_خرجتي ؟
_ دقيقة وأكون قدامك
_مستنيكي
مش عارفة ازاي راضية على قلبي اللي بعمله فيه ده، ازاي بعذبه معايا كل العذاب ده، أنا قلبي جوايا بيعيط لا العياط قليل، بيصرخ وبيتكسر زي ازاز الكوبايات.
أول ما شوفته قاعد هو وهي وبيضحكوا كنت عايزة أرجع وأكدب مقدرتش أجي عشان بابا مش موافق، أو أقوله مثلًا قلبي ساخن ومش قادر يتنفس ومحتاج راحة بعيد عنك، أو ممكن أقوله عيوني هيدمعوا ويتوجعوا أول ما يشوفوك معاها
_ عيشة كل ده تأخير ؟
كنت هعتذر بس هي قالت بسرعة
_ يلا كفاية كده الفيلم بدأ من بدرى اصلًا
مشيت قدامنا فهو بصلي للحظة كأنه بيفكر يتحرك ولا لأ
_مالك ؟ متضايقة ليه ؟
ابتسمت _ مفيش حاجة يا بني هتضايق ليه يعني ؟
مشيت وسبته عشان عارفة أن نظرة واحدة كمان وهيعرف ايه اللي جوه عيوني من عشق ليه، أو مش هيعرف ما احنا بقالنا كتير اووى أصحاب وعمره في حياته ما لاحظ وجودي غيري كصديقه أو صاحبه، ده حتى مش متخيلني بنت " صاحبه الجدع "
كانت رنا مركزة مع الفيلم، بصيت عليه كان قاعد بيلعب في فونه ابتسمت، أكيد زهق كعادته من الفيلم ولو كنا في البيت كان نام دلوقتي ومكملهوش، كنت متضايقة عشان قاعدة جمبها وهي قاعد جمبه، غبية والله يا عيشة إنك وافقتي تجي معاهم.
خرجت من الزعل، بجد غبية إني جيت واحد وبيفسح حبيبته جاية معاهم ليه.
شوفته خرج من القاعة فقولنا بصوت واحد
_ خرجت/ي ليه ؟
في نفس اللحظة بردو _ زهقت
وبعدين ضحكنا أحنا الاتنين في نفس اللحظة بردو
_ وصلتي البيت ؟
_ اه، أنت فين ؟
_ أنا في الطر....طب معلش يا عيشة أقفلي دلوقتي رنا بتتصل.
أقفلت التليفون في وشه، يا رب يا عمر تموت أنت وهي، زمان قبل ما هي تدخل حياته ماكانش بيتكلم غير معايا أنا، ماكانش بيسهر غير ويايا، وبيخرج معظم الوقت معايا أنا ومع أصحابنا، دلوقتي هو بيخرج معظم الوقت معاها هي ولوحدهم، يعني ايه حبيبته يعني عشان ينساني ويفضل معاها.
_ بقى يا عمر تقفل معايا وتكلمها هي، طب لما تتصل بيا مش هرد عليك طول عمري، أنا أصلًا هقطع علاقتي بيك للأبد ومش.... يالهوي ده بيتصل، أكيد الحيوانة رنا زعلته ما هو مش بيسبها ويكلمني غير لما تخصمه
_ عيشة
_افندم!
_ لسه صاحية
_ عايز ايه ؟
_بقولك بكرا يبقى صحيني الساعة 7,30 عشان عندي معاد مهم وضروري ألحقه
" اصحيك بس ده أنا أنور العالم كله عشانك والله "
_ ليه يعني ؟ كنت المنبه الخاص بحضرتك !
_ يا عيشة بالله صحيني، لو إتأخرت على المعاد هتبقي مشكلة.
" أنت تأمر يا عيوني "
_ وست رنا فين متصحيك ؟
_ قولتلها أكيد قبلك، بس هي بتقول مش هتقدر تصحى في الوقت ده هي أصلًا فهتصحيني ازاي ؟
_ اووف، يعني قولتلها قبلي، وتقولها قبلي ليه ؟ مش أنا علطول اللي بصحيك وبقومك لشغلك؟ أديك أنت قولتلها واحرجتك ...ومش هصيحيك يا عمر عقابًا ليك.
قفلت الفون في وشه بعصبية ورميته جمبي، روح بقى شوف هتتصرف ازاي، لحظة ورن، طبعًا ماردتش لا بجد المرادي ماردتش، بعتلي رسالة.
" طب شكرًا يا صاحبي، شكرًا على الغدر "
محستش بأي تأنيب ضمير خالص ونمت مرتاحة تمامًا تمامًا تمامًا، وأكيد طبعًا مش هصحي عشانه الساعة 7,00 عشان اصحيه.
7,00 إلا عشر دقايق قومت "والله أنا مهزأة "..!
اتصلت عشرين مرة وهو ماردش، عادي متعود على كده منه، هو أصلًا مش بيصحي غير بكوباية مايه ساقعة تنزل على قفاه
_ يا زفتة سبيني أنام بقى.
كان صوته قمر اقسم بالله وهو صاحي من النوم
_ قول زفتة تاني كده ...قصدي عمر اصحى هتتأخر على معادك
_ معاد ايه ؟
_ عمرررر اصحى، عندك شغل مهم علفكرة
_ في ستين داهية الشغل، سبيني أنام بقى
خمس دقائق واتصلت تاني بيه، عشان كده صحيت بدرى بسبب نومه التقيل ده، الحمد لله بعد مليون اتصال أخيرًا صحي
