtu gayo eh, jadi den la kono buek keputusan.
RAZAK: Iyolah..
SALIM: Kau lak pikir camno Am?
AMRAN: Sebona eh den pun pikir lobih kurang samo jugak. Bergantung keputusan Salim. Sobab den nampak ekau yg payah sikit nak tingga an keluargo. Kau kono jago adik2 kau kan?
SALIM: Den dah bincang mo omak den. Dio pun tak kisah. Mano2 pun elok yo bagi dio. Kalau den tingga kek rumah, buleh jago adik2. Tapi kalau den ado kojo totap, ado jugak pendapatan totap. Pokok dek den la keteh. Menghalang tidak, menggalak pun tidak.
RAZAK: Nampak eh ikut keputusan kau la Am.
LEMAN: Boto tu. Lagipun van tu Abg Tapa dah lopeh an kek kito utk jago. Ansuran eh nanti kito yg kono bayar.
SALIM: Tapi tak semesti eh kito kono kojo kek Kentaki. Ado van tu, macam2 kito buleh buek. Bawak budak sekolah, bawak hasil2 kampung jua kek pasar tani, buek sewo pun buleh..
Jelas bahawa Razak, Salim dan Leman sudah ada keputusan. Namun keputusan mereka sepenuhnya bergantung pada keputusan Amran. Hujungnya, Amran juga yg perlu pikul beban membuat keputusan. Amran tepuk dahi di dalam hati.
