- حاولي تتقبلي الموضوع
- مش فاهمه
- هو اخوكي
- تمام
- وأنا بحبه
- أحيه !
- بيبي الموضوع بسيط، ريلاكس كدا
- يعني بتحبيه إزاي يعني وأنا معرفش ؟
- أنا لو بعترفله مش هيكون بالصعوبة دي، بسيطة قلبي شافه قال والله لأحبه يمين بالله لدوب في هواه دوب وجرت الأمور كما خُطط لها
- رحمة هو هيخطب
- طب وآية المش... نعم !!
- زين، أخويا قرر يخطب
- يعني أية قرر يخطب ؟ فجأة كدا ؟
- اه والله
دوست علي سناني - مين الي هجيب بفته بيضا لكفانها
- لسة مش عارف
سكت دقيقة - ثواني، يعني هو بيفكر في الموضوع بس !
- اه
- ومفيش عروسة كدا ولا كدا عينه منها ؟
- نسأل الله التساهيل
- الله يخدك يا بعيدة
- وأنا مالي يارحمة
- يلا علي أوضته، ييي قصدي علي دولابه، يوووه قصدي علي بيتكم يلا هذاكر عندكم النهاردة.
لا مش هبقي بقالي ٣ سنين بحب في الجحش دا ويوم ما النحس يتفك ويقرر يخطب يبص برا، طب ما يبص جوا الاول، دانا مقيمة عندهم وبشوف بيتنا زيارات.
- يالهوي بتعملي أية بس ؟
- ششش خليني اركز، مش عاوزة دوشة
- بتعملي أية في اللاب بتاعه بس يخربيتك.
- بليز التوتر غلط دلوقتي، أنا بعمل عملية حياة أو موت
- طب فهميني، لو دخل وشافنا فاتحين لابه هيقتلنا
- ماهو لو محبنيش بالذوق هيحبني بالعافيه والله الوكيل هيحصل.
نفذت خطتي وطلبت منها تخرج وأنا إستخبيت في البلكونة، كتمت نفسي وانا وشي محمر من كتر الضحك دخل أوضته وانا كنت مشغلة اللاب وسايباه مفتوح، حطيت القطرة في عيوني وخرجت
- رحمة ! انتي بتعملي أية هنا ؟
عليت صوتي وعملت نفسي بعيط - أسكت خالص وليك عين تتكلم معايا، ياطنط يا عمو يا دنيااااا إلحقوني
إتخض - في أية الي بتعملية دا ؟ انتي مجنونة ؟
- اخرس خالص، يا قليل الأدب
- قليل الأدب !!
عمو وطنط ودنيا دخلوا مخضوضين من صوتي وانا جريت وقفت ورا دنيا
- إلحقوني يا جماعة
طنط اتكلمت - في أية يارحمة ؟
عملت نفس بتشحتف من العياط وانا بشاور علي اللاب بتاعه ومكتبه - شايفه يا طنط، كنت داخلة أحمل البرنامج الي هنعمل عليه المشروع بتاع الكلية أنا ودنيا من علي اللاب بتاع زين علشان دنيا معرفتش تحمله وبفتح الفلولدر بالصدفة لقيت صوري عليه، إيدي خبطت من الخضة في نوت علي المكتب لقيتها كلها كلام حب وحاجات إستغفر الله العظيم ليا.
كلهم بصوت واحد - نعم !!
بصيت لعمه وانا بتشحتف وبشهق من العياط - يرضيك يا عمو يحصل معايا كدا ؟ مش دايما بتقولي أنا زي بنتك أنا بنت ناس ومرضاش بكدا أبدًا.
- أية الي انت عملته دا يا زين ؟ دي تربيتي ليك ؟
طنط اخدتني في حضنها وطبطت عليا - بس يا حبيبتي اهدي، أنا مش عارفة اقولك أية يا حول الله يارب
- خدش حيائي يا طنط خدش حيائي وانا الي مبرفعش عيني فيه وبعتبره اخويا الكبير.
زعق وهو بيبصلي - خدشت أية ؟ انتوا مصدقين الهبل دا انا لا يمكن اعمل كدا.
رفعت وشي بنرفزة - تعالي اضربني يلا، تعالي يا متحرش ايوا متعصب علشان كشفت جريمتك.
