-يلا علشان اوصلكوا
_خلاص امشي انت واحنا هنبقي نروح
-يلا علشان اوصلكوا
_حاضر
المفروض ان يوسف بيحبني من 6 سنين تصرفاته كلها بتقول ده وانا عارفه بس هو عمره ما قالي حاجه زي دي خالص
دايماً موجود حواليا ف كل مكان
وفـ ضهري ع طول
لو حصل معايا حاجه فجأة بلقاه ظهر من العدم
افتكر مره ف الكلية
كنت ماشيه انا وصباح وواحد حاول يرخم بالكلام ووقف قدامي وانا ماشيه ..ساعتها كنت باصه ف الارض و هعيط خلاص
حسيت بحد وقف قدامي وسمعت صوت يوسف وهو بيقول
"في حاجه ي كابتن ،اخواتي سألوك ع حاجه يعني ؟"
الولد اتوتر واعتذر ومشي
وقتها بصيت ليوسف كان بيبصلي بحنان كبير وكأنه بيطمني وبيعرفني انه معايا ..
كل علاقتي بيوسف اننا جيران واهالينا مقربين من بعض ..
اما انا وهو فمفيش بينا اي كلام غير بحدود ..
كنت شايفه يوسف دايماً اخ كبير ..اخ بس مش اكتر..
*******
-هتجيبي اكل معانا؟
_لا يوسف جابلي
-بيحبك اوي ي ندي
_عارفه
-طب وانتي؟
_مش شايفاه غير اخ وبس للاسف ي صباح
-هو عارف طيب؟
_تقريباً
-اممم، ربنا يريح قلبه
يوسف شخص كويس جداً ومحترم وجدع ..مشوفتش منه اي تصرف وحش ،واخلاقه كويسه جداً حرفياً اي بنت تتمناه ،بس في دقة لسه مخرجتش ..مش حاسه اني بحب لا لسه
******
-ندي عايز اتكلم معاكي في موضوع بعد اذنك
_اتفضل
كنت واقفه انا وصباح وقتها ..اتحركنا شوية صغيرة علشان خصوصيته ف الكلام مش اكتر
-نعم ي يوسف انا سامعاك اتفضل ..
كان متوتر جامد وبيعرق بطريقة رهيبه ..
_انا..انا..انا يعني كنت ..بصي ..انا اسف بس انا كنت عايز اعرف انا لو اتقدمتلك هتوافقي او لا ،اسف لاني بكلمك بس حبيت اعرف قبل ما اكلم والدك
ساعتها انا تنحت ..تنحت جامد واتوترت ..
انا متفاجئتش بانه بيحبني لاني كنت عارفه بس متخيلتش انه هيكلمني
محترتش ف اللي هقوله بس كنت خايفه ع مشاعره ..
-يوسف ..والله انا اسفه جداً انت شخص كويس واي بنت تفرح جداً لو اتقدمتلها بس انا اسفه
_وانتي مش بنت طيب؟
-هاا.. ايون بس انا شايفاك اخ عزيز
_اخ؟
سكت وانا كمان سكت مكونتش عارفه ف موقف زي ده المفروض انا ارد اقول اي
فضل باصص لمدة ف الارض وساكت خالص ..بعدين بصلي وعيونه فيها لمعه الدموع وابتسم
_انا اسف ي ندي ..واعتبري محصلش اي حاجه واخوكي موجود لو احتاجتيه ف اي حاجه بعد اذنك ..
بعديها ولمده اسبوعين مشوفتش يوسف خالص ..
ولا ف الكلية ولا ف مواصلات
ولا حتي صدفة ف الشارع
منكرش اني طول الاسبوعين كنت مضايقة وقلقانه عليه ومفتقده وجوده جداً ..
-عارفه ي ندي ..تصرفات يوسف دي تخلي اي بنت تحبه ،انا مش عارفه انتي ازاي مبتحبيهوش ؟
_مش عارفه ي صباح والله غصب عني
-تنكري انه وحشك؟
_وحشني!! مش عارفه ..بس مفتقدة انه يبقي موجود مش اكتر
-مبتحبيهوش صح؟
_اي!!..لا لا مبحبهوش
-طيب
كنت بفضل واقفه ورا شباك اوضتي يمكن اشوفه صدفه بس هو مكانش بيظهر خالص ..
بعديها ب3ايام كنت رايحه عند تمريض للبنات سمعت صوت حد ..ده صوت يوسف !
-ندي
لفيت وبصيتله ..كان شكله متغير ،مرهق وتعبان ..شكله كان متغير اوي وقلبي وجعني عليه ..بس فرحت اني شوفته
رديت بتلقائية وانا مبتسمة جامد
_يوسف ..انت كنت فين ؟
بصلي بتعجب ورفع حاجبه وبعدين قال
-معلش منزلتش لاني كنت تعبان شوية ..اتفضلي ،بعد اذنك
ومشي وسابني
..اداني اكل ومشي
-جبتي فطار برضوا ،احنا مش قولنا هنجيب مع بعض و..اي ي ندي ف اي؟
_يوسف اللي جاب مش انا ..
-هو نزل
_ايوة
-عامل اي طيب؟
_باين انه تعبان
-علشان كده مضايقة؟
_انا وحشة ي صباح صح؟ مستاهلش انه يحبني كده
-انتي مش وحشة ي ندي بس يوسف يستاهل يتحب
