- هتخرج بره دلوقت تقولهم إنك مش موافق، وإلا والله العظيم هقلبها على دماغك
- هتقلبي إيه ؟
- لا مش أنا يابابا اللي تعمل حاجة غصب عنها، ولو فاكر انك كده هتخليني أوافق تبقى غلطان
- قمر وهي متعصبة ياربي
- واللي خلق الخلق أجيب بطنك
- لا وشبه عبده موتة وشرسة في نفسها
قعدت - طلباتك ايه واخلص
حط رجل على رجل - ما أنا قولت لعمي طلباتي
- انت قاصد تيجي في الوقت ده، بس وربنا ماهعديهالك
- انتي مش موافقة عليا ليه ؟
- بكرهك، أنا بكرهك، بكرهاااااك.
- طيب وأنا بحبك وكل واحد حر في مشاعره
- دا أنت غتيت
- انتي بتتكلمي بصوت واطي ليه ؟
- علشان بابا لو سمعني هيموتني.. قصدي ي.. وانت مالك !
- طب عملتي مصيبة إيه المرة دي ومخلياه زعلان منك ؟
- يعني عارف انه زعلان علشان كده قصدت تيجي دلوقت، تعرف لو الموضوع كمل واتجوزنا، والله لاعيشك أيام أسود من شعر راسك
- بس أنا شعري مش أسود
- متعصبنيييييش
- يلا قرري بسرعة علشان حاسس اننا بنسرق بالهمس اللي بنعمله ده
- ما أنا قولتلك هتخرج دلوقت تقولهم متفقناش، وليك الحلاوة
- طب عرفيني عمي زعلان منك ليه الأول
- ياعم نطيت من الشباك، فيها ايه دي !
- نهار مش فايت ! نطيتي !
- ماهو البت أسماء كانت مستنياني تحت وهما قافلين الباب ومش راضين يخرجوني، فنطيت
- الله على بختي، وحد شافك !
- لأ الساعة كانت 1 الصبح متقلقش
- طب الحمد ل .. أحيه
- فحلف عليا مفيش خروج تاني، وقالي هرميكي لأول واحد يجي، دي عمايل ولاد بلد ؟
- دا والدك برضو ميصحش
- ياعم بقى بلا يصح بلا بتاع، معاك سجاير ؟
- سجاير !!
- شكلك ورور ومبتشربش.
- انتي ازاي بتتكلمي كده !
- من بؤي
- قصدي يعني انتي بنت، عيب تتكلمي كده
- يا أوساز الشغل ده مبقاش يأكل عيش، هتريحنا نحطك على راسنا، غير كده أخلع علشان مخلعش صف سنانك.
- أنا شوفتك أكتر من مرة وكنتي هادية، ولبسك كمان كويس
- ياباشا دا لزوم الأونطة، بس أنا أصلا بخرج بفوق الركبة، قولتلي بقى معاك سجاير ؟
وقف وهو متنحلي - أنا مستحيل اتجوزك، مستحيل
- ليه بس ياأوساز توقف حالنا كده، حد داسلك على ديل ؟
- ديل !!
- متبقاش قفوش أومال، ها قولتلي كتب الكتاب امتى ؟
- كتب كتاب ايه !
- كتابنا ياعمنا، علشان نعلي الجواب زي مابيقولوا.
- انتي مش طبيعية، أنا ماشي.
أصله اترفض مرتين قبل كده، مستني بابا يزعل مني علشان يجي فاأنا مقدرش اتكلم، بس على مين ! ولو قولتله اني بحب حد اصلًا هيقول لبابا وحقيقي بابا هيدبحني كأضحية بدل مايشتري أضحية.
- ايه ياحنان، أحمد خرج بسرعة ليه كده !
- معرفش يابابا، حتى مشربش العصير.
- غريبة، مع انه هو اللي كان مُصر يجي تاني
- الناس بقت غريبة وتصرفاتها غريبة يابابا، هروح أنام أنا بقى علشان تعبت أوي
- تصبحي على خير ياحبيبي.
نمت على السرير شوية، وبعدين عدلت المخدة وقعدت، شوية وأسماء اتصلت، بنت حلال والله مكنتش لاقية حاجة أعملها
- ايه ياكوكو عملتي ايه معاه
- خاف وهرب
- يبقى سمعتي كلامي
- حاسة اني زودتها ياأسماء، دا خاف فعلًا
- مش انتي اللي عاوزة تطفشيه
- أيوة أطفشه بس افرضي قال لبابا حاجة
- هيقوله بنتك متربتش ياحاج !
