قول ورايا يابني
قبلت زواجها -
قبلت زواجها
وأنتي يابنتي قولي ورايا ، قبلت زواجه
- قبلت زواجه ، قبلت زواجه والله
هو مين ده اللي قبلتي زواجه؟
انت يا زفته ، انت كمان نمتي وبتحلمي؟
فوقت ع أيد مريم وهي بتخبط ع كتفي جامد
أنت كويسة؟
- هو ف أيه؟
أنت اللي في ايه ، ومين ده اللي قبلتي زواجه؟
- أحنا فين؟
أنت فقدتي الذاكرة !! أحنا فالفرح
- فرحي ؟
فرحك أيه ، ده فرح نور وكتبوا الكتاب وبقالي 10 دقايق بفوق فيكي عشان نباركلها
- يعني ده مكنش كتب كتابي أنا؟
ضحكت وهي بتبصلي بدهشة
لا ، شكلك كنتي بتحلمي
- مريم انا عاوز اتجوز
معلش نروح ننام النهاردة وبكرة هنتجوز كلنا
- مش بهزر
هجوزك مين انا دلوقتي!
بصيت شمال ويمين - ده
ده مين؟
- اللي واقف هناك ده
في كتير واقفين انهي واحد فيهم
- يابنتي الحلو ده أبو قيمص ابيض ودقن
طيب شوفته ، وبعدين يعني
- يلا بقا اتصرفي وجوزهولي
يعني اروح اقوله والنبي يجدع يحليوة صحبتي عاوزة تتجوزك
- ههه دمك يلطش
غيرت اتجاه وشها كانها بتطنشي مثلا -
- تمام ي دنيا هاتي كمان هاتي
باد جيرل بتتكلم!
- بصراحة انا حبيته
وانا كمان
مسكت سكينة ال قصادي وحركتها بهدوء - كنت بتقولي حاجة!
لا يباشا مقدرش
- طيب يلا بقا
يلا ايه احنا جايين نحضر فرح والا نشقط؟
- ايه ال بتقوليه ده يامريم ، جايين نشقط طبعا
صحبتي الشقوطة
- فكري معايا الفت نظره ازاي
روحي قوليله بحبك
وقفت ولسة هتحرك شدتني بسرعة وقعدتني تاني - مش وقت هرموناتك دلوقتي
- يامريم افهميني ، انا الناس كلت وشي
ياقلب امك
- كل اللي يشوفني يقولي مش هنفرح بيكي بقا!
- يرضيكي الناس تاكل وشي؟
اه يرضيني
- طيب بلاش ، يرضيكي قلبي ينكسر؟
اه برضو يرضيني
- طيب بلاش ، يرضيكي اعيش وحيدة زي وحيد القرن!
لا ده ميرضنيش
- طيب يلا بقا
يلا ايه!
- خليه يجي يتقدملي
بس كدة ، حاضر انا هروح اقوله يجي يتقدملك حالا
- بسرعة بقاا قبل مالمأذون يمشي
وقفت وهي بتبصلي بدهشة رهيبة وبتبرطم كدة ع اساس اني مجنونة يعني ، لا دي هي فعلا فكراني مجنونة المهزأة متعرفش إني براقبه وبحبه من فترة طويلة ، بقيت أتعمد اروح أي مكان يكون موجود فيه حتى وجودي هنا مكنش صدفة ، بقيت بحب أشوفه ، اشوفه بيتحرك قصادي ، بيتكلم ، حتى طريقة لبسه انا تقريبا حفظت كل الاماكن اللي بيحب يروحها حتى قهوته بقيت حافظة بيشربها ايه ، حافظة كل تفاصيله وتفاصيل حياته.
مجرد ماخصلت كلام معاها لقيته أختفى فجاة بقيت بدور عليه بعنيا وسط كل الموجودين بس ملقتوش ، حاولت ابان هادية بس معرفش ايه اللي حصلي معرفش ليه اضايقت كان هاين عليا اعيط او اصرخ ف وشه.
روحتي فين؟
- اختفى
مين ده
- هو
طيب يلا عشان نمشي شكلك تعبانة
- موبيلي
ماله!
- نسيته جوا
طيب استنيني هنا هروح اجيبه وجايا
موبيلك
وقفت لدقايق بستوعب اللي سمعته وبحاول أجمع الصوت ، ومش قادرة الف وشي ، لحد ماتكلم تاني - موبيلك ، ايه مش عوزاه!
لفيت بشويش وم غير ماحاول ابصله اخدت الموبيل واتحركت بسرعة -
استني عندك
وقفت وانا مرعوبة وقلبي عمال يدق بسرعة - أنتي حكايتك ايه؟
حاولت اجمع نفسي بسرعة واستوعب اللي بيحصل واتكلمت بهدوء - نعم ، انا اعرفك!
مهو ده اللي بحاول أفهمه ، انت تعرفيني!
- وهعرف حضرتك منين ، انا حتى أول مرة أشوفك
وقف وبصلي بغموض واتكلم بمنتهى الهدوء والجدية - امال بتراقبيني ليه؟
ارتبكت ووشي جاب الوان الطيف مكنتش قادرة انطق حسيت بلساني أرتبط او يمكن مش لاقية حاجة اقولها ، حاولت أتكلم بس التوتر بان في صوتي - براقبك! اكيد حضرتك غلطان
بصلي ومتكلمش ، صمت رهيب وغموض ونظرات ترعب -
ده نام ده والا ايه!
- ممكن تعديني بقا
لا
- من فضلك ابعد عاوزة امشي
بسهولة كدة! دنتي طلعتي عيني بقالك 7شهور
- انا!!
فكراني اهبل والا مش واخد بالي!
- انا مش فاهمة حضرتك بتتكلم ع ايه!
رفعلي حاجبه بابتسامة -
انا افهمك ، ببساطة كان ف بنوتة حلوة بشوفها كل يوم م بعيد بتفضل بصالي وهي بتشرب قهوتها وبسببها كل يوم قهوتي بتبرد لاني بسبها عشان خاطرها والحقيقة ان عنيها كانت حلوة لدرجة اني وقعت فيهم وكنت فاكرها انتي بس خلاص شكلي غلطان
تنحت وعنيا وسعت ع اخرها م الصدمة وع بال ما استوعبت كان لف وماشي وع اخر لحظة اتكلمت بسرعة وتوتر - لا انا
معرفش ازاي اتسرعت وقولت كدة بس هو حقيقي اخد باله مني ازاي محستش اني واقعة اوي كدة لدرجة انه كان واخد باله مني كل المدة دي ، يلهوووي يعنى هو كان عارف اني براقبه ، يا ارض انشق وابلعيني..
ها كنت بتقولي ايه؟
- غبية
نعم!!
- اه انا غبية
ضحك وانا لسة بصاله بنفس الغباء والتتنيح - انت حلوة
- نعم!
شش ، عينك عسلي؟
- لا بني
ضحك وقرب خطوتين ناحيتي
تعرفي طول عمري أمي بتقولي هتتجوز بنت عينها بني
قرب أكتر - بصيلي كدة
معرفش ازاي اتغابت وبصتله
وهو ضحك بهدوء وكمل - وعنيها ضيقة كدة
- شبهي؟
قرب وهو بيبص فعنيا - شبهك
" يا بداية كل شئ خلق قبل أن التقيك "
#ليل_أيوب
#حكاوي_نصف_الروح
#هايدى_عمر
