- الفطار يا ماما.
_ حطيه عندك.
- تحبي أعملك حاجة معينة تشربيها.
_ .....
- أعملك شاي بلبن؟
_ متشكرة، أنا لو عوزت حاجة هقوم أعملها.
قمت أشوف اللي ورايه وأبتدي أحضر الغدا لحد ما يجي ميعاد آسر من الشغل، وفي نفس الوقت دماغي بتفكر في فكرة سلسلة فيدوهات جديدة عايزة أعملها. دي أكتر حاجة اتعلمتها من آسر إن أحاول استغل "الثانية"على قد ما اقدر، واكتشفت إن الثواني فعلًٍا ليها قيمة خصوصًا لما تيجي تلعب تمرين البلانك .. ببقا حاطه معايه في المطبخ "كشكول" كل ما تيجي في بالي فكرة بكتبها قبل ما أنساها وبختار الوقت الممناسب بعد كده لتنفيذ اللي كتبته.
لاقيت آسر بيتصل:
- عاملة إيه يا حبيبتي وأمي عاملة إيه!؟
_ إحنا كويسين الحمدلله، وماما صاحية وجهزت لها الفطار.
- ربنا يبارك ليّ فيكِ.
_ متنساش تجبلي شوكولاتة وإنت جاي.
- وهي دي حاجة تفوتني برضو، يلا باي وشويه وهكلمك بعد ما أخلص ال meeting.
_ سلام.
*** *** *** ***
"أنت شجاع إن كنت تعتقد ذلك، وفاشل وجبان إن كنت تعتقد ذلك أيضًا، فلا أحد يعتقد عنك شيء سوى ما تعتقده أنت عن نفسك، لا تنتظر من أحد أن يدفعك إلى الأمام، وحدك من يستطيع فعلها".
#اقتباس_اليوم.
كتبت الاقتباس التالت وشاركته في صفحتي على الفيسبوك، قررت إني كل يوم أنزل اقتباس لعله يسيب أثر في اللي يقرأه أو يكون رسالة له تحفزه وتشجعه عن خطوة مكنش عارف يتخطاها.. كنت لسه بقرأ في التعليقات على البوست اللي مكملش 3 دقايق نشر، سمعت ماما آسر بتعيط.
- مالك يا ماما، حصل إيه؟ .
مش راضية تبص لي، ومشبكة إيديها في بعض..
مش عارفة مالها أنا كنت سايبها كويسة وبتكلم "ريهام" بنتها.
- مالها ريهام يا ماما فيها حاجة أو حد من العيال تعبان؟ حد زعلك؟
_ لأ يا بنتي، زهقانة شوية من قعده البيت بقالي كتير مشمتش هوا.
قمت وقفت ووطيت على راسها وبوستها.
- بس كده! ولا يهمك يا ست الكل، ناخدك النهاردة وننزل نتفسح، هقوم دلوقتي أحضر الغدا ونيجي ندردش شوية لحد ما آسر يجي.. محتاجة مني حاجة أعملها؟
_ لأ يا بنتي شكراً.
وأنا طالعة من الأوضة لاقيت آسر واقف بره، وملامحه كلها متغيرة وواقف ساكت مبيتكلمش. وجي بدري على غير العادة.
هزرت معاه وقولتله:
_ معرفتنيش إنك جاي بدري، حصل إيه في الشغل، ولا اليوم اللي أنا مش هنزل فيه الشغل إنت هتبوظ اللي بعمله بقى وكده!
- ..............
مبيعملش حاجة غير إنه بيبص لي وعيونه فيها دموع ومبيتكلمش،
قربت منه وقعدت جمبه ومسكت إيده أطمنه.
_ إحكيلي حصل إيه!
- أنا آسف.
