" يُصادف اليوم عيد ميلاد حنان سعيد "
- ايه البوست اللي انتي منزلاه ده !
- ماهو مش واخد باله انه عيد ميلادي، ولا واخد باله من النوتيفيكيشن، فقولت انزل بوست يمكن البعيد يحس.
- أنا من الصبح بضحك عليه، يخربيتك.
- وبرضو مشافهوش يا أسماء، ارفع البوست على راسي يمكن ياخد باله.
- لأ، ادخلي قوليله يقطعني هو أنا مقولتلكش ان عيد ميلادي النهاردة.
- لأ هبقى مدلوقة أوي.
- خلاص قوليله النهاردة عيد ميلادي وماما قالتلي كل سنة وأنا طيبة والناس كلهم قالولي.
- دا على اساس انه أهبل ومش هيفهم اني اقصده يعرف.
- بصي طالما نسي عيد ميلادك يبقى مبيحبكيش واضحة اوي.
- اتطلق منه ؟
- دا رأيي برضو.
- دا نزل الشغل وأنا نايمة، انتي متخيلة مقاليش صباح الخير حتى.
- هو بيقولك صباح الخير كل يوم ؟
- أيوة.
- ايه المحن ده !
- والله أقفل في وشك، أنا زعلانة أوي، دا أول عيد ميلاد ليا هنا، ينفع مياخدش باله كده !
- لأ هو أكيد عاملك مفاجأة بس أنا خايفة يفاجئك بحاجة تانية.
- طب وربنا ما أنا عاملة الغدا.
- جدعة، ياريت كمان متغسليش وشك علشان لما يرجع البيت يلف ويرجع الشغل تاني.
- استني استني بيتصل، اقفلي كده شوية وهكلمك.
كنت حاسة ان قلبه طيب وفاكر، قلبي قالي انه مستحيل ينساني.
- صباح الخير.
- مش وقته مش وقته، شوفي كده على المكتب في فايل أحمر.
- أحمر !
- أيوة ياحنان بسرعة .. ايه ده خلاص لاقيته قدامي معلش.
- انت مقولتليش صباح النور ليه !
- ما هو ياحنان أنا مشغول ومعرفش انتي بتقولي ايه.
- وصباح الخير هتعطل حركة الكون وتوقف سير الكواكب !
- لا انتي رايقة وأنا مش فاضي.
- هي دي اللي عمري ما هتشغل عنك ابدًا ياعمري، هو انت مبقتش تقولي ياعمري ليه !
- طب نامي دلوقت ولما آجي هقولك ياعمري وياطحالي وكل اللي انتي عاوزاه.
- مبقتش تحبني صح ؟
- يابت هقتلك.
- حتى السؤال بقيت تتهرب منه، بتتهرب مني ليه ؟ عاوز تخلع ؟ طب واللي في بطني ده اوديه فين ؟
- يالهوي انتي حامل !
- لأ يا أحمد هي الجملة باكيدچ على بعضها كده.
- طب اقفلي الله يهديكِ
- آخر سؤال وهقفل، انت مش فاكر ان في حاجة مهمة النهاردة ؟
- حاجة ايه ؟
- أحمد انت طالق.
طب ما هو أنا حافظة يوم عيد ميلاده، وحافظة اليوم اللي اتقابلنا فيه واليوم اللي قالي بحبك فيه واليوم اللي اتقدملي فيه واللي اتخطبنا فيه ويوم كتب الكتاب وأول مرة يجبلي هدية وأول مرة نتخانق وأول مرة يصالحني وأول مرة عيطني اللي معندهوش قلب ده، وهو مش فاكر يوم ! دا أنا هقلبها نكد على دماغه، واللي يعرف يسكتني يفرجني.
- ايه ده قاعدة زي المتطلقين كده ليه ؟
- اسأل نفسك، اسأل روحك.
- يا ست أم كلثوم.
- خصام ساعتين اتنين كاملين، متتكلمش معايا فيهم.
- يالله ! الحق انامهم بقى من غير ازعاج.