- ايه ماتربتش دي ماتختاري ألفاظك يابتاعة انتي
- دا لو فكر انك متربتيش كده هيبقى كارمك أوي، ادعي ربنا تفكيره ميروحش لحاجة تانية.
يوه بقى، ماهو مكنش فيه غير الحل ده، أعمل ايه يعني، أنا مينفعش اتخطب دلوقت، والله ماينفع، عندي طموحات عاوزة أحققها طمحة طمحة، وبعدين أنا بحب ومش هتجوز غيره لو موتوني موت موت كده.
- ها ياحنان، قررتي ايه ؟
- في إيه ياماما ؟
- في العريس
- عريس مين !
- أحمد يابنتي مالك !
- أقرر ايه ماهو رفض خلاص
- رفض ازاي ؟ لسه متصل دلوقت وقال انه موافق.
قلبي وقف وحسيت اني دايخة - موافق على ايه ؟
- يتجوزني، أكيد يتجوزك يعني
- موافق ازاي هو معندهوش نخوة !
- يعني إيه ؟
قعدت على السرير، كنت حاسة اني مضروبة على دماغي والله، أنا أصلا مفكرتش في الموضوع تاني علشان خلاص عرفت انه هيرفض، بتعمل فيا كده ليه يابني !
- ماما بالله قولي لبابا اني مش عاوزة دلوقت
- حنان متزودهاش بقى، هو أصلًا زعلان منك فمتزوديش الموضوع، احمدي ربنا انه عدى موضوع التقدير اللي ضاع ده على خير
- يعني تخيلي مبجبش تقدير وبعدي بالعافية وأنا مش مخطوبة، لما اتخطب هعمل ايه !
- اتكلمي معاه انتي
- ياماما بيكلمني بالعافية والله.
لما ماما خرجت اتصلت بأسماء تشوفلي حل
- كملي الخطة وهو هيخلع والله متقلقيش
- يخلع ايه ؟ بقولك قولتله هات سيجارة، انزل لمستوى ايه تحت كده كمان !
- خلاص هتقوليله كنت بهزر معاك علشان يتمسك أكتر ! ، مفيش حل غير كده.
- أنا كرهته أكتر ما أنا بكرهه.
- هو عملك حاجة يابنتي !
- اتقدملي وأنا بحب واحد
- وهو يعرف منين !
- يحس.
كنت قاعدة جمبه يوم الخطوبة وبدعي هزة أرضية تحصل، حسيت ايدي تقلت بالدبلة وكانت مضيقاني.
- لعلمك أنا وافقت علشان استر عليكِ
- نعم !
- شوفتي نعم طالعة حلوة ازاي، اتكلمي كده على طول.
- اخويا اللي مجابتهوش أمي.
- أنا خطيبك !
- آسفة والله مقصدش، خطيبي اللي مجبتهوش أمي.
- انتي غبية ! ما طبيعي يعني أكون مش أخوكِ ولا والدتك تجبني.
اتوترت - م.. ماهما بيقولوها كده والله، أنا آسفة.
- يانهار ملبن، قولي آسفة تاني كده.
كنت هضحك وبعدين افتكرت اني المفروض اطفشه فسكت.
اتكلم تاني - قوليلي واحدة آسفة من فضلك.
- ما خلاص بقى ياشبح مش فرح العمدة هو.
أعمل ايه في الكارثة دي ! طب واللي بحبه ده ؟ يعني اتخطب من غير الكراش مايعرف اني بحبه ؟ دا حتى حرام.
- بصي ياستي، احنا هنبدأ خطوة خطوة وان شاء الله سلوكك هيتحسن.
- أحمد من فضلك أنا مش طايقة نفسي.
- قولي أحمد تاني كده.
- يخربيت أم الغتاتة.
- اكتشفت انك بتتكلمي بالاسلوب ده لما بتتعصبي، فأنا مش هعصبك.
- طب اخلص، خد وادي بشكل ودي علشان عاوزة انام.
- ايه حكم التكاتك اللي بتقوليها دي !
- يازميلي والله تعبانة.
- خلاص نامي وهكلمك بكرة.
- لأ متكلمنيش لاني تعبانة على طول.
