_ها ملكيش حجة خلاص اللي كُنتِ بتدعي بيه جالك راكع أهو ومن الباب زي ما انتِ كُنتي عاوزة ،، وافقي بقى أبوس ايدك عاوزين نفرح!
_نفرح؟ طب مش مكسوفة وانتِ بتقولي الكلمة دي قدامي! أنا ليلى اكتئاب يتقالي نفرح! وبعدين ماتفرحوا ياجماعة هو أنا حابسة الفرحة يعني؟
_ده أنا اللي هروح فيكي تأبيدة لو موافقتيش ياليلى ،، مش عاجبك ولا حد في العالم؟ كُل شخص يجي هتفصصيه كده؟
_مش للأبد! يبقى لازم يتفصص زي السمك.
_سمك؟ حتى الأمور الجادة بتشبهيها بالأكل! وبعدين لأ طبعًا مش للأبد أومال الطلاق موجود ليه؟ علشان بعد الشر لو محصلش نصيب ولا تفاهم كُل واحد يروح لحاله بالمعروف!
"الجملة دي سمعتها في حياتي أكتر ما اتنفست ،، ولأ أنا مش مجبرة أختار بالحادي بادي وأقول ما هي لو ضاقت أوي هتطلق وكإن الطلاق ده أمر هين! طب ليه أختار شخص غلط من البداية لما ممكن أستنى الصح ياعالم! هو أنا داخلة على الستين يعني؟ ما العُمر لسه قدامي ولو العلاقات تجارب فأنا قلبي مش تجربة"
_عندك أي أسئلة يا ليلى؟
"يافتاح ياعليم يارزاق ياكريم هو هيصاحبني ده ولا إيه؟"
_ليلى؟
_آ .. أسف أقصد يا أستاذة ليلى؟
_أستاذة!
_طب أقولك إيه طب؟
_أقولك! بص ياكابتن "آنسة ليلى" ومبحبش أستاذة ولا ليلى حاف كده لإننا مش قاعدين في كافية بنشيش سوا يعني!
بإستنكار_بنشيش؟
_بنشد نفسين؟
_هو انتِ ليلى ليلى اللي بشوفها فالشارع؟
_برضو هيقولي ليلى حاف وكأننا مازلنا قاعدين في الكافية بنشيش!
_الصبر من عندك يارب ،، عند حضرتك أي أسئلة يا أنسة ليلى؟
_طبعًا مش هسألك عن الصلاة لإنك أكيد بتصلي مش كده؟
اتوتر_ آ آ اااه بصلي طـ طبعًا
_إوعى تكون مبتصليش!
اتوتر أكتر ووشه بدأ يجيب ماية_ ل لاا طبعًا بصلي.
_مش هسألك في المسجد ولا لأ لإن أكيد في المسجد.
_ا ااه فـ في المسجد ط طبعًا
_تعرف ضوابط الخطوبة؟
_آ ..
_ولا أنا في الحقيقة أعرفها بالظبط بس كل اللي أعرفه إني مش هقعد معاك إلا في وجود أخويا اللي لازق فيا دلوقت ده وإني مش هخرج معاك ومش هكلمك في الموبايل علشان بيجيلي كرشة نفس من الكلام في الموبايل وطبعًا مش هكلمك على أي موقع من مواقع السوشيال ميديا لإنها بتجيب المشاكل وأنا ست بتحب الهدوء التام .. الهدوء الإيه؟
اتلجلج_التام.
_قولي بقى بتحفظ قرآن؟
بَص في الأرض من غير ما ينطق ولا كِلمة فـ فهمت يعني
_في الحقيقة ولا أنا بحفظ بس مافيش مانع لو حصل نصيب نحفظ سوا ولا إنتَ عندك مانع؟
اتكلم بهدوء شديد مقدرتش أفهمه: لأ يا أنسة ليلى مافيش مشاكل ،، أنا هستأذن وإبقي بلغيني رأيك في أقرب وقت وقام مد إيده لأخويا بنفس الهدوء ومشى شارد.
_غسلتي الواد وتقوليلي مشى لونه مخطوف! ده انتِ طلعتي روحه!
_أنا يا ماما؟
_أيوة انتِ وأنا شيفاكي بعيني وانتِ بتطلعي روحه! منك لله يا ليلى يابنتي يا كاسرة فرحتي دايمًا.
_مااامااااا ماااماااااا مش قدرالك!
_وبعدين معاكي ياليلى؟
_ايه ياسلمى ايييه!
_ايه في عينك! مش ده عَلي اللي كان قلبك بيتشال من مكانه لو لمحتيه في الشارع؟ مش هو ده اللي مافيش سجدة سجدتيها مكنش إسمه فيها؟ وأهو جالك عاوزه إيه تاني!!
_عاوزاها تكمل على خير.. حرام!
_لا ياستي مش حرام بس إيه اللي مش هيكملها على خير يعني؟ ماهو داخل البيت من بابه أهو وطالب الحلال!
_وعلشان الموضوع يكمل على خير لازم الذنوب متدخلهوش ياسلمى ،، لازم الذنوب متدخلش العلاقة.
