_هو أنا ممكن يعني أقولك مبروك؟
لفت وشها بخطفة كده كإن تلج نزل على دماغها_أفندم!
بإحراج_مبروك.
_أيوة على إيه بقى؟
_علشان امتحاناتك بكرة وكده بما إنك ثانوية عامة يعني!
"بَصتلي بَصة قدرت بكُل سهولة أفهمها اللي هو كانت عنيها هتنطق خلاص وتشتمني بس لفت وشها وسابت المكان ومشت"
دايمًا بنزل أجري كُل يوم الصبح على البحر ودايمًا بشوفها كُل يوم حاطه كتاب جمبها ويا باصة فيه يا بتعيط جمبه والموقف كان كفيل يشرحلي انها ثانوية عامة وخصوصًا ان كُل يوم كتاب شكل وكُل يوم دموع شكل وتركيز شكل تحسوا ان دموع التاريخ بتختلف عن دموع الإنجليزي يعني بتبقى واضحة!"
_انتَ اتجننت يابني؟كُل يوم تشوفها قاعدة لوحدها مُنهارة وروحها في مناخيرها ورايح تباركلها إنها هتمتحن؟؟ما كُنت اديها طلقتين بمسدس أحسن وخلصها! ده انتَ غبي ياجدع!
_يابني هي بمجرد مابَصتلي وعنيها كـ العادة كانت مليانة بقايا دموع اتوترت ومكنتش عارف أعمل ايه فـ جيت أهزر معاها اتغابيت!
_منك لله ياعلي!
_ششش بس ياعم أنا أصلًا لا بتاع كلام ولا ارتباط ولا حُب هي بس داخلة دماغي مش أكتر.
"طبعًا بكدب أنا اسمي الحقيقي كداب حتى في البيت أمي مسمياني الكداب راح الكداب جه .. مبحبهاش ده ايه؟ هو أصلًا في سجدة بسجدها مبتتذكرش هي فيها؟ بس يااه لو اعرف اسمها تبقى كملت ياواد ياعلى"
_يابنتي كفاية عياط خلاص.
_الغبي بيقولي مبروك! جاي يشمت فياااا
_يابنتي انتِ اصلًا اي حد بيكلمك الفترة دي حتى لو هيسألك الساعة كام بتتهميه انه جاي يشمت فيكِ
_انتِ كمان بتعايريني!
_مقصدش والله بس ...
_شششش مش عاوزه اسمع صوتك اخرجي واقفلي الباب ولا اقولك سيبيه مفتوح بس اطفي النور ولا اقول سيبيه شغال علشان بخاف انام في الضلمة أصلي هذاكر تاريخ دلوقت وعندي شوية عربي على شوية جغرافيا على الـ 18 يونيت انجليزززي اااااه برراااااااا اخرجي برااااا.
"خرجت وهي بتبرطم وبتقول عليا مجنونة؟ انا مجنونة انا؟ بقى القمر دي مجنونة! اختي دي حقودة من يومها أصلًا أنا فاكرة كويس وانا في بطن ماما وهي برا بطنها كانت بتحط دماغها على بطن ماما على اساس تضربني بالدماغ يعني وكده يلا حسبي الله ونعم الوكيل فيها كانت عاوزه تموتني"
_انتِ يابنتي بتعيطي ليه يابومة ياأرملة انتٍ!!
_حتى انتِ ياماما جاية عليا وبتشتميني؟ ليه يادُنيا بتصُبي عليا احزان وانتِ عارفه اني معنديش خزان!
_عوض عليا عوض الصابرين يارب.
"سابتني وخرجت .. مالهم دول؟ أما أقوم أحط روچ علشان أبدأ مذاكرة أصلًا اهم حاجة في المذاكرة درجة الروچ وثباته وخصوصًا بقى لو كان في شوية مكرونة بشاميل كده وكيس شيبسي وطبق بانية وعصير مانجا اااه"
_علي!!!
_ايه ياماما ياحبيبتي في ايه؟
_ماما برضو اللي حبيبتك ولا اللي انتَ قاعد بتفكر فيها وسرحان بقالك 10 دقايق ومش سامعني!
_ها؟
_مخبي عليا حوار مش كده؟
_لا خالص ياست الكُل انا بس في واحد صاحبي هيمتحن ثانوية عامة وكده وقلقان عليه اوي:('
_ااه واحد صاحبك
_هل انتِ مش مصدقاني يعني!
_بصراحة؟ لأ هو انا امتى صدقتك ياكداب!
ضحكت_ماشي يامصر ،، كنت عاوز اقولك هو أي دعوة ممكن تُستجاب؟
_أيوة
_أي دعوة أي دعوة؟
_الفكرة مش في ايه هي الدعوة الفكرة في الثقة يعني تكون بتدعي وقلبك بيردد انها هتستجاب .. تكون واثق في الله تمام الثقة انه هيستجيبلك اياً كان الوقت اللي هيتم فيه الاستجابة قريب او بعيد متبطلش تدعي ومتيأسش.. وكمان ربنا مش هيخليك تدعي دعوة معينة غير وهو هيردهالك بإستجابة .. ربنا كريم أوي يابني.
"سابتني وقامت والكلمة بتتردد في ودني كإنها صدا صوت في مكان فاضي مافيهوش حد ،، انا عارف اني غلطت لما حاولت اكلمها ايًا كان الدافع وقتها وعارف ان الشيطان احيانًا بيغلب بس عارف برضو ان حتى لو كانت استجابت للكلام معايا مكنتش هتعامل معاها كتير!! "
_مين قالك كده؟
_أنا اللي بقول كنت هكلمها وقتها بس وخلاص.
_يعني الشيطان مكنش ممكن يقنعك ويغويك ويخليك تكمل كلام معاها؟
_لأ
_هو ربنا قال ايه عن الشيطان؟
_قال كتير تقصد انه آية؟
_قال لا تتبعوا الشيطان صح؟
_لا لا قال لا تتبعوا خطوات الشيطان.
_طب ما انتَ حافظ اهو!
_قصدك ايه؟
_قصدي ان الشيطان مش بياخدك على طول ده بياخدك خطوة خطوة شوف البنت دي حلوة! ايه ده روح اخلق حوار معاها ! طب بص بص خد رقمها ومتكلمهاش كتير ،، انتو لسه متعرفين كلمها كتير لحد ماتعرفها وبعدين قلل الكلام وهوب تلاقي نفسك وقعت!
"كان صراع بيني وبيني!! كنت بتكلم وبرُد على نفسي في صوت جوايا لسه بيناديني! لسه بيقولي حرام ولسه بيقولي حلال لسه بيقولي غلط ولسه بيقولي صح! ربنا كريم فعًلا بدون التأنيب ده مكنش زمان ده حالي"
_مبروك!
_على ايه؟
_علشان هتبقي أشطر باشمترجمة في الدنيا كلها.
_بس كده؟
بإبتسامة_وعلشان كتب كتابنا كمان .. انتِ متعرفيش انا فضلت احارب نفسي مكلمكيش قد ايه!! فضلت ادعي قد ايه!! فضلت امنع نفسي من كل طرق الشيطان اللي ممكن تجيبني ليكِ قد ايه! انا حقيقي اشتغلت كل حاجة علشان اقدر احوش المبلغ اللي يخليني اجيبلك شقة تختاريها انتِ في اي مكان تحبيه وعلشان اقدر اجيبلك دبلة لما تشوفيها تبتسمي مش علشان سِعرها لأ علشان مني أنا ،، علشان اقدر أخلي عنيكِ تلمع دايمًا :('
_بس الحب مش شقة في مكان حلو ولا دبلة! انا كفاية عندي بس ان لمعة عيني في وجودك تزيد متقلش وكفاية اكتر ان ولادنا فيما بعد يبقو عارفين يعني ايه ربنا ويحبوه ويعني ايه رسول الله ويقتدوا بيه ويعني ايه لين وود واحترام :)'
_وبعدين يا بابي؟
_وبس ياكوكي بعد ما مامي ولدتك بشوية قلبها تعب وسافرت عند ربنا واخر حاجة بقت منها هو انتِ والسلسة اللي في رقبتك دي علشان كانت لبساها هيّ..
_طب والمكان ده؟
"شاورت على رُكن فالبيت كانت هي اختارته"
_ده الركن اللي احنا من اول يوم دخلنا البيت ده سوا صلينا فيه ولحد الان لسه بنصلي فيه انا وانتِ سوا أهو بس هو كان فِكرتها كان نفسها الملايكة تفضل تطوف جوا البيت دايمًا وكانت بتختار تصلي بالليل علشان يكون بيتنا منوّر.
_بتحبها؟
_بحب كُل شيء منها
أحببتك وأتقيت الله وحصلت عليكِ بكرم من الله💙
#أميرة_فاروق
#يلا_نتغير
