- أية الي بتعمليه دا يارحمة؟
- شاي.
- بقي العريس هيشرب شاي برضو!
- اه ياماما هيشرب شاي وكتر خيرنا اوي لحد كدا.
- يابنتي عيب ميصحش، خدي البيبسي دا والجاتو قدميهم.
- ماما الله يكرمك انا علي أخري، بيبسي أية وجاتو أية بس
هو جاي ينتيل يتجوز ولا يحقق احلامه هنا !
خرجت وانا شايلة كوباية الشاي ولاجل قواعد الذوق والأدب والتقاليد والأعراف حطيتها علي صينية، كدا كدا انا عندي برد خفيف حطيت بلاشر علي مناخيري علشان نزود من المنظر الحقير دا ولبست اقدم فستان عندي، مالها العباية يعني، اش فهمهم هما بس دي عباية الغوالي. قعدت وانا بكره قاعدة الصالونات مش هترسي علي صالونات لا يارب لا.
- ازيك ؟
طموح اوي حبيبي وعايزني ارد عليه بسهولة كدا.
- ....
اتنحنح - احم، انا عارف أنك محرجة بس دا وضع طبيعي ولازم منه.
- .....
شرب شوية من الشاي وقال - الشاي دا إنتِ الي عملتيه صح ؟
إبتسمت بفخر - أيوة
- وحش جدا.
- نعم!
- يمكن اوحش حاجة دوقتها في حياتي.
- أنت بتقول..
- والله بكلمك بأمانة اوعي تعمليه لحد غيري.
طبيعي لما واحد يكون ضيف و يشرب حاجة متعجبوش ميقولش رأية صريح بالشكل دا علشان ميحرجش الي قدامه
وطبيعي دلوقتي اي حد مكاني يتحرج، وممكن تتكون في عيونه دموع ويصعب عليه نفسه، ويدخل في مراحل اكتئاب،
بس انا ضحكت !!
- طب الحمد الله والله مش عارفة من غير رأيك العظيم كنت هعمله ازاي تاني .. بس هو يعني أية غيري؟
- وكمان فهمك بطيء؟ هايل
لية مش لاقيه قُلل؟ لية معندناش قُلل؟ أنا محتاجة اكسر وراه خمس ست قُلل.. قال فهمي بطيء قال.
بس هو يعني أية غيري فعلا ؟ هو ناوي ييجي كتير ولا اية؟
- كفاية تقطيع ورق كفاااااية
من اغرب عاداتي اني لما بتضايق بقطع ورق بكميات رهيبة
منظر الورق المبعتر في حياتي الروتينية المنظمة بيدني إحساس راحة، والي هو بوظي كمان احنا كتير اوي.
- بس يادنيا أنا مكتئبة دلوقتي.
- طب وبالنسبة للسندوتش الي في إيدك.
بصيت الشاورما - دا يدل إني في أقصي مراحل اكتئاب، دا كل سناجل وحبيبة مصر المفركشين بياكلوا شاورما
- ياشيخة !
- بس جهل بقي بس جهل.
جو البيت كئيب وغير مهيأ أطلاقًا اني اكتب سطر واحد
وبطبيعي شغلي كدكتورة وكاتبة في نفس الوقت بحتاج الهدوء والاستقرار النفسي بس دا لكل الناس ليا أنا لأ.
- طