- يابنتي بطلي تدلعيه بالشكل ده
-طب اعمل ايه؟ افتحله دماغه أول ما يرجع من الشغل ؟
-لا يا ناصحة، كل اللي هتعمليه انك تبطلي تعمليله كل حاجة هو مش صغير يا رحمة| قومت من جمبها ودخلت جيبت طبق الكنافة بالقشطة
-اتفضلي
- ودا كمان تبطليه الله يباركلك
- مالها الكنافة كمان؟
-يابنتي متخرجنيش من شعوري، إنت مش خدامة افهمي انت مش مامته ومش الدادة بتاعته بصي لنفسك بقيتي عاملة ازاي| كانت بتتكلم بعصبية وبتبصلي بشفقة في نفس اللحظة سمعنا صوت آدم بيفتح باب الشقة
- بصي لنفسك إنت يا نور أنا مراتي زي القمر | بصيتله وضحكت وقومت جريت خدت منه شنط الشيبسي والمولتو اللي في ايديه، دخل أوضتنا فإستأذنت من نور ودخلت وراه
- وحشتني | كنت بكلمه وأنا بقلعه الشراب زي ما كنت بعمل لبابا الله يرحمه في بيتنا قبل ما نتجوز، معرفش ايه المشكلة ان وقت ما جوزي اللي بيطلع عينه في الشغل علشاني يرجع أبقى بحاول أريحه، أعوضه تعب اليوم، أحسسه إني جمبه واني مقدرة تعبه ومش عاوزاه يمسك ورقة من ع الارض!
- يا حبيبتي متتعبيش نفسك، عملتي أكل صحيح؟| قعدت جمبه وأنا ببصله بأسف
- والله يا آدم نور عندي من الصبح ومقعداني جمبها
- كويس أوي أنا كدة كدة طلبت أكل من برا وأنا جاي وشوية وهيوصل قولت اريح حبيبي النهاردة من وقفة المطبخ
سيبته يغير هدومه وخرجت لنور
- نيمتي النونو الصغير بتاعك اللي ياحرام مبيعرفش يقلع لواحده؟ | مش عارفة ليه اتعصبت بالشكل ده على نور، مش مسموح لأي حد في العالم انه يهين جوزي، انه يقلل منه او يسخر من علاقتنا بأي شكل من الأشكال!!
- من فضلك يا نور متتكلميش عنه بالشكل ده أنا مش حابة الطريقة دي.. عايزة تنصحيني تمام بس بعيد عنه تمامًا
- مقصدش يا رحمة بس أنا نفسي أشوفك مرتاحة
- راحتي وقت ما آدم يكون مرتاح قصاد عيني ومطمن، آدم طالب أكل اقعدي اتغدي معانا لو مش متأخرة | نور مشيت وأنا متأكدة انها زعلانة مني وبشكل صعب.. بس غصب عني مبحبش أي شخص يتعدى على مساحتي الشخصية، ماحدش مسموحله يقولي اتعامل مع الراجل اللي شايلني فوق راسه ازاي.. طبيعي أشيله فوق راسي أنا كمان دا يضايق العالم في ايه؟!
الأكل وصل وكنت قاعدة في حضنه، شعور دافي وغريب على الانسان وقت ما بيوصل للنقطة دي.. أي خلافات في الدنيا أو أزمات تهون قصاد لحظة دفا واحدة في بيتك اللي اختارتي كل متر فيه على ذوقك مع شريك حياتك اللي قررتوا تكونوا عيلة جديدة سوا.. الجواز هيفضل من وجهة نظر البشر الأسوياء.. " أهم وأدفى إنجاز ممكن حد يعمله"
- آدم؟
- قلب آدم؟
- عاوزة أرجع لشغلي وكنت مأجلة الموضوع لحد ما شغلك ومشاكله تستقر| بصلي بعدم فهم واضطراب واضح على ملامحه
- طب وأنا يارحمة؟ | كان بيحضن إيدي وكأني مامته!
آدم أهم راجل في الدنيا فعيوني وشخص ناضج ومحترم بس هفضل طول الوقت سامعة هزاره وغلاسة الاطفال اللي بنغلسها على بعض.. هفضل شايفاه ابني اللي لسا مخلفتوش
- إنتَ في عيوني يا حبيبي هو أنا ههاجر؟| حاولت أتكلم بهزار علشان النقاش يعدي بسلام، يمكن من أكتر عيوبه اللي بحاول أتعايش معاها.. انه عصبي ومبيعرفش يتناقش.. اتعود انه يقول وأنا أنفذ.. يمكن دا مش عيب.. هو عنده خبرة في العالم أكبر مني.. وأنا عندي مشاعر وعاطفة أكتر منه والبيوت السوية بتقوم على كدة.. يمكن مكنتش فاهمة الكلام دا قبل ما اتجوز.. يمكن كنت عنيدة وصوتي من دماغي.. بس هو وراني الدنيا بعيونه وطول الوقت بيشتري خاطري.. ومن وقتها وأنا مستعدة أبيع عمري وأشتريه هو.
- ناقصك حاجة في البيت؟
- ناقصني أوحشك أكتر؛ يعني هروح الشغل ٥ ساعات بس كل يوم علشان نوحش بعض شوية فلما نقعد سوا بليل نتبسط اكتر واكتر| بصلي وشدني في حضنه وهو بيضحك
- بتضحكي عليا بكلامك الحلو زي عادتك مش كدة؟
- وكل مرة بتشربها زي العبيط
- في بنت محترمة تقول بتشربها؟ | ضحكنا واتفرجنا على أكتر فيلم بنحبه من يوم ما عرفنا بعض.. كل مرة بنشوف هاني سلامة وهو بيحاول يوصل لحلا شيحا بكل الطرق في السلم والتعبان.. نشبك ايدينا ونفتكر أيام زمان وبداية علاقتنا
- طبعًا رفض
- يابنتي هو واكل ورثك؟ قوليلي عادي متتكسفيش!
