اسكريبتات

ندى سلامة7

-اتفضل يا أستاذ مصطفى عايزه عشر نسخ من دول ..

مسك مني الورق وبصلي باستغراب وهز راسه

قعدت أبص عليه وهو بيطبع الورق، الصراحة أنا مبجيش هنا علشان اطبع الورق ولا نيله انا باجي علشان أشوفه،والورق ده بروح ارميه عالمكتب ولا ببص فيه حتى ..

-اتفضلي الورق اهو ..
_متشكرة .
-بس قوليلي يا آنسة ندى الورق ده كله بتعملي بيه ايه؟

اتوترت من سؤاله وبصيت للورق وانا بحاول أخترع اي كذبة تتصدق
_ده ..ده ..اه ده بنحتاجه فالكلية بتاعتنا ،بعد اذنـ.. ايه ده هو انت عارفرك اسمي؟
ضحك شوية وبعدين شاور على الورق
-أنتِ لو بتحضري السكاشن بتاعة الكلية كنتِ هتعرفي أني معيد فيها زائد إن اسمك عالورق اهو، مقولتليش بقى مين الدكتور ابن المفترية اللي بيطلب منكوا الورق ده كله ؟

تنيت الورق بايدي بتوتر واحراج
_بعد اذنك اتأخرت.

أنا عارفه أنه فحاجه تبع الكلية لأني بشوفه فيها كتير لكن كنت فكراه طالب في رابعه مثلًا متخيلتش انه يكون المعيد !
اول مرة شوفته وأحنا جايين نصور ورق هنا هو بيقعد فالمكتبه دي كتير والفترة دي بيقعد اكتر لأن الولد اللي كان بيقف هنا عمل حادثة وهو صاحبه فماسك مكانه ..

اتحرجت أروح المكتبة تاني بعد اللي حصل ده
كنت ببص من بعيد واحنا مروحين بس لكن مكونتش قادرة ادخلها تاني بعد الكسفة دي ..

كنت واقفه ببص عليه من بعيد على أساس أنه جوا المكتبه لكن مشوفتهوش
-الدكاترة بطلت تطلب ورق ولا ايه؟
لفيت عالصوت اللي جه من ورايا لقيته واقف مبتسم
-مبقيتيش تيجي تصوري ورق يعني؟
_لا ..أصل ..عادي يعني .
-واشمعنا واقفه كده؟
_هو ..هو .. أصل كنت جايه استعير كتاب
ابتسم ودخل قدامي فدخلت وانا بفكر فالكتاب اللي انا دبست نفسي فيه ده ..
-ها بقى اسمه ايه الكتاب؟
_لا مش كتاب معين عادي يعني
-اخترلك على ذوقي ؟
هزيت راسي وسكتت ..
مد ايده عالرفوف واختار كتاب قرأ عنوانه وابتسم وبعدين ادهولي
- هتحبيه أوي..
_اتمني
-هستني رأيك فيه أنا خلصته قريب.

خرجت وأنا مبتسمة ،الصراحة كنت مبسوطة اوي أني اتكلمت معاه كده ورشحلي كتاب مخصوص ليا ..
اول ما روحت بدأت اقرأ وخلصته فيومين وعجبني فعلًا زي ما قال..وخصوصًا العبارات اللي هو معلم عليها .

روحتله واول ما شافني ابتسم
-شكلك خلصتي الكتاب ؟
_وعجبني جدًا ومحتجتش احدد جمل لأن اللي عجبتني فعلًا كانت متحدده
-ذوقنا متشابه.
_ممكن ترشحلي كتاب غيره؟
هز راسه وبص عالرفوف وجاب كتاب وحطه قدامي
-اتفضلي، هتحبيه .
_واثقة من ده .

فضلت لمدة شهرين بروح استعير كتب على ذوقه هو واكتر حاجه كنت بحبها هي العبارات المتحددة كانت فعلًا بتلمسني واللي كان مفرحني أكتر إن ذوقنا فعلًا متشابه جدًا.

أخر يوم فالامتحانات روحت ارجع أخر كتاب اخدته منه الشعلة الزرقاء لجبران ..
كنت حزينة أوي لأني هفضل فترة مشوفهوش
اديته الكتاب وشكرته ولسه هخرج لقيته بينادي عليا
-ندى..
_نعم ؟
-النهارده أخر يوم امتحانات صح؟
_اه
-طب ايه رايك تاخدي كام كتاب كده تقرأيهم فالاجازة ؟
ابتسمت وعجبتني الفكرة
_ياريت ..
فتح درج وطلع 3 كتب وحطهم قدامي وابتسم
-هستنى رأيك على بداية الدراسة..

الصراحة كنت ناسيه الكتب خالص ومفتحتهاش
فضلت طول الأجازة بفكر فيه ومكانش عندي رغبة للقراءة وغيره ،كان واحشني جدًا .. واحشني اقتراحاته وضحكته وطريقة كلامه وشكله وهو بيقرأ فالكتب ..

دخلت الأوضه وطلعت الكتب اللي هو ادهملي اخر حاجه ولميت الورق اللي عالمكتب كله علشان انظمه ..
لقيت 3ورقات فآخر ورق أنا مصوراه
اول واحدة كان مكتوب فيها
"الكُتب أبرع بريد مُتنقل، تسمحيلي بفنجان قهوة لو تحبي؟". وتاني واحدة ..
"رُبما نجد ضلتنا بين سطر وسطر.بلاش قهوة .. طيب برتقال؟" "
والتالتة والأخيرة..
"العبارات هي زاجل اليوم، قهوة ولا برتقال،ليمون! حلو الليمون ؟""

ابتسمت واتفاجأت ،انا ازاي مشوفتهومش. قبل كده
ده معناه أنه كتبهم في كذا مره وأنا كنت غبيه!
يعني هو كان بيحدد العبارات دي علشان أشوفها!

فتحت التلت كتب اللي ادهوملي وانا متأكده أن أكيد في حاجه ليا فيهم
أول كتاب كان تنهيدة قلبت صفحة كلها وأنا بدور على عبارة متحددة لحد ما وصلتلها
"أُريدك لأنني تعبت من الحرب"

وتاني كتاب كان رسائل غسان كنڤاني إلى غادة السمان ..
ودورت فيه كله لحد ما وصلت لـ
"دونك أنا في عبث"

والأخيرة من كتاب رسائل إلى ميلينا وهي
"قلت شيء أخاف أن أعترف لكِ به.."

سبت الكتب وأنا حاسه أن قلبي هيقف من الفرحة مش مصدقة أن فعلًا ده علشاني، كان بيعزمني كل مرة وبيفتكر أني برفض؟
فضلت طول الأجازة مستنية أنها تخلص علشان أشوفه..

أول ما الأجازة خلصت ورجعنا للكلية روحت عالمكتبة علشان أشوفه لكن ملقيتهوش هناك لقيت الولد صاحبه ..
زعلت ولفيت علشان أمشي وقفني صوته وهو بيقول :
-أنني أخيرًا مطوق بكِ.
_ها؟
-مِن غسان إلى غادة ..قرأتيهم صح؟.

_اه ،وعجبوني جدًا ..كنت جايه ارجعهم واشكرك .
-طب وبعدين..
_"أمس فقط وصلتني رسائلك .." من غسان إلى غادة
-ها؟
_حلو ليمون، أنا بحب الليمون.

#حكاوي_ندى_سلامة