"لو بتحبي القهوة فمعنديش مشكلة نشربها سوا، ولو مش بتحبيها معنديش مشكلة أشرب اللي بتحبيه"
- انت إنسان قليل الذوق ومهزأ كمان
كان واقف باصصلي ومصدوم، طبعاً هيقولي ما أنا اعتذرتلك، يعتذر ويتهزأ وميفتحش بؤه
- ..
- هو ربنا خلقلك عينتين اتنين زينة يعني !
- خلقلي إيه ؟
- عينتين
- أيوة خلقلي عينتين فعلاً إنتي مبتكذبيش
- طب أنا دلوقت أعمل إيه ؟ لا هينفع أروح بالمنظر ده ولا هينفع أدخل الندوة كده كمان، عاجبك شكل الفستان وهو متبهدل كده !
- ما أنا مأخدتش بالي ياآنسة والله، والله حد خبطني فالقهوة وقعت على حضرتك كده، أنا آسف، حقك عليا
ايه ده هو بيكلمني بإحترام كده ليه ؟ طب زعقلي علشان أهزأك وأمسح بيك الأرض طيب.
بصيت في الأرض - خلاص محصلش حاجة
- طب أمشى ؟
- اتفضل.
ياشيخمنكلله، أروح إزاي كده ؟ انت عارف أنا جايبة الفستان ده بكام ؟ ايه ده لحظة هو اعتذر وطلع محترم، أيوة طب والفستان، خد هقولك.
- عملتي إيه في الندوة يانونو
- وقع عليا قهوة وجيت ياقلب نونو
قعدت بسرعة - بس انتي مبتشربيش قهوة
- ما هو مش أنا اللي وقعت على نفسي، واحد حلو اوي قليل الذوق محترم مترباش، حد خبط فيه تقريبا ولا معرفش حصل ايه، فالقهوة اللي في ايده وقعت عليا قدام القاعة بالظبط
- ها ؟
- ها ايه ؟ ماخلاص، هزأته وبعدين اعتذرلي فسامحته
- ياحنينة، هزأتيه بس ؟
- يعني كنت أعمل إيه يا أسماء ؟
- تاخدي رقم تليفونه علشان تهزأيه كل يوم، دي عاوزة سؤال !
معرفش مستحملاها ليه المصيبة دي والله، خرجت لماما وحاولت أمهدلها الموضوع، ما هو لو الفستان باظ حرفياً هتعمل مني بوفتيك.
- ماما هي القهوة بتبوظ الهدوم ؟
- لو متغسلتش على طول
- طب ماتجيبي فلوس أودي الفستان المغسلة
- فستان إيه !
- أنا جبت سيرة الفستان ؟ حد هنا قال فستان ؟ عاوزة فلوس بس
- بوظتيه ؟ أنا كام مرة قولتلك بلاش تفصيل هدوم، بتروحي يتضحك عليكي، قماش وتفصيل، مبتسمعيش الكلام معرفش ليه
- ماما إحنا جبنا الفستان من عند الترزي وطلع حلو وعجبك وخلاص على فكرة
- بجد عجبني؟ أومال في ايه ؟
- وقع عليه قهوة من امبارح
- قومي ياموكوسة حطيه في المية
- لو مطلعش هوديه المغسلة، صح ؟ قولي صح
- قومي من قدامي ياحنان
- كنت عارفة انه صح.
طبعاً لو ماما هي اللي بوظت حاجة، فده طبيعي، واحنا بشر وبنغلط، والدنيا جاية علينا، وايه ده مين اللي خرم طبقة الأوزون، ومين دول، إنما بقى لو أنا اللي بوظت حاجة، فعلشان أنا مش مركزة وعقلي مش فيا ومبعرفش أعمل حاجة وأنا اللي أكلت الجبنة.
- لبستي ياحنان ؟ أنا لو جيت ولاقيتك مخلصتيش والله همشي وأسيبك
- خلصت والله بلف الخمار أهوه، على ماتيجي هكون خلصت.
ماما دخلت - هتيجي إمتى ؟
- انتي عارفة مبحبش وقفة الأفراح، هروح اباركلها وآجي على طول.