- نعم !
- قصدي خليهم 3 ساعات اربعة.
- انت بتقول ايه !
- بقول لأ ساعتين كتير ومقدرش اعيش من غيرك ساعتين، فهنامهم بقى علشان الوقت يضيع على طول.
- انت بجد مش فاكر ان في حاجة مهمة النهاردة ؟
خبط بإيده على جبينه - ياربي ازاي نسيت حاجة زي دي.
ضحكت ووقفت قدامه زي الهبلة - كنت حاسة انك فاكر وبتعمل كدهون يعني علشان افتكر انك مش فاكر.
- مروحتيش ليه ؟
- مروحتش فين !
- مش قولتيلي هتروحي عند ماما النهاردة ؟
- طب ودي حاجة مهمة يا أحمد !
- أيوة طبعًا، دا أنا بقالي يومين مستني اليوم ده علشان أنام براحتي.
- انت بتكسر قلبي وانت مش واخد بالك.
- يا حنان ما هو أنا مبعرفش انام منك والله.
- أنا عمري جيت صحيتك يا أحمد ! عمري ضايقتك وانت نايم ! عمري ا..
- هتولعي من كتر الكذب.
- روح نام، بس لما تصحى ومتلاقنيش متبقاش تعيط.
- هتروحي فين ؟
- أوضة الأطفال جمبك هنا.
هو مش باقي غير اني المحله علشان قلبي هيتكسر فعلًا لو مفتكرش
- دا شاي ده !
- وحش ؟
- مش عارف احدد نوعه ايه والله علشان أقولك حلو ولا وحش.
- بتفكرني بذكرياتي مع الشاي ياأحمد والله.
- متقوليش عليه شاي بس. بس ذكريات إيه ؟
- كان جوز بنت عمتي عندنا مرة وطبعًا ذوقيًا عملتله شاي، لاقيته اتكلم بقرف كده وقال ايه الشاي ده !
أحمد رزع المج قدامه - عنده حق والله.
- أهو رزع المج زيك كده بالظبط قبل مااحرقله ايده.
- عملتي ايه !
قربت واتكلمت بصوت واطي - حرقت إيده.
مسك المج تاني وشرب غصب عنه وهو بيبتسم.
لطيف أوي أحمد جوزي ده.
- برضو مش عاوز تفتكر ان في حاجة مهمة النهاردة ؟
- ماتقوليلي ايه هي وأنا افتكر.
- العصر قرب يأذن وانت لسه مفتكرتش يا أحمد.
- ما يأذن هي الحاجة صلاة ؟.
أنا هعمل تورتة وجاتوه ليا وهو هيفهم، ايه ده أنا مبعرفش اطبخ أصلا جاتوه ايه اللي هعمله ! خلاص أنا ادخل الأوضة ابكي على اوجاعي والملم نفسي واطيب جرحي واحاول أعيش.
دخلت المكتب وأنا متعصبة - لأ ما هو ده تو ماتش يعني ومحدش يستحمل كده، المغرب قرب يأذن
- هو انتِ قناة المجد للقرآن ؟ مالك انتِ العصر يأذن ولا المغرب يأذن !
- والله يا أحمد حقيقي بجد هتتقلب نكد على دماغك، وأنت متعرفنيش في النكد.
- تعالي ياحنان وقوليلي مالك، حاجة مزعلاكي.
- انت قاهرني.
- والله ما كلمتك.
- طب كلمني، افهمني، اسمعني.
اتاوب - بكرة بقى اسمعك علشان تعبت.
يالهوي كنت هعيط والله، دا مش فاكر بجد، انا كنت متخيلة انه هيفاجئني بليل، نسيت عيد ميلادي ! ماانت كنت بتفتكره في الخطوبة، دلوقت بتنسى ! ليه بتتغيروا بعد الجواز ؟ ليه فجأة اسلوبكم بيتغير ؟ جو الحب والشموع اللي بتعشمونا بيه بينتهي بعد اربع شهور جواز، ليه يادنيا الواحد بيقرب من ناس بيعاه ؟
أنا لازم انتحر.
