- ازاي أبقى جميلة ؟
- ايه؟
- أبقى حلوة زيك كده ازاي يا شهد؟ أقصد ازاي أبقى أحلى واحدة في عينه؟
- طب ما انتِ جميلة يا ميار في ايه ؟
قومت من على الكنبة ومسكت طرف الفستان
- حلو الفستان؟
- حلو اوي ، جديد ده صح؟
- اه جديد ( سكتّ شوية وكملت )- تسريحة شعري حلوة؟
- والله قمر
أوقات بحس إني مش جميلة ، إني متقارنش مع باقي البنات ، بحس إني جميلة بس لما ببقى حاطة ميكب ، ووقت ما الميكب بيروح ، بحس إني بقيت شخص تاني غريب عليا ، ف برجع بسرعة أحط ميكب ، في بنات حلوين بميكب وحلوين من غيره ، أنا حلوة لما بحطه بس
قعدت قدام التليفزيون مستنية سيف يرجع من الشغل ، بالصدفة جه إعلان فيه بنت حلوة اوي ، أنا لو بربع جمالها مش هضطر أعمل كل الحاجات اللي أنا عملاها دي ، أوقات بحس إن ضحكتي كمان مش حلوة ، أنا ليه مش جميلة؟
تلقائيًا قومت وقفت قدام المراية ، حاولت أعدل الميكب بتاعي عشان أبقى حلوة شبهها ، الميكب باظ ف عيطت ، قومت غسلت وشي بسرعة ورجعت أحط تاني
هي بشرتي باظت من فراغ!
سمعت باب الشقة اتقفلت ، أكيد وصل
- حمدلله على السلامة
ابتسم - الله يسلمك
- أحط الأكل؟
- تمام هاخد شاور عقبال ما تخلصي
هو ليه مقالش شكلك حلو؟ أنا اه شايفة إن شكلي حلو بس الكلمة بتفرق ، أنا بوظت الميكب؟
- أساعدك في حاجة
بصيت ورايا - لحقت تخلص
ابتسم - اه انتِ اللي واقفة سرحانة ، في حاجة حصلت ولا ايه؟
- لأ
- هعمل أنا السلطة
ابتسمت - ماشي
سكت شوية واتكلم - الفستان شكله حلو اوي عليكِ ، جديد صح؟
سيبت المعلقة من إيدي ولفيت بسرعة
- ايه ده انتَ لاحظت إنه جديد؟ اصلًا حساه مش حلو ، كنت هغيره بقى بس لقيتك جيت ، أنا لما شوفته عجبني ف....هو حلو بجد؟
- اوي
ابتسمت وسكتّ ف قرب مني وشال التوكة من شعري
- شعرك كده أحلى
- بس..بس أنا مش ......
رفع جزء من شعري بإيده ونزل جزء على وشي ، رجع خطوة ل ورا وابتسم
- بالظبط كده
أنا بحس إني حلوة كمان لما بيبصلي ، بحس إن مفيش أجمل مني ، وبرجع أقول إن يمكن بيتهيألي لإني مش جميلة للدرجة دي ، أنا بس لو بطلت تردد..أو إني أثق في نفسي شوية ، الدنيا هتتغيير للأفضل
الصبح بحب أنقيله الطقم اللي هيخرج بيه ، الشوز والساعة ، ببقى مبسوطة وأنا مسؤولة عن الطقم اللي هيلبسه ، فطاره ، مشاكله اللي بنحلها سوا ..بحس إنه واجبي إنه يخرج بطقم شيك ومكوي ، إنه يفطر قبل ما يمشي ، وأهم حاجة إنه يبقى ماشي مبسوط
هو مبيقصرش في حاجة ، دايمًا بيحسسني إن الحياة سهلة طول ما إحنا متفاهمين ، طول ما بنحل المشكلة قبل ما تكبر ، طول ما بيتنا هو مكان أسرارنا ومحدش بيعرف ابدا ايه بيحصل جواه ، بيحسسني إني جميلة ، أكلي حلو والشاي اللي بعمله محدش بيعرف يعمله زيي ، مبيحبش يشرب أى شاي إلا بتاعي، بيحترمني ، بيحترم رأيي وأسباب زعلي اللي أحيانًا بحس إنه مش مقتنع بيها بس بيعديها ، بحبه لإنه بيحسسني إني شخص مميز
- صباح الخير
وقف عند باب الشقة وابتسم
- قبل ما تتكلمي مش هلحق أفطر ومتأخر
- عملتلك سندوتشات ، ياريت مترجعش بيها زي ما هي هه.
أخد مني الأكل وسأل - عايزة حاجة أجيبهالك وأنا جاي؟
مسكت إيده ورمشت بعيوني
- سلامتك يا حبيبي
بصلي بطرف هينه وضحك - و عايزة ايه مع سلامتي؟
ضحكت - جوافة
ابتسم - ياعم أحلى جوافة عليكِ ، حاجة تاني ؟
- لأ تجيلي بالسلامة
كان هيمشي ف قولت بسرعة
- شكلك حلو النهاردة