- بعد 9 مفيش دخول البيت على فكرة
- الساعة 8 ونص ياماما دلوقت
- ايه ده بجد ! يبقى بعد 9 ونص
- أقعد ومروحش ؟ والله أقعد
- لا روحي، علشان الناس تشوفك
- طب مش راحة خالص ولا خارجة من البيت
- علشان خاطري روحي، يمكن تجيبي عريس
- 10 حلو ؟
- 11 ياقلبي.
أنا بتخنق من الأفراح، بحسهم مأجرين قاعة علشان يرقصوا ويشيلوا ذنوب ويروحوا، اللي هو بيدفعوا ألوفات علشان يشيلوا ذنوب، موسيقى عالية وشباب وبنات بيرقصوا والموضوع أشبه بملهى ليلي والله.
- أسماء بالله ماهنقعد، هنقولها مبروك ونمشى
- حاضر والله
- وكمان أ..
حد خبط فيا والشنطة وقعت من ايدي وكنت هقع، وطيت أجيب الشنطة وسيبت أسماء تهزأ اللي خبطني ويولعوا مع بعض الإتنين، بصيتلهم لما سمعت صوته ! إنت تاني !
اتكلمت وأنا مصدومة - هو حد عامل معاك تعاقد علشان تخبط فيا ؟
- طب والله حد خبطني برضو، والله أنا آسف
- حصل خير
- على فكرة الفستان ده أحلى من التاني بكتير
أسماء وقفت قدامه - تاخد رقم تليفونها بالمرة ؟
- ياريت
- الله دا دمه طلع خفيف وبيستظرف، طب خف العسل
- طب هاتي رقمها وأنا أمشى خالص
معرفش ليه كنت واقفة ببتسم وببصلهم الاتنين، شكلهم عسل أوي وهما بيتخانقوا
- طب ماتاخد رقمي أنا وهدعيلك
ضحك - لا ياستي شكراً، أمي قالتلي طريق البنات آخره وحش
- طب ما انت كنت عاوز تليفونها من شوية، جت عليا وافتكرت النصايح العشر بتوع الست ماما.
- هي دايماً كده، الدنيا بتيجي على الغلبان.
ابتسمت برخامة - طب ابقى سلملي على ماما
مسكت إيدي علشان ندخل فوقفها - إستني إسمك إيه ؟
- لأ، مش معنى اني هزرت معاك انك هتاخد عليا وأقولك اني إسمي أسماء يعني.
بص ناحيتي - طب وهي ؟
- ولا هتوصل برضو اني أقولك انها اسمها حنان
أنا اللي شدتيها المرة دي علشان ندخل
- انتي متخلفة ! ايه اللي عملتيه ده ؟
- فيها ايه يعني لما يعرف الاسم، هو الاسم بيسبب فتنة ؟
- لا ياأم دم خفيف، بس ميصحش
- شكله محترم
- أيوة يابنتي، المرة اللي فاتت كان بيتكلم باإحترام خالص لدرجة اني اضطريت اسكت
- لأ ودمه خفيف
- أيوة، ماشاء الله
- لأ وحلو كده
- أيوة أ .. جرا ايه ياللي مشوفتيش تربية انتي !
- بهزر يانونو
- طب اخلصي تعالي نسلم عليها خلينا نروح.
" ليست صُدف، تعثرات لِربْكْ القلب "
كان مكتوبلنا نتقابل كام مرة ؟ مكتوب لخطاوينا تتلاقى في كام طريق، وأنا وإنت من غير عقل ومش فاهمين إن نهاية الطريق لُقا، وحضن واسع أوي، وسع إيديك الإتنين.
- أسماء أنا بقالي ربع ساعة في الشمس واتحمصت.
- نازلة نازلة.
- بقالك ساعة بتقولي ناز..
الموبايل وقع من ايدي لما حد خبطني، معرفش لما جبت الموبايل كنت مستنية أرفع راسي وأشوفه ليه، كانت بنت اعتذرت ومشيت وأنا وقفت أبص حواليا، كنت مستنية أشوفه هو، يعتذرلي تاني ونتكلم تاني، أنا مش تافهة والله إني اتعلق بحد معرفهوش علشان موقف، بس يمكن افتكرته وقتها، ودا شيء مش مُبشر إطلاقًا
مينفعش يعني بصراحة تيجوا تبهدلوا حياتنا وتختفوا كده والله، ميرضيش ربنا.