- انت نايم !
- يعني نايم على السرير، ومغمض عيني، وحاضن المخدة، يبقى بلعب بلاي ستاشن ؟
- انا هنتحر.
- استني لما اصحى علشان أمنعك.
- مبهزرش حقيقي هنتحر.
- ماانتي لو انتحرتي دلوقتي أنا هكون نايم ومش هقدر الحقك.
- طب ما تصحى الحقني.
- مش قادر والله.
طيب، أنا بقى هولع في نفسي وفي الشقة وهيصحى يلاقي المخدة اللي حاضنها بتولع، علشان أنا محدش كسر قلبي كده قبل كده.
بعت رسالة لأسماء " كنت اتمنى افضل معاكم بقية حياتي لحد ما أموت، بس أنا بقى قررت أموت دلوقت ومش هكمل معاكم، علشان أنا اديته عمري كله وهو نسي يوم عيد ميلادي، وأنا مش هسمح لحد يهيني كده، أنا بكرهه وبكرهك وبكره كل الدنيا، الوداع بقى "
شوية واتصلت بيا - انتحرتي ؟
- لسه بخطط.
- طب افتحي الباب.
- لو جاية تنقذيني ارجعي، أنا مش هرجع في قراري.
- يخربيت الأفلام الهندي، ياست أروهي افتحي الباب.
هما الصحاب اللي بيفضلوا في الآخر، لا حبيب ولا زوج ولا رجل الكنبة اللي نايم جوه.
فتحت الباب ففرقعت بالونة في وشي، وقعت على الأرض وأنا بصرخ - ايه ياحيوانة ده ؟.
دخلت وسابتني واقعة على الأرض - كل سنة وانتي طيبة يانونو.
- أحمد مش فاكر يا أسماء، شوفتي ح ..
سكت لما لاقيته ورايا بيقومني - يعني فضحتينا على السوشيال كله وعاوزاني انسى ازاي ؟
- يعني أنا اللي فكرتك ولا انت كنت فاكر ؟
- يابنتي انتي عاملة عيد ميلادك كتذكير في موبايلي اصلا علشان منساش، فاضل تعملي ميدالية محفور عليها اليوم وتعلقيها في شعري.
- بتكسر قلبي تاني أهوه.
ابتسم - بس عامًة يعني أنا كنت فاكر.
- طب بتزعلني طول اليوم ليه يا أحمد ؟
- اهوه ده نفس احساسي لما بكون عاوز انام ومبتسبنيش أنام، شوفتي بحس بإيه ؟
أسماء خبطت على المكتبة - ما هو أنا قاعدة وميصحش يعني اللي بتهببوه على دماغكم ده.
أنا من زمان وأنا بقول إن أحمد ده قلب قلبي من جوه، ينساني ؟ مش معقول طبعًا
- أحمد أنا فرحانة أوي انك طلعت فاكر.
عدل دراعه علشان أنام، وغمض عينه - طب نامي بقى.
- وفرحانة بالهدية أوي.
- تصبحي على خير.
- وفرحانة ان..
- هطلقك.
- بعبر عن مشاعري ياأحمد
- هترفد من شغلي بسببك والله.
- خلاص هنام.
سكت شوية وبعدين افتكرت ان عيد جوازنا بعد شهرين.
- أحمد هات موبايلك أعمل عيد جوازنا علشان تفتكر.
- ..
- انت نمت ياحبيبي ؟
- ..
- هات موبايلك ياأحمد وبعدين نام.
- ..
- انت ليه مبقتش تهتم بالحاجات اللي بهتم بيها.
- ..
- خد دراعك مش هنام عليه، احنا مبنشحتش ياباشا.
مش مكلماه تاني طول عمري كله، طول ما أنا عايشة، وطول حياتي، وكل ثانية في أيامي.
- أحمد ياحبيبي انت نمت ؟
" حتى قبل أن التقيك، لم نكن أغرابًا "
#أسميته_أحمد
#حنان_سعيد
