- اقولك مش بحبه تقوليلي اتجوزيه!
- أنا قولت جواز؟ أنا؟ دي مجرد خطوبة.
- والخطوبة بعدها أية؟
- جواز.
- الصبر من عندك يارب.
سيبتها قاعدة وقومت دخلت البلكونة وجوايا تنهيدة مؤلمة مش عارفة حتى أخرجها.
هو الجواز ينفع بدون حب؟
ابني بيت، أخلف ولاد، أكون أسرة بدون حب؟
بدون ما أحس بالأمان تجاه شخص؟
بدون ما أمتن لوجوده، لصوته، للمسته، لريحته، لضحكته
لوجوده ككل.. لوجوده بكل ما ليه وكل ما عليه؟
اتجوز شخص مبحبوش؟ اه علشان العقل بيقول كدا.
طز في العقل
طز في تقاليد المجتمع
طز في المفروض نفسه.
أنا.. أنا انسانة، من حقي احب واتحب
كتير عليا يارب؟!
- ما هو بيحبك.
- أنا مش شايفة كدا.
- لانك عامية.
سيبت القلم وبصتلها - وانا بقولك مبيحبنيش.
- طب لية عينه عليكِ بقاله خمس دقايق؟
اتهزيت في مكاني، اتوترت وكهربا غريبة مرت في جسمي كله، خفت ألف لاشوفه فعلا بيبصلي، وخفت ملفش لأفضل فاكرة أنه كان بيبصلي.. غمضت عيني وانا معرفش هي كدابة ولا صادقة وسيبت المكتب كله ودخلت الحمام.
وقفت قدام المرايا وسرحت.
الحب للجميلات، مقولة قديمة متوارثة من سنين طويلة.
الحب للست الأفضل، للست الأرق، للست الأجمل.
طب ما أنا كدا.. لية محبتش ومتحبتش؟
لية معشتش قصة حب من الي بيكتبوا فيها الروايات؟
ليه أنا مش بطلة رواية؟
ليه أنا مش حلم شخص؟
ليه أنا مش حلم؟
- كله غلط، كله الارقام غلط.
- طيب يا زين انا ممكن ..
- لا أنتِ مش ممكن، أنتِ مش مركزة، ودا شغل وفلوس ناس ممكن تضيع على الأرض بسبب استهتار و..
بصيت للأرض وحطيت ايدي على ودني.
- متزعقش.
ايديا اتحركت بعفوية شديدة علشان احمى نفسى من الصوت العالي، الصوت العالي بيأذيني، العنف بيأذيني، همجية البشر بتأذيني، ملامح الغضب بتأذيني.. أنا بخاف من الأذى.. بخاف آذي وبخاف اتأذي.
- بتخافي.
رفعت عيني وبصتله بتردد، شيلت ايدي من على ودني وكنت خايفة من نظرته .. دورت على نظرة سخرية، نظرة استهزاء أو حتى شماته ملقتش.. عيونه كانت طبيعية، وسؤاله كان هادي. لا مكنش سؤال.. كانت إجابة، كان شايف خوفي ومتأكد منه وانا مكنش احب يشوفني كدا أبدًا.
- لا.
الغريب أنه ابتسم !
الغريب أنه قام !
الغريب أنه شدلي كرسي اقعد !
- طيب اقعدي من فضلك.
قعدت، رغم اني كان نفسي اجري واسيبله الأوضة كلها لكن في النهاية قعدت، واستنيته يتكلم لما قعد قصادي.
- انا اسف، مقصدش اخوفك.
دا بيتعذر زينا؟
يعني فاهم يعني أية غلط ويعني أية صح؟
يعني مدرك أن فيه حاجات ممكن تزعلنا وحاجات ممكن تضغط على أعصابنا.. طب لية مفهمش إني مش عاوزاه؟
- أنا قولت اني مش خايفة.
- ما أنا عارف.
- بتاخذني على قد عقلك؟
- تفتكري اعرف؟
- لا طبعا.
- أكيد أنتِ شخص عاقل ومش سهل حد يضحك عليك بكلمتين.
ابتسمت - شكرا انا فعلا كدا.
ابتسم ابتسامة واسعة وفجأة الابتسامة اتحولت لضحكة، وبص للسقف وانا أدركت أنه فعلا بياخدني على قد عقلي.
لية؟ علشان انا هبلة.
وقفت بغيظ - تمام تمام.. انا اسفة على الغلطات الي في الملف، هراجعها تاني و هجبهالك يا زين.
