كانوا قالولي زمان إن الوحدة دي حجة للغلطان، بياخد فيها جنب بعيد عن الناس، يثبت فيها علي رأيه، يشوف إنه صح، معندوش معارض ولا حد يوقفه.
- لا معلش
- علشان خاطري
- قلب ماما يعني أية اخوه جاي معاه؟
- وأنا أعمل أية يارحمة!
- وانتي تخرجي معاه من أصله لية؟
- مش خطيبي يا ناس
- مش مبرر برضه تخرجي لية؟
- يا بنتي أحنا فاضل لينا ٥ شهور علي الجواز ولسه الشقة فيها حوارات كتير والجهاز وماما و...
- بس بس أية الغم دا، متفركشي أحسن
- أية !!
- اخرجي، عاوزة تخرجي اخرجي
- علشان خاطري تعالي معايا
- يستحيل
- يارب نخلص
- معلش هو جاي
- لا واحنا كمان الي نستنا ؟ بقولك أية أرمي الدبلة في وشه الواد دا مش حباه.
- ترمي الدبلة في وش مين يا أنسة رحمة؟
إبتسمت باصطناع - جوز صاحبتي، ياغالي كنت لسه بجيب في سيرتك
- اه مانا سمعت
- كويس وفرت
داس علي سنانه وشاور علي شخص جنبه - زين، أخويا
رفعت وشي من علي كوباية النسكافيه الي في إيدي، أيوة يعني جايب اخوه أعمل بيه أية؟
- ازيكم يا بنات
أسماء ردت - ازيك يا زين أخبارك أية ؟
- الحمدلله
لف وبصلي - إزيك يا أنسة رحمة
قومت وقفت - اهلا يا مستر زين، عن أذنكم.
وقفت بعيد وأنا متضايقة، مش بغير علي أسماء وكدا، أنا مبطقش صنف الرجالة كله، بحس أنهم اعداء ليا
- وقفتي بعيد لية ؟
- أكيد مش علشان لما تسألني اقولك.
إبتسم - ردك جاهز دايمًا؟
- يعني تقدر تقول كدا
- كنت عاوز...
- أنا مشيت ووقفت لوحدي علشان عاوزة أكون لوحدي، أكيد لو كنت حابة مجال الأسئلة والحوار كنت قعدت معاكم.
سكت واتوقعت يتحرج ويمشي، قعد جنبي علي الأرض قدام البحر ساكت
- ممشتش
- وأمشي لية؟
- يمكن علشان مفيش حد تتكلم معاه
- ومين قالك اني عاوز أتكلم؟ ولا هتحاسبيني كمان علي قعدتي !
حاولت أدراي إبتسمتي وفشلت، يمكن لو شخص تاني كنت إتعصبت ومدتلوش فرصه يتكلم، لكن حاجة جوايا عجبتها أنه رده، أنه حاول يستفزني وميسايرنيش زي ما معظم الناس بتعمل.
- بتضحكي !
- عادي
- عادي إزاي إنتي..
- قولت مش حابة حوار أو مناقشة، من فضلك تحترم دا، أو متحترموش عن أذنك.
اخدت شنطتي ومشيت وكلمت اسماء اتحججت بأي حاجة، بس أنا مروحتش، فضلت ماشية مكان ما رجلي توديني، مش هيخيل عليا حركات أمي واسماء، أنا عارفه حكاية زين وحجة اخوه كل دا علشان يخلقوا فرصه إني اتعرف عليه، أنا مش غبية علشان يضحكوا عليا وهما عارفين إني عارفة وبسايرهم بس والنهاية يعني؟ فيها أية لما أكون مش عاوزة أتجوز تاني ؟
اه اتجوزت أولاني، حبيت وقلب دق لشخص وربنا شاف إنه يكون عنده أحسن فأسترد امانته، ازعل أنا ؟
بالعكس علي الأقل ليا شخص نقي وطيب في مكان أجمل، في مكان أنضف وأحسن، هزعل لما يكون زوجي في الجنة ؟ ياريت كنت معاه، أنا أتمني أروحله النهاردة قبل بكرا وعمري ينتهي، بس لسه باقيلي شوية أشوف فيهم قذارة دنيتنا أكتر وأكتر.
