- نوسة، افتحي يا بت.
= مش فاتحة، وروح شوف وراك إيه.
- هكسر الباب فوق دماغك.
= براحتك، إنت إلي هتصلح الباب وتعالجني.
- طب احكيلي إلي حصل يمكن أعرف أحل المشكلة.
= مشكلتي مش هتتحل.
- إديني فرصة أحاول على الأقل.
= ولو حل المشكلة قصاده إنه تسيبني، هتسيبني؟!
- فهمت، يبقى حد اتكلم تاني عن الحمل إلي ما بيكملش؟!
فتحت الباب = اه.
- مين؟!
= مش مهم مين، المهم إنهم مغلطوش وإنها الحقيقة.
- طيب وإيه إلي زعلك في كده، مش انتي راضية بابتلاء ربنا لغاية ما يكتبلنا الذرية الصالحة.
= راضية والله راضية، بس الضغط عليا زاد، والأسلوب بقى معايبة أكتر منه إنهم نفسهم يفرحوا بولادنا، تخيل إنهم بيجيبوا أدامي سيرة رجالة سابوا مراتاتهم عشان الموضوع ده واتجوزوا تاني عشان يخلفوا، إنت متخيل أنا بقيت بسمع إيه في أى تجمع عائلي مؤخرا!!
- يعني إنتي شايفة إني ممكن أسيبك عشان حاجة زى دي؟!
= إنت حقك تعمل إلي إنت عايزه، وانا هرضى بيه ومش هزعل والله.
- طب ممكن متعيطيش؟!
= كلامهم كان قاسي أوي يا مصعب، مبقتش قادرة أستحمله.
- طب هو ممكن اعتذاري ميكونش كافي، بس أنا بعتذرلك نيابة عن كل إلي حاولوا يضايقوكي دول، ممكن بقى تصلي على النبي كده وتمسحي دموعك وتروحي تصلي وتدعي ربنا بالخير وبس، وبكرة بإذن الله هنشوف دكتور تاني.
= تفتكر كلام الدكتور ده هيتغير عن الي قبله والي قبله؟!
- احنا اتفقنا ندعي بالخير وبس، ونسيبها لله.
= ونعم بالله.
*******************
* عند حضرتك التهابات في التجويف الداخلي للرحم وده بيأثر بصورة سلبية على انغماس الجنين داخل الرحم وبالتالي بيؤدي لنزوله قبل اكتمال نموه.
- طب والعمل يا دكتور، احنا لفينا على دكاترة مصر كلها تقريبا، ومنهم الي قال عيب وراثي، أو عيب في نمو الجنين، أو مشاكل في عنق الرحم، والي يقولنا مرض القطط، واحنا زهقنا من كم العلاجات إلي ملهاش نتيجة دي، فلو فيه جراحة بس تكون مضمونة احنا جاهزين.
* ولا جراحة ولا حاجة، شوية أدوية وحقن لعلاج الالتهاب وتنظيم الهرمونات عشان واضح إن ليها تأثير سلبي على نمو الجنين، وتجولي بعد شهر.
= طب ووسيلة منع الحمل، أنا مش باخدها مؤخرا.
* هكتبلك على أقراص كويسة هتستمري عليها فترة بسيطة لغاية ما نعالج الالتهاب الأول وبعدين ممكن توقفيها عادي.
**********************
- تعرفي إني اتفائلت أوي بالدكتور ده.
= وأنا خفت أوي من كلامه.
- ليه بتقولي كده، كل كلامه كان كويس وإن فيه أمل كبير نعالج المشكلة دي.
= مش عارفة، بقيت خايفة أتفاءل، حاسة إن العلاج في حالتي دي اليأس، عشان الصدمة تبقى خفيفة عليا.
- وراح فين حسن الظن بالله يا متعلمين يا بتوع المدارس!!!
= موجود طبعا، هو احنا عايشين إلا بيه، بس خايفة أكون بعيش نفسي في وهم.
- عمر الدعاء ما كان وهم، دايما لإما مستجاب، لإما مدفوع بيه أذى، لإما أجر بتاخديه، يعني كده كده كسبانة كسبانة.
= طب شوفلي كده الدوا ده لإيه؟!
- استني كده لما أقرأ... مش عارف.
= أومال دكتور إزاى!!
- انا دكتور جامعة مش نسا حضرتك.
= طب لما ربنا يرزقنا إن شاء الله أبقى فكرني أجوز بنتي لدكتور نسا عشان المواقف إلي زى دي.
- عجبتني نبرة التفاؤل إلي في صوتك.
= وأنا عجبتني نظرتك دي ليا، بس أوعى تكون بتبصها لست غيري!!
- تمام، كده عرفنا النكد هيبقى على إيه النهاردة.
******************
بعد مرور ثلاثة أشهر من الاستمرار على الأدوية والمتابعة لدى الطبيب...
* كده نقدر نقول إن الإلتهاب اختفى نهائيا.
- ألف حمد.
= طب وموانع الحمل؟!
- أنا شايف إنك توقفيها خلاص، وخاصة إن الهرمونات استقرت تقريبا.
= يعني فيه أمل حملي يستمر؟!
- أول ما الدورة الشهرية تتأخر شوية تيجيني للفحص، عشان نلحق نفسنا بالمثبتات وبإذن الله مش هيحصل غير كل خير.