- يا جماعة إسمعوني أنا...
- زين
كله سكت لما عمو اتكلم، بصلي وقالي - متزعليش يا بنتي انا فعلا بعتبرك زي دنيا وأكتر والي مرضاهوش عليها مرضاهوش عليكي انتي كمان، الغلط لازم يتصلح هاتي رقم والدك هاخد منه معاد مناسب وبأذن الله بكرا هنيجي كلنا لحد عندك هيتقدملك مادام بيحبك اوي وكدا ويرد إعتبراك.
ولية بكرا ؟ ولية ميكتبش عليا النهاردة ويصلح غلطة وينقذ ما يمكن إنقاذه
- بابا أنت بتقول أية ؟
- انت تخرس خالص، الظاهر اني معرفتش اربي.
قلبي دق بسرعة - بعد إذنكم أنا لازم أمشي.
محدش يلعب معايا بعد كدا، حد قاله يوقعني في حبه ويعاملني بذوق مش هو الي بيستفزني كل شوية وانتي زي دنيا انتي زي دنيا، يقابل بقي.
قعد قدامي متوتر لابس قميص وبنطلون وبيبص في الأرض يعني انت حلو بدقن وجود بوي وكمان متدين وبتغض البصر ! ياخي حسبي الله ونعم الوكيل فيك
- رحمة أنا مش عارف اقولك أية بجد، بس الي مش قادر أفهمه ليه بيحصل معايا كدا ؟ واشمعني انتي بالذات !
بصتله بغضب مصطنع - إسكت لو سمحت وخلي القاعدة دي تعدي علي خير، علشان أخرج أرفضك وأخلص بقي.
-طب.. طب انتي مصدقة طيب إني ممكن أعمل كدا ؟
والنبي بلاش بصة البراءة دي وربنا أعترف وابوظ الدنيا والله أبوظها.
نزلت وشي بحزن - أنا شوفت بعيني، أنت متخيل إني كنت بدخل بيتكم كأنه بيتي التاني.
- عارف والله
- أنت عارف أنا كنت معتبراك أية ؟
- أية ؟
- حبيب.. اخويا طبعا اخويا الكبير
- والله انتي زي دنيا بالنسبالي
يحرق دنيا وسنين دنيا، اموتها وارتاح ؟
- أنت عارف أية جيه في بالي لما شفت الصور ؟
- أية ؟
- أنك متحرش وبتتحرش بالبنات الورور الي زيي في المترو وبتقطع ليهم كم البلوزة الشيفون
- واشمعني شيفون ؟
- نعم !
- قصدي أنتي خيالك بعيد اوي أحنا مش في فيلم الكرنك، انتي اختي الصغيرة.
- أسفة يازين، أنا مش قادرة اسامحك ولا قادرة اصدقك.
- إستني يا رحمة
- هنادي بابا، بعد أذنك.
مين بقي مخطوب ناو، اه بحبه ودبسته في جوازة وبينت إني مش طايقاه ومغصوبة عليه وعملتله بلوكات من كل حاجة ورفضته تلت مرات ياكش يهتم ويحس بحبي لية.
- صباح الخير ؟
مسكت الفون و رفعت راسي من علي المخدة..
- زين ! انتوا كويسين ؟ دنيا جرالها حاجة ؟
- في أية يارحمة، بقولك صباح الخير
- صباح الخير ٦ الصبح ؟ لية يا حبيبي كدا، هنروح نبيع لبن ؟
- حبيبي !
تجاهلت وكملت
- صباح النور يازين
- ....
وطيت صوتي وانا كاتمة الضحكة - زين، يا زين انت معايا؟
- ها! أحم، تيجي نفطر برا ؟
كنت عارفة أنه بيحاول يقرب مني بس دا من إحساسه بالذنب، أنا عايزاه يقرب حب، مش معني اني مثلت عليه مرة اني اكمل تمثيل، لازم يحبني بطبيعتي زي مانا كدا.
- تمام نفطر
نزلت ولبست فستان أبيض وخمار وردي ملون، كنت عاوزاه يشوفني، يمسح صورة الاخت الصغيرة ويبصلي كحبيبته.
