- أية أفضل سن الجواز؟
- لما تقابلي الراجل المناسب.
- علشان كدا أطلقتي؟
- علشان كدا اتطلقت.. علشان مكنش مناسب.
- رغم إن عندك أطفال ومفروض يتوفر لهم بيت وعيلة؟
- رغم اني عندي أطفال محتاجين إن مامتهم متقعش من تاني في اختيار المفروض، زي ما وقعت أول مرة وأختارت ليهم أب غلط.
الطلاق مش غلط، مش عيب، أبغض الحلال وربنا الي قال كدا، أكيد مفيش ست تحب تتطلق ولا تحب تعيش وحيدة ولكن لو الست دي مكسورة؟ لو متهانة؟ لو مذلولة؟ لو بتعيط طول الوقت بسبب الألم؟ لو الألم نفسه سببه الجواز يبقى لية نكمل؟
- أديله فرصة
غمضت عينيا واتنفست بصوت عالي
- مش عاوزة اديله فرصة.
- يا بنتي علشان بناتك.
- وانا؟ أنا فين ؟
- مفيش أم أنانية كدا هتربي بنات سوية
سكت شوية وابتسمت - ومفيش أم بتضرب بناتها هيحترموها.
الحياة مش أية المفروض وأية اللازم، الأهم من الحياة هما احنا، احنا البشر، الأهم من حقوق الناس علينا حقنا على الدنيا أننا نعيش، نتنفس، نقاوم.. على الأقل نبتسم، أنا من حقي ابتسم.
- ماما أنا عاوزة اعمل ضفيرة.
سيبت الكتاب وقلعت النضارة وقعدتها قدامي ومسكت المشط. لمست شعرها برقة وبدل ما أسرحه لقيت نفسي ببوسه وأعيط. حست بيا فلفت واتخضت.
- في اية يا ماما، حاجة بتوجعك؟
- لا يا حبيبتي، شعرك جميل اوي ما شاء الله.
- طيب أنتِ بتعيطي لية؟
سكت وانا مش عارفة ارد أقول أية، وراثة الشعر الطويل دا مني أنا، كل لما بشوفها بتجري حواليا وشعرها بيطير وراها بفتكر نفسي، من وانا صغيرة وأنا شعري كان كدا وطول معايا لحد ما كبرت.. أو كان معايا لحد ما في يوم ..
- بالله عليك لا، بالله عليك يا مصطفي
شد شعري ومسك المقص بكل قسوة.
- علشان تكسري كلمتي تاني.
حاولت أشد راسي منه معرفتش فعيطت بصوت عالي وقولت بقهر - والله ما هسامحك، هفضل ادعي عليك ليوم الدين والله ما هسامحك.
مسمعنيش، مشافش دموعي، محسش بوجع قلبي، مشافش الكسرة في عيني وانا شايفة شعري بيقع حواليا وانا مش قادرة أصرخ للناس تسمعني ونتفضح، حتى الصرخة مقدرتش عليها.
- ماما
ابتسمت بسرعة ومسحت دموعي - يلا تعالي هعملك احلى ضفيرة، وهحطلك التوك الجديدة كمان يا ستي.
ابتسمت وباستني وانا مسكت المشط وابتسمت وانا شايفة نفسي القديمة فيها.
- هتروحي تجيبي سَكن من التدريب؟
- أيوة يا ماما عاوزة حاجة؟
- هتاخدي مسك معاكي؟
بوست خدها وانا شايلاها على أيدي.
- أيوة
- طيب.. بصى.. انا..
- قولي يا ماما متقلقيش أنا مش هزعل.
- لا يا بنتي خلاص روحي ربنا يسهلك طريقك.
مسكت ايديها وبصتلها بحب - قولي يا امي متخافيش.
- مصطفي
الابتسامة مختفتش من على وشي
- ماله؟
- اتجوز
بصتلها بصة طويلة، نظرة شفافة فيها كل المشاعر، كل الخوف، كل المرار، كل الألم، كل الراحة.. كل الراحة.
- الحمدلله.