- ما هو..
قاطعته - هو ايه ممكن يكرهك في بنت صح ؟
- تكون ناقصة أدب ومعندهاش حياء.
- أيوة يعني بتعمل ايه ؟
- تقول لخطيبها بحبك مثلًا
- وغلاوة سيدك اللالي !
- مبهزرش، وتصحيه الصبح تقوله وحشتني.
- طب قول صفة تانية غير دي ممكن تكرهك في بنت.
- تحتوي خطيبها أوي.
- يا بتاع انت اصحى انت بتنام وبتحلم !
- اسمي أحمد.
- عاشت الأسامي، يعني أقصد بتكره ايه في البنات عمومًا، صفة مستحيل تكمل معاها، حاجات كده.
- أيوة فهمتك، انها تكون شبح زيك كده.
- اللهم صلي على كامل النور، كمل كمل.
- وتكون جواها كائن منحرف مثلًا، مبحبش البنات دي أبدًا
- انت جبت الخلاصة في المصاصة، اقفل بقى.
دا أنا أصلًا ماما كانت هتسميني في البطاقة منحرفة، بس محبتش الإسم وكتبته حنان، دا انت جيت في ملعبي يا لا، بتكره المنحرفين ؟ يا هلا والله بالإنحراف.
- أكون منحرفة ازاي ؟
رفعت شعرها بالتوكة وهي بتعض شفايفها - bad girl يعني.
- بدأتي تفهمي.
- إمرأة يخشاها الرجال.
- هما مبيخشوش ولا حاجة، هما بيحبوا النوع ده أصلًا
- ما علينا، نبدأ بالدروس ياصاحبي، عاوزة بس أقولك انك جيتي للمكان الصح.
- معرفش والله يا أسماء أودي جمايلك دي فين.
- كليها، تعرفي تاكليها ؟.
أسماء دي الشرسة بتاعتي، الأنثى المتوحشة من وجهة نظري، أعلى ليڤل في الإنحراف، صديقة سوء من الآخر.
- انتي تدخلي عليه بقلب جامد كده، وتقوليله بص علشان يكون في بينا عمار، أنا مش..
- ده انحراف ! فين السكينة ؟ فين المطوة ؟ فين ال..
- انتي داخلة محاضرة اناتومي ؟ وبعدين سيبك من الأفلام اللي بوظت عقلك دي.
- أنا حاسة اني اتدبست يا أسماء، بابا بيحبه أوي، طب هقول للكراش بحبك طيب وبعدين اتخطب عادي.
- الكراش طلع مرتبط.
- هاتي يادنيا، هاتي كمان
باقي خطوة واحدة هعملها وبإذن الله هتجيب نتيجة، بإذن الله يعني أنا حاسة.
- ماما أنا طايشة، والله مبهزرش أنا مش هعرف أفتح بيت.
- عادي كلنا كنا حاسين كده.
- طب بصي والله في دي بتكلم بجد ومش بهزر زي كل مرة، أنا مش مستعدة لكده، مش علشان دراسة أنا كده كده فاشلة، بس حاسة اني صغيرة والحياة قدامي، ممكن أقابل أحسن من أحمد بكتير، ليه أكمل حياتي مع شخص ممكن ألاقي الأحسن منه.
- علشان مش مكتفية بيه، محبتهوش لسه، لما تحبيه مش هتشوفي أحسن منه أصلًا
- بس أنا مبحبهوش.
- خدي وقتك.
وقفت علشان تمشي - نامي دلوقت، بس اعرفي ان الحب مش سبب توافقي على أساسه على الجواز، عقلك لو حب، قلبك هيدق، فشغلي عقلك.
عقل ايه وقلب ايه دلوقت ؟ هو مش عارف يخليني أحبه، مبخافش منه، وأنا لازم أتخض من صوته كده، لازم قلبي يدق لمجرد اني سمعت اسمه، ارتعش لما يقف قدامي، في خضة لطيفة كده بتحصل، وأنا مش عاوزة اتحرم منها، مش عاوزة امشي بعقلي بس، ليه أعيش بحلم بالحب زي كل البنات وفي الآخر يتقالي عقلك يختار أهم، أومال لازمة قلبي ايه !
- في حاجة مضيقاكِ صح ؟
- بتقول ليه كده ؟
- حسيت.