**********************
= من كتر الفرحة إلي أنا فيها طاقة في دماغي أوي أقوم أرقص لغاية ما يتهد حيلي.
- اليوم يومك، نحتفل بالطريقة إلي انتي عايزاها، بس الأول نصلي ركعتين لله ونحمده على نعمه الكتيرة علينا وإنه تم شفائك على خير.
= أنا من الفرحة إلي فيها عايزة أطلع حج أو عمرة، ركعتين بس بين إيدين ربنا مش هعرف أقوله فيهم كل إلي في نفسي.
- ربنا يكتبهالنا.
= طب بالمناسبة دي تتغدا إيه؟!
- لأ إديني فرصة أفكر عشان أستغل اليوم ده أسوأ استغلال، مينفعش تكروتيتي كده.
= خد راحتك على الآخر، إن شاء الله تطلب سندوتش جبنة.
- ومالك جاية على نفسك كده؟!
= ماليش مزاج أضيع فرحتي في الطبخ بصراحة، ما تطلبلنا اكل؟!
- طموح وحدة متجوزة ابن نجيب ساويرس.
= اخلص، هتطلبلنا اكل ولا ناكل جبنة؟!
- هتنيل، بس متتعوديش على كده.
********************
- أنا عارف الوش المتضايق ده، حد كلمك النهاردة؟!
= تسنيم.
- وقالتلك إيه ضايقك كده؟!
= أنا متضايقتش من كلامها والله، بس احساس الخوف رجعلي تاني، أنا خايفة مقدرش أخليك أب في يوم، خايفة من اليوم إلي يتقالي فيه مفيش أمل، خايفة من كرهك ليا في يوم وزهقك مني، وإنك تحب وحدة تانية وتسيبني.
- وحدة غيرك!!! وابني يطلعلي عيونه سودة بدل ما ياخد منك عيون الشمس دول، ولا يطلع أسمر ويبور في عبي بدل ما ياخد بياضك والعرايس عليه يبقوا على قفا مين يشيل.
ابتسمت = متقلقش الرجالة السمر أحلى بكتير من البيض، وهما إلي يملوا العين والقلب.
- زيي كده؟!
ابتسمت في خجل = اه.
- طب احنا مش عالجنا المشكلة خلاص، إيه إلي خوفك تاني؟!!
= عارف احساس إن الكل متربص، والبقرة إلي لو وقعت الجزار هيجري عليها بالساطور.
- متقوليش على نفسك كده، إنتي حد جميل.
= إنت تعرفني عشان تهزر معايا!!
- بيقولوا مراتي.
ضحكت = أوشاعات.
ضحك - أظن كده بقيتي تمام دلوقتي؟!
= مش اوي، المشكلة إني كنت مجهزة رد معتبر لأى حد يفتح معايا الموضوع ده تاني.
- ومردتيش عليها ليه وأخدتي حقك؟!
= لأن الصمت لغة العظماء.
- لأ، عشان مش عايزة تخسري حد فتخسري ثقتك بنفسك أسهل، صح؟!
= براس كلب أنا عارفة، بس بحس إني مسنودة بأى حد في حياتي، ولو حد منهم غاب هقع.
- معلش إنتي مسنودة على إلي خلقك بس، وبعدين بعلك إلي هو أنا، غير كده إلي هيأثر على أعصابك استغني عنه من حياتك.
= حتى لو كانت أختك؟!
- حتى لو أنا، وبعد كده متبقيش تسيبي حقك وردي، اه باحترام بس لازم توقفي كل واحد عند حده.
= مش إنت هتبقى معايا؟!
- مش دايما هبقى معاكي، لازم تاخدي حقك بنفسك، اتفضلي كلميها دلوقتي.
= طب ما نأجلها لبكرة.
- تاني يا إيناس؟!
= أصل كده كده احنا رايحين للدكتور بكرة، فممكن نرجع بخبر حلو يسكت الكل مش تسنيم بس.
ابتسم - أقنعتيني.
************************
* ألف مبروك يا مدام إيناس، حضرتك حامل في الشهر التاني.
في قلق = طب ووضع الجنين إيه يا دكتور؟
* منقدرش نعرف الوضع دلوقتي، لكنه مستقر في الرحم بشكل سليم.
= يعني فيه امل الحمل يكمل المرادي؟!
* متقلقيش كده، هتاخدي المثبت وهيكمل بإذن الله، المهم نبعد عن المجهود النفسي والجسدي.
- متقلقش يا دكتور من الناحية دي، شكرا لحضرتك.
********************
- بعد الخبر الحلو ده تحبي نعمل إيه؟!
= أحب أوي نعمل اجتماع قمة في العيلة، وإلي تفتح الموضوع ده هسمعها كلام الدكتور بنفسه عشان نخرس الألسنة.
- عجبتني نبرة الشر إلي بتتكلمي بيها دي.
= إيناس الطيبة خلاص راحت، ودلوقتي استلقوا وعدكم من النسخة الجديدة.
- مع إني كنت مستني الأبديت ده من زمان، بس ابتديت أخاف.
= متخافش، مش إنت هتبقى معايا؟!
- طبعا يا ريس، من امتى مكنتش معاكي!!
ابتسمت = كده أنا ارتحت.
قبل جبينها - وكده أنا حبيت.
"يبدو أن قد حان إلتقاء غريبين قد تآلفت روحهما ....فالأرواح جنود مجندة، وأنا روحي تألفك"♡
ندى خالد