- ها هنفطر فين ؟
- تحبي تروحي ماك ولا kfc ولا أية رأيك نروح كافيه ؟
عاوز يبين أنه معاه فلوس يعني ولا اية مش فاهمه برضو.
- اه قولتيلي، حلو اوي الكلام دا، بص يا سيدي أحنا نروح نضرب طبقين فول بالطحينه من عند عم محمد الي علي أول الشارع، سلطات، بابا غنوج، شوية جبنه بقوطة نحبس بكوبايتين شاي في الخمسينه او نضرب ٢ شوب قصب محترمين ونبقي نفكر نعمل أية تاني ؟
- فول وجبنه وشاي !!
- متنساش القصب من فضلك، انت بخيل ولا أية ؟
شد ونرخي ونشد ونرخي، شوية أكلمه حلو والدنيا جميلة وفراشات ملونة، وشوية....
- صباح الخير يا حبيبي
- صباح النور يا قلبي
- أنت ازاي تقولي يا قلبي ؟
- ما انتي لسة..
- ضوابط الخطوبة يا استاذ، ضوابط الخطوبة يا بيه.
- والله ما قصدت طلعت لوحدها كدا.
هيوقف قلبي يخربيتك، سونيا إلحقيني
- ولو، اعتبرني واحد صاحبك
- متأكدة ؟
- طبعًا
- هستحملي ؟
- اومال
احلي حاجة فيا إني بستحمل اي حاجة، اه والله أي حاجة.
- والله يا دنيا لو اخوكي ماغير معاملته معايا ل...
- أية هتسبيه ؟
- لا طبعًا هحبه أكتر، قصدي هنيلها علي دماغه وأنا معاه عادي.
- مش الحلوة الي طلبت.
- وأنا عملت كل دا لية ؟ مش لأجل بصيص الحياء الي جوايا ؟
- طب اقولك، قوليله انك بتحبيه
- ويفيد بإيه البوح لو البعيد لوح
- طب اتدلعي عليه
- أية ! انتي فكراني أية ؟ لا يمكن أبدًا.
دا بيعاملني معاملة عبيد قال اتدلع قال، لا يمكن مستحيل هيسبني ؟ يسبني، شرفي لأ.
- صباح الخير يا بيبي
- بيبي !
- نمت كويس يا روحي ؟
- رحمة ؟ انتي مالك ! في أية ؟
- هو لو اتطمنت عليك ابقي غريبة يعني، اخس عليك.
- اطمني براحتك مقولتش حاجة بس، مش عارف حسك غريبة.
- لأ عادي، قولي بقي عملت أية النهاردة ؟
- أنا لسه صاحي
اغير الصيغة يمكن يفهم أني مهتمة يعني ولا اعمل أية ؟
- زين مبيجيش لية يا رحمة ؟
اقولها أية بقي ؟ مسكت في ضوابط الخطوبة واديته الوش الخشب ياكش هرموناتي ترتاح
- مش عارفة يا ماما
- طب أكلمه أعزمه علي الغدا ؟
- ها! عادي يعني
- ماشي بلاش
- أية ! ورحمه ابوكي يا شيخة لتصلي.
ألبس أية ؟ أسود ؟ لا هيقول عليا متشائمة
ألبس أبيض ؟ لا يقول ملهوفة علي الجواز
ألبس أية بقي، هو انا معنديش لبس لية زي البني أدمين
- حلوة الفستان دا اوي
- بجد ! عجبك
- جدا إختياراتك هادية ماشاء الله.
- الله يعزك مانا شايفة النتيجة قدامي اهو.
- أية !
- لا متاخدش في بالك، تاكل رز بلبن ؟
- إنتي الي عاملاه ؟
إتردتت ثواني وبصتله بجدية - لأ، أنا مبعرفش أطبخ، بس بأذن الله هتعلم أنا بتعلم بسرعة
- مشكتش دقيقة إنك تكدبي عليا والله.
- بيان علي ملامحي ؟
- جدا
غشيم، والله غشيم.
- مبتحبش الكدب؟
- ومين بيحبه
بصتله بخوف - حتي لو كدبة بيضا بغرض شريف ؟
- مفيش حاجة إسمها كدبة بيضا وكدبة سودا، الكدب يعني الكدب ملوش تفسيرات تانية يا نقول الصراحة يانسكت أفضل.
