اسكربت
" يلا يا سيدي كبرنا اهو وبقينا بنتعاكس ...!!"
-ضحى تعالي معايا
-هنروح فين
- مش هخطفك متخافيش .... واستأذنت عمو علفكرة
-ماشي
عليت صوتي – ماما انا هنزل مع زين سلام
نزلنا وروحنا كافيه هادي
-ضحى انا كنت عايز اقولك على حاجة
- وانا كمان والله كنت عايزة اقولك على حاجة
-طب قولي انتي الاول
-لا مينفعش قول انت بس الاول
-طب نقول احنا الاتنين في صوت واحد
-تمام
سكتنا وبعدين قولنا في صوت واحد
-انا بحبِك
-انا عايزة اتطلق
اتصدمنا احنا الاتنين محدش فينا كان متوقع كلام التاني
-عايزة تتطلقي يا ضحي
- ايوة
- وانا هعملك اللي انتي عايزاه
-بس مش دلوقتي بعد اسبوع اكون عرفت افاتحهم في الموضوع واقنعهم
-براحتك
قام وساب الحساب على الترابيزة ومشي انا مش متخيلة ان اليوم اللي هيقولي فيه بحبك واليوم اللي عشت طول عمري بستناه هيكون كده .
انا وزين مكتوب كتابنا انا كنت مستنية اسمع الكلمة دي من زمان غصب عني محسسسني اني مفروضة عليه اه كان دايما بيعمل حاجات حلوة كتير ليا بس في نفس الوقت من طريقته عمري ما احدد هي بدافع الحب ولا انه واجبه وخلاص ، سابني في دوامة افكاري لحد ما روحت كنت برن على تليفونه مغلق انا عايزة اعرف هو فعلا .
تاني يوم برضو فضلت ارن عليه مغلق رنيت على حفصة
-حفصة زين عندك
-اه بس ايه اللي حصل بينكم امبارح خلاه كده
اتخضيت – كده ازاي زين ماله
-حابس نفسه في اوضته من امبارح ومش بيكلم حد
- طب اقفلي يا حفصة
-ماما انا هروح عند حفصة وزين علشان زين تعبان من امبارح
-طب روحي وابقي طمنيني عليه
مش عارفة انا وصلت ازاي مكنتش حاسة بنفسي وانا ماشية اساسا فكرة انك تكون السبب في انك تجرح مشاعر شخص حاجة وحشة جدا ، انا طول عمري بخاف اجرح حد بكلامي دقيقة في كل كلمة بقولها علشان عارفة ان كسرة مشاعر الشخص اللي قدامك مش هينة فمبالك لو كان الشخص ده روحك.
رنيت الجرس وحفصة فتحت
-ادخلي يا ضحى انا مش عارفة في ايه
- ممكن ادخله
-اه اتفضلي
خبط على اوضته وسمعت صوته
-ادخل
دخلت ببطئ لقيته قاعد لوحده وسرحان
-زين
-ضحى ؟؟؟!!!
اتنهدت –زين انت ايه اللي خلاك تقولي كده امبارح
-علشان انتي مراتي يا ضحى ولازم تسمعيها مني علشان مينفعش تسمعيها من حد تاني
-بس ؟؟!!
- مفيش سبب تاني
- طب عن اذنك انا كنت جاية اتطمن عليك واظن انك بقيت كويس
لسة هخرج من الاوضة
-ضحى انتي ايه اللي خلاكي تقولي كده امبارح
-علشان احنا مينفعش نكمل مع بعض يا زين حاولت امسك دموعي ومعيطش واقولها استني احنا مش في اوضتي مش على سريري وهكتم صوت عياطي بمخدتي علشان محدش يسمعنا .
قفلت الباب ورايا بهدوء وانا من جوايا عكس كده خالص ليه بتفلت اخر امل من ايديك يا زين انا كنت مستنية اسمع منك عكس اللي انت قولته خالص ليه كل ما احاول ابني انت بتهد وللاسف انا خلاص مبقاش فيا حيل
-ازيك يا ضحى
رديت بهدوء – ازيك يا طنط
-فيه ايه يا بنتي مالك انتي وزين
ابتسمت – مفيش حاجة يا طنط
- ربنا يهديكوا يا حبيبتي
-يارب ...عن اذن حضرتك
- ايه هتمشي بدري ليه اقهدي طيب اتغدي معانا
- معلش يا طنط مرة تانية علشان ماما متقلقش
- طيب يا ضحى ... سلام
مشيت وسبتها كنت خارجة وانا مقررة اني مش هرجع تاني ابدا هخليه يطلقني في اسرع وقت ويبقى باب واتقفل ومش هفتحه تاني
-قالك حاجة يا ضحى
- لأ يا حفصة
- طب على فين العزم
- هروح البيت
- طب اقعدي معانا شوية
- مش هينفع والله يا حفصة
- هعملك شاي علطول
- لا يا حفصة شكرا
- استني بس
سابتني وجريت يسرعة دخلت وراها علشان اروحلها سمعته هو وطنط صوتهم عالي
-يعني ايه يا زين
- يعني ضحى طالبة الطلاق يا ماما
- ليه ايه اللي حصل بينكم عملتلها ايه يا زين
- معملتلهاش حاجة يا ماما هي شايفة اننا لازم نبعد
- بس انت بتحبها يا بني
- طب وحبي ليها هيفيد بإيه ..مبقاش ينفع خلاص
- طب اقولها انا طيب اشوفها مالها
- اوعي يا ماما انا اه بحبها ونفسي تفضل معايا العمر كله ونفسي تعرف انها مش بس مراتي لأ دي بنتي واني بحبها من اول مرة شوفتها فيها واني عارفها اكتر من نفسها حافظ تعبيرات وشها لما بتكون خايفة ومتوترة عارف شكلها وهي متضايقة وبتحاول تداري وان ضحكتها دي نغمة لوحدها نقسي تعرف ده كله بس خلاص مينفعش
- ليه مينفعش ؟؟! ليه متقولهاش كل اللي انت حاسه ده ، يمكن ده اللي يرجع كل شئ بينكم يمكن هي حاسة انك مش بتحبها نصيحة مني قولها ... قولها يا زين علشان انت بتحبها
محستش بدموعي اللي نزلت ولا بدقات قلبي اللي زادت محستش غير اني عايزة اشوفه وازعقله واقوله ليه ؟؟!! ليه عذبت فلبك وقلبي ، غصب عني انا محتاجة اسمع لكلمات تطمني تحسسني اني مش لوحدي في المركب ان في ايد تانية لو ميلت هتلحقني احنا اتخلقنا علشان نخفف عن بعض علشان نقول كل اللي جوانا منحتفظش بمشاعرنا ونتعب على النقيض ان الطرف التاني محتاج منك كلمة بس !!!
