_ياشيخه الناس كرهتني بسببك
=ايه يازين دي كتاباتي
_طب وذنبي انا ايه ليه تطلعيني وحش كده
=طب مش انا مراتك يعني يرضيك اكتب اسم واحد تاني
_طب ما انتي متكتبيش والناس تترحم من نكدك
=انا نكديه يا زين
_لا خالص وانا اقدر اقول كده
=انت مبقتش تحبني طب كنت قولي من الاول انك محبتنيش مكنتش اتجوزتك وكن.....
_لا كتاباتك متطلعهاش عليا فاهمه
=قفايا يازين
_روحي اعمليلي شاي
=كان المفروض اخد اللي باقي من كرامتي وامشي من اول طعنه خدها قلبي منك
_من اول طعنه؟
=سيب شعري بس وانا هعمل الشاي واجيبلك كيكه كمان
_شاطره كده احبك
=يعني انت مكنتش بتحبني
_يابنتي بقى بطلي نكد
=وكمان مش مستحمل كلامي
_يارب صبرني
=انا هلم اللي باقي من فتافيت قلبي وهمشي
_امشي
=بالسهولة دي؟
_ده على اساس انك هتمشي يعني
=يوما ما سأفعلها وستندمون
_دي اخر اللي يتجوز طفلة
=طيب يا سيدي شكرا كفايه
روحت عملت شاي علشان احمي قفايا بس مش اكتر لكن انا مش خايفه منه خالص خالص
_وتين بصي دي كده
=........
_مالك يابنتي بتعيطي ليه؟
=انت بتخوني يازين
_كان نفسي بس جبتيلي عقدة من البنات كلها
=قصدك ايه يعني
_لا يا حبيبتي ولا حاجه، بخونك فين بقى
=في روايتي الجديدة، بص انت بتحب البت يولاندا
_اقتلك؟ اقتلك وينشروا في الجرائد والمجلات المهندس زين قتل مراته
=اهون عليك يابيبي
_امشي من هنا هنرش مايه
=انا اصلا هاروح اكمل روايتي نينينينينينينينينيني
زين حب طفولتي، حبه كبر جوايا وفضل يكبر طول الوقت، لحد ما اتجوزنا، كدب اللي قال إن الحب ببقى بعد الجواز بالعكس ده بيزيد بالقرب، اللي قال كده محبش، هو مستحمل تفاهتي وعياطي وطفولتي، بيفهمني وده كفيل يخلينه ماسكه فيه وحبه يزيد جوه قلبي اكتر
=بس بس انت يا واد يا حليوه يا اسمراني ياقمر
_انتي بتكلمي قطة؟ وايه واد دي
=اقولك يابت يعني؟
_عارفه يا اوزعه انتي في يوم هرميكي من الشباك بسبب لساني ده
=ايه يازين في حد يمسك مراته من قفاها زي الكتكوت المبلول كده
_هو في حد مراته زيك كده؟
=طبعا مفيش علشان انا واحدة بس
_والحمد لله انك واحدة بس علشان كان الكوكب ولع لو في منك تاني
=انت قلبك قاسي قوي قوي انت مش بتحس كده وكده
_بت روحي شوفي بتعملي ايه
=هقولك حاجه
_قولي
=بتحبني؟
_اومال متنيل على عيني ومستحملك ليه
=يارب يدوسك خروف هربان من جزار اهبل علشان انت مش رومانسي
_طب اتكلمي وانتي واقفه مكانك
=لا ياعم انت بتغدر بيا وبتضربني
_ياعم؟
=اقولك ياسطا؟
_الجلطة مش هتجيلي من فراغ والله
بحب قوي اعصبه، لا انا بحبه في كل حالاته، عصبيته، زعله، انا عاشقاه مش بس بحبه.
=انا بحبك
_قولي حاطه المقلب فين
=زين انا بحبك بجد
_طب ما انا عارف يا روح زين
=طب قول يلا
_اقول ايه
=اعترفلي بحبك
_بحبك
=مش عاجباني
_ابوسك يعني؟
=قليل الادب، قولي بحبك يا وتيني
_انتي هتكتبي رومانسي صح؟
=لا حزين طبعا وهموتك في اخر الرواية فعايزاك تقولي بحبك علشان اموتك بنفس
_يارب مش اعتراض على قضائك بس ايه دي تبقى مراتي
=علشان انا قمر
_بالستر ياختي
=انت عارف هموتك ليه
_ليه؟
=علشان خونتني ولقيت باسورد موبايلك مش باسمي
_ها
=وريني كده موبايلك
_موبايل ايه انا مش معايا موبايل
=هات يازين
_ميمشيش معاكي اني عامله بأسمي؟
=يعني كمان بتخوني مع نفسك؟ من قلة الستات تخوني مع نفسك
_.........
=زين هو انت بتعمل كده ليه؟
_.........
=زين الحق انت اتشليت
_.........
=شوفت عقاب ربنا عمل فيك ايه علشان بتخوني
#وتين