سكت فعلًا وكلامه رعبني، يمكن متخيلتش في يوم إني أشيل سر زي دا ويبقي زي الجبل علي قلبي أو أجبره علي حبي بالطريقة دي
- كنت عاوز اتكلم معاكِ في موضوع
- اه، اتفضل
- أنا عارف ان موضوع جوازتنا من بدايته غلط وغريب، انتي اتغصبتي وأنا كنت حاسس بالذنب لمجرد انك وقعتي ضحية لشخص متضايق مني ولحد الان معرفش مين هو، بس أنا بخيرك دلوقتي، أنا كدا كدا كنت هستقر وكنت هختار بالعقل فالحمدلله، الي عاوزك تعرفيه أنها جوازة عقل ومفيهاش أي مشاعر لو حابة تكملي برضاكي هكون سعيد ومش هلاقي أحسن منك، لو لا ربنا يوفقك مع الي احسن مني
- أنا...
- هسيبك تفكري، من دلوقتي لحد كتب الكتاب بيوم، لو موصليش رد هتعبر أنها إشارة نكمل.
الايام الي فاضلة علي كتب الكتاب بتجري وخوفي بيزيد مش لأجل توتر عرايس الكلام دا، لأجل احساسي الي اتجوزوا دول انهم راحت عليهم خلاص مبقوش بني أدمين زينا بس والعمل ؟ يعني بعد كل الي عملته دا ومفيش فايدة ؟ مش قادر يبصلي، لسه مش حاسه بالحب الي اتمنيته ؟ أنا مش عاوزة عقله أنا.. أنا عاوزة قلبه.
- هتجازفي ؟
- مش عارفة
- أنا خايفة عليكي.. هو اخويا اه بس انتي صاحبتي وحياتك تهمني برضه.
- خير، خير بأذن الله
لبست فستان كتب الكتاب، وقعدت متوترة قلبي بيقولي دي فرصتك يمكن بعد الجواز يقدر يشوفك ويحبك وعقلي بيقولي يوم ما يعرف مش هيرحمك ولا هيسامحك
أنا مش خايفة من الطلاق، أنا.. أنا خايفة ليكرهني
- انتي راحة فين ؟
- مشوار مهم وراجعة
- دلوقتي ؟ فاضل ساعتين علي كتب الكتاب !
- لازم اروح، متقلقيش مش هتأخر.
خبطت علي الباب، واخدت نفس عميق، ودخلت
- رحمة !! انتي أية جابك هنا دلوقتي ؟
- ...
- في أية ؟ حد حصله حاجة ؟ انتوا كويسين ؟
كان لابس بدلة جراي وقميص أزرق وشكله حلو بشكل.. بشكل مُحزن لقلبي، مُحزن جدًا
- أحنا كويسين متقلقش
- طب حصل أية؟ مش المفروض تبقي في البيت بتجهزي دلوقتي ؟
غمضت عيوني - أنا عايزة أقولك حاجة
- دلوقتي ؟ نزلتي من بيتك بالفستان دا قبل كتب كتابنا بساعة علشان تقوليلي حاجة ؟ مانا كنت جيلك.
- انا...
إتخض من عياطي المفاجئ - انتي بتعيطي كدا لية اهدي طيب والله خلاص مش هسأل ممكن تهدي بقي
اخدت نفس ومسحت دموعي - زين
- نعم
- أنا ضحكت عليك
ضحك علي كلامي - ضحكتي عليا ازاي يعني ؟ شربتيني حاجة أصفرة ؟
ملامحي متغيرتش فسكت - أنا بتكلم جد
اتكلم بهدوء - ضحكتي عليا في أية ؟
- أنا صاحبة ال...
مامته دخلت - يا ولاد انتوا لسه هنا ؟ يلا علي الجامع، اخدتي الي كنتي عاوزاه يا رحمة ولا لسه ؟
هزيت راسي ونزلنا، وصلنا الجامع، وصلني عند مصلي السيدات وانا خايفة لا لا لازم أوقفه
- زين متروحش
ضحك - هكتب الكتاب وارجع هوا اقعد معاكي واعرف ضحكتي عليا في أية
- يا زين إستني، زين...