روحت لمحل ورد اختارت بوكيه جميل مسكت الجواب وكتبت فيه "مش عارفة اكدب واقولك شكلك وحش وانت زعلان لأنك حلو في كل حالاتك يلا يا سيدي كبرنا اهو وبنتعاكس "
كتبتله العنوان وطلبت انه يتسلم لزين شخصيا
قعدت اتخيل ايه هيكون ردة فعله طب هيضحك ، طب هيعرف ان انا اللي بعتله ولا لأ بس زي ما كنت السبب في انه يزعل انا برضو اللي هخليه يضحك
-ايوة مين حضرتك ؟؟!
- استاذ زين موجود ؟؟!
- اه اقوله مين ؟ّ؟ّ!ّ
- واحد جاي يسلمه حاجة شخصية
- حاضر هندهولك
- زين يا زين
- ايوة يا حفصة
- اتفضل كلم
- ايوة مين حضرتك
-اتفضل يا فندم الورد ده علشان حضرتك
- علشاني انا
- اه اتفضل ... اذنك
-يا سيدي يا سيدي بقى بيتبعتلنا ورد اهو
-استني بس نشوف مين
خد الورقة وقرأ اللي فيها بصوت عالي
-بتضحكي على ايه
- بضحك على المعاكسة اللي في الورد
- مين بقى يا ترى اللي باعتها
- زين انت بتهرج انت فعلا متعرفش
- معرفش فعلا
- لا انا هسيبك لحد ما تفوق من الغيبوبة اللي انت فيها دي قال ميعرفش مين اللي بعت الورد
- اصله مش معقول تكون ضحى ده من رابع المستحيلات
خبطت على الباب ومن حسن حظي زين اللي فتح
-ضحى خير في ايه ؟؟!!
- هو لازم علشان اجي يكون في حاجة
- لأ بس
قاطعته – مش هتدخلني
-لألأ اتفضلي طبعا
دخلنا وقعدنا كنت هموت من الضحك وانا شايفاه مستغرب وهو بيبص بكل براءة بصة كمان وهعترف بكل حاجة
-احم يلا قوم غير هدومك يلا
- ليه في ايه ؟؟!!
ضحكت – اكيد مش هخطفك ومتخافش يا سيدي هقول لطنط علشان ميقلقوش عليك
ضحك وغمازاته ظهرت بفكر منخرجش انا مش هستحمل واحدة تبصله ولا تحبه مش كفاية انا حبيته
دخل ونسي فونه وحاولت اجرب اي باسورد علشان افتحه لقيت حفصة جات جنبي
-جربي كده تاريخ ميلادك
ضحكت – وتاريخ ميلادي انا هيفتح موبايل زين ليه ؟؟!
-جربي بس
كتبته فعلا ولقيته فتح منكرش اني اتخضيت انا عمري ما تخيلت ان في حد يكون عامل باسورد تليفونه تاريخ ميلادي حسيت ان كل دي علامات من ربنا علشان اعرف انا قد ايه غبية ، غبية لاني كنت هضيع زين من ايدي كنت هكسر قلبي وقلبه وانا مش حاسه
طلع وكان امور كعادته صفرت وضحكت
-ايه ده لأ ده انا كده اعاكسك بقى
برق وبصلي جامد وانا ضحكت علشان عارفة هو بيفكر في ايه هو بيربط بين كلامي والكلام اللي جاله امبارح
خرجنا بس وقفنا شوية عند البحر
-زين
- نعم
- انا بحبك
سبته وطلعت اجري وانا بضحك من شكله وهو مصدوم شدني من ايدي فجأة
-انتي قولتي ايه ؟؟؟!
- بحبك
- وايه اللي خلاكي تقولي كده
- علشان انت جوزي يا زين ولازم تسمعها مني علشان هقتلك لو سمعتها من حد تاني
ضحك – يلا يا ستي كبرنا اهو وبقينا بنغير .
-----------------------
وحبي لم يكن عابرا ولم اكن شخصا وانتهى واعلم ان عشقي لك زاد حد المنتهى 💜💜
#ضحى_كارم
