- مساء الخير
- عقمت إيدك بكحول الأول؟
- إحنا بنتكلم شات!
- ولو مش ماسك الفون دا بأيدك.. انت جاي تقتلني صح؟
- انتي مش كنتي بتكتبي بوستات حزينة وبتفكري في الانتحار؟
- حبيت الدنيا فجأة وشوفتها وردي، ملكش فيه
- لا إله إلا الله
- خير، ديك البراري رضا عننا وجاي من غير ٦٠ مكالمة لية؟
- وحشتيني
- وأنت كمـ.. لا لا انت كداب يالا مش مصدقاك
- احلفلك؟
- هتقول جيت من نفسك لية ولا ابدأ وصلة النكد؟ شكلك عاوز تنكد، اه والله حساك كدا محتاج..
- بس بس، أصل.. اوف القهوة قفلت.
- اه قول كدا بقي، فجيت لأم قلب حنين تسليك في وحدتك.
- يا رحمة حسي بيا أنا محبوس في البيت شبه الكلاب
- ولية شبه؟
- رحمة !!
- كدا بتزعلقي يعني، وهو انت لسه شفت حاجة، يا سلام علي قاعدة البيت وجمال السرير، و روعة الروايات والكتب، وحلاوة الافلام والفشار الي بيجنن أمي.
- طب بقولك اية؟ ما تيجي أخرجك
- ولا أنت معندكش دم؟ الناس بتموت وحظر تجوال وإيطاليا إنهارت و...
- هشتريلك الكمامة اخلصي
- هننزل الساعة كام؟
منزلناش طبعا ودخلت نمت، بس معرفتش أنام، يادي أم جلد الذات علي المسا، يعني الناس كلها بتتكلم علي نهاية العالم وأنا بفكر في حلوف زي دا.. اوكاي مش حلوف اوي يعني.
- مش ناوية تقوليلي اسمه؟
- وانت مالك
- الله مش أصحاب
- وهتفرق في أية تعرفه؟
- يمكن.. يمكن اساعدك في انك تتعرفي عليه مثلا..
- ومين قالك أنه ميعرفنيش؟
- نعم! تقصدي أنه عارف أنك بتحبيه؟
- البس الكمامة يلا وانت بتكلمني هنتهبل ولا اية؟
رجع الكمامة علي وشه وقعد - فهميني.
- زين انت ابن خالتي
- وزي اخوكي يبقي تحكيلي.
يارب تموت متفيرس يا شيخ، معرفش الكورونا نسيتك لية!
- تاكل مسقعة؟
ماهو طبيعي أن الشخص يحب، بس غباء القلوب دا ملوش حل! يوم ما احب اقع الوقعة دي !! طب اختار حد بيفهم حتي.
- انتي نازلة بجد؟
- عليا زفت امتحان اونلاين ومحتاجة ملازم من المكتبة
- قوليلي فين اسم المكتبة وهجيبهم أنا
- الرجولة فوق
- اخلصي مبهزرش
- لا، سلام.
انا عارفة اني شخصية صعبة ومعقدة حبتين، بس بخاف اعتمد علي حد، بخاف اكون حمل تقيل، وبخاف اصدق واقول هيستحمل ويسبني ويمشي، أنا بخاف الناس تسيبني وتمشي، أنا خايقة اموت وانا لوحدي!
- يعني برضو خرجتي
اتنهدت وبصيت للورق الي بيتكعب قصادي
- امي دي لازم اشوفلها حل
- رحمة
- فتانة اوي يا جدع
- انتي مبتسمعيش الكلام لية؟
- ملكش فيه
- رحمة !
قالها بصوت عالي لدرجة أن الموجودين بصولنا بخضة، وواحد من الي واقفين قال لزين - ميصحش كدا يا صاحبي الناس بتتفرج، خد خاطيبتك ولم الحكاية
قولنا في صوت واحد - خطيبته !!
بصينا لبعض بنظرة مش مفهومة فأنا خدت الملازم وروحت للعربية بتاعته، مش خوف منه اطلاقا، بس علشان هو يخوف دلوقتي.
- هنفضل نلف كتير؟ عرفت انك جامد في السواقة، روحني بقي.
- اوعديني تسمعي الكلام بعد كدا.
- لا وعود وكسر قلوب والحركات دي وانا قلبي خساية ميستحملش.
- أنا بتكلم جد
- والحلو من أمتي كان جد؟
- يعني بقالي فترة
- بس ادائك هايل
غمز - عجبتك؟
- انبهرت
فضلت راحة جاية في البلكونة وهو قاعد بياكل، قعدت بعصبية وشديت البقسماطة من ايديه.
- انتوا بتهزورا صح؟
- طب ممكن البقسماطة؟
- يازين بتكلم جد
- جعان طيب
- متعصبنيش
- ولو اتعصبتي؟ هتحرموني من الاكل عندكم؟ انا غلبان
- ولا انت علي قلبك مراوح؟
- طب ما تيجي انتي في قلبي يا بطة وانتي احلي من اجدعها مروحة.
- برضو بتهزر، دول عاوزين يجوزونا، أنا وانت؟
- طب والله لايقين علي بعض
- يعني انت موافق؟ وانت عارف اني بفكر في حد تاني؟
- عارف، بس انا مبحبكيش، أو بحبك زي أختي، فبفكر ازاي نحل المشكلة دي بالتراضى.
" مبحبكيش " وجعتني اوي بس سكت وغصبت علي نفسي ابتسم ابتسامة باهته
- وآية الحل؟
- هنتجوز فترة صغيرة، وبعدها نقول اننا مش متفاهمين كزوجين متحضرين وننفصل بمنتهي الهدوء والإحترام والرقي.
- وتفتكر ساعتها هيوافقوا
- سيبيها علي العبد لله.
سكت فمد أيده - اتفقنا ؟
- عقمت ايدك بكحول الاول؟