- انجزي وافق انك تشتغلي ولا رفض زي كل حاجة بيرفضها؟
- لا يا ابليس وافق موتي بغيظك بقى| ضحكت وقومت جيبتلها ترمس
- برضه يا رحمة؟
- يا بت هو الترمس حرام؟
- لا الدلع الماسخ والافورة هي اللي حرام
- احنا ناس ماسخة خليك في حالك انت يا سكر
- طب احنا مسافرين دهب اسبوع، وبما ان عيد ميلادك بعد يومين فهتستأذنيه و هترجعي رحمة صحبتنا كدة وتتعدلي وتخرجي من دور ست البيت المطيعة اللي عايشالنا فيه دا ولا لا؟
- اسبوع؟ حتى لو آدم وافق ودا مستحيل أنا مش هعرف اسيب البيت واسيب آدم اسبوع !
- ليه الرضعة مش هيعرف يغليها لنفسه؟| بصيتلها بعتاب
- خلاص يا رحمة أنا آسفة بس إنت بتعصبيني
- خلاص يا نور مافيش مشاكل اطلعوا انتوا وخلوني أنا مرة تانية
- تمام يا رحمة براحتك
منكرش اني كنت زعلانة، بس أنا نفسي معرفش اغيب عن بيتي وعن آدم اسبوع!! فضلت مستنياه يرجعلي من الشغل.. كنت محضراله طاجن اللحمة اللي بيحبه وعاملاله الحلويات اللي مبيحبش ياكلها غير من ايديا
- راجع هلكان أوي يا رحوم| شكله كان متغير ، منكرش برضه اني زعلانة انه ناسي عيد ميلادي بس عذرته، يمكن عنده مشاكل في شغله.
- الف سلامة عليك، هتاكل؟
- هتاكل! مالك يا حبيبتي زعلانة مني في ايه بس؟
-مافيش حاجة
- لا مش هاكل ينفع بقى تحكيلي مالك يا مدام؟
- آنسة لو سمحت
- أومال أنا هنا بعمل ايه طيب؟ هتصغرونا ليه كدة؟ شوارع بنقفلها فوقي | ضربته في صدره وأنا بضحك
- مش ناسي حاجة؟| خبط بإيده على راسه
- يا ربي ازاي نسيت أجيب فينو ولبن
- آدم متستهبلش
- مالك يا بطل بس مين مضايقك وأنا أروح اكسرلك دماغه
- إنتَ
- المسامح كريم برضه ما أنا مكنش لازم اتحمق اوي كدة
- طيب هزر انت وأنا داخلة أنام
بقالنا سنة متجوزين ويمكن دي أول مرة تحصل وأنام من غير ما أكون في حضنه.. كنت بفكر إزاي ينسى يوم مهم زي دا؟ يمكن مبقاش يحبني؟
- آدم| خرجت من الأوضة لقيته مبهدل الريسبشن وقاعد بيلعب
- جاتا تاني ؟
- اسمهما GTA يا ام جهل
- ده حرامي العربيات وأنا عارفاه كويس متحورش
- منمتيش ليه؟
- أنا مسافرة
- لا حلوة وجديدة
- أنا قررت
- صوتك طلع اهو وكبرنا وبقى لينا قرارات
- مبهزرش
- اتمسي يا حبيبتي بدل ما تزعلي جامد
- تمام أنا قولتلك أهو علشان بس تبقى عارف ومتتفاجئش
دخلت الأوضة ورزعت الباب ورايا وقررت اني هسافر بكرة غصب عنه.. أنا خلاص من هنا ورايح هاخد قراراتي بنفسي
-صباح الخير يا حبيبي إنت لسا مروحتش الشغل!
- لا يا ستي قعدت علشان احضر معاكِ شنطتك
- اي دا بجد؟ يعني موافق اني اسافر!
- هوديكِ عند اهلك ومن هناك اعملي كل اللي نفسك فيه | كان بيتكلم وملامحه مبتدلش انه زعلان ولا فرحان؛ مفهمتش جملته ولقيته فعلا محضرلي الشنطة وحاططها جمب باب الشقة
- يلا البسي
لبست وأنا مانعة نفسي من العياط بالعافية، مكنتش فاهمة اي اللي بيحصل، كنت حاسة بخذلان رهيب.
ركبنا العربية وماحدش فينا كان بيتكلم مع التاني، فات شوية وحسيت انه ماشي في طريق غلط
-انت رايح فين؟ دا الطريق الغلط
- رايحين لنور علشان ناخدها ونسافر دهب نحتفل مع صحابك بعيد ميلاد أجمل ست في العالم| كان بيتكلم وهو بيبوس كف ايدي، كنت حاسة اني لامسة السما بإيديا.. العلاقات الانسانية مش معقدة.. بسيطة.. وجميلة وقت ما كل طرف بيقرر يبذل كل طاقته علشان يسعد الطرف التاني
- إزاي ؟ قصدي كل مرة بتعملي مفاجأة وازاي أنا مباخدش بالي ؟!!
- وكل مرة بتشربيها زي العبيطة
- فيه راجل محترم يقول بتشربيها؟
" حتى وإن لم تكن لي؛ فأنتَ لي رغمًا عن كل ما يبدو"
#حكاوي_رحمة_الحداد