- لا مش متضايقة، ادعيلي معاك، تصبح على خير.
هو مفيش جديد غير ان الايام بتعدي، ومعرفش ليه مُصرة اطلع قدامه بدور الشبح، كان آخر أمل قدامي انه يسيبني بسببه، لإني مكنتش هقدر أقول لبابا اني مش مرتاحة.
- ايه الهدية دي !
- مطوة.
- انت بتهزر صح !
- لا والله، حسيتك هتحبيها.
- هحب مطوة ؟ ليه شايفني حمو بيكا !
- أسوأ.
- خف العسل علشان مقومش العب بيها في وشك.
- باقي اسبوع ونكتب الكتاب ونشوف موضوع وشي ده.
- انت فاكرني هتهدد ولا ايه ! لازم تعرف اني مبخافش.
- طب بتعرفي تستخدميها ولا أعلمك.
- ياباشا أنا بمسك سكاكين، خد القصافة اللي انت جايبها دي وروح.
- دي ذكرى.
- دي أوحش هدية جاتلي.
- ما هو انتي بصراحة مينفعش يتجابلك دبدوب وعرايس زي البنات.
- ليه شايفني واحد صاحبك !
- ياريت.
ماما عندها حق، كفاية عقلي موافق، وهو متقبلني كده فدي كفاية، وبعدين الحب ملهوش لازمة بعد الجواز، مبيأكلش من الآخر.
- مبروك ياصاحبي، كده كتبنا الكتاب وعلينا الجواب زي ماانتي عاوزة.
- الله يبارك فيك يازميل.
- ايه العلاقة القذرة دي !
ضحكت - متعرفش انت العلاقات المعفنة دي بتنجح ازاي
ابتسم - ضحكتك حلوة على فكرة.
- هه !
- ضحكتك، ضحكتك حلوة.
بلعت ريقي - شكرًا
- وعيونك حلوة.
- ش .. شكرًا تاني.
- وصوتك أ..
- هقوم أشرب.
وقفت قدام التلاجة بمسح عرق من على وشي، هي بقت حر كده ليه ! وزعلان لو ارتبط بواحدة منحرفة ! في واحد محترم يقول لمراته ضحكتك حلوة ! مبقاش في أدب.
هما بيقولوا ان يوم الفرح أحلى يوم في العمر، بس أنا شايفة كل يوم بنعمل في ايه انجاز معين لازم يتسمى بأحلى يوم، فكرة يوم الفرح بس انك بتتعاملي كملكة ولابسة فستان تحسي بيه انك من سلالة ملكية.
قرب دراعه - انجچ يا لا.
- لأ عيب.
- يلا والله أشيل دراعي.
- لأ استنى جيالك أهوه.
متفقين في التفاهة الحمد لله، دماغه حلوة ودمه خفيف ودول أكتر صفتين ممكن يجذبوني لراجل بصراحة.
- مقولتليش بقى كنتي بتتصرفي كده ليه في الخطوبة ؟
لفيت بالفستان في الشقة - أنا فرحانة بالفستان أوي.
- أقفي بقى أنا دوخت، وردي عليا
- ده وقت سؤال ! دي معاملة تعامل بيها ضيوف ؟
- كنتِ عاوزاني اسيبك وأمشى صح ؟
- لأ طبعًا، يا باشا أنا فعلًا كده، جوايا كائنات منحرفة فعلًا، انت بقى قبلت تتجوزني ليه ؟
مسك إيدي فوقفت زي العبيطة مش قادرة اتنفس، أول مرة راجل يلمس ايدي، باسها وكإنه كان قاصد يوقف قلبي، الدقة الخفيفة اللي كنت عاوزة أجربها، ونفضة القلب اللي عيشت أحلم بيها.
اتكلم - علشان كنت عارف اني لو قربت بس كده هتتوتري وتبقي قمر زي ما أنا عاوز.
لا مكنتش عاوزة ابان مهزومة يعني، وانه فعلًا عنده حق أنا قلبي بيجري مني جوايا ومش عارفة أوقفه.
شديت ايدي وعليت صوتي - على فكرة بقى متأثرتش.
قرب - احلفي.
مسكت في هدومه من الخضة - أحمد.
- ياقلبه.
- قلبي بيدق الله يخربيتك.
" حتى قبل أن التقيك، لم نكن أغرابًا "
#أسميته_أحمد
#حنان_سعيد
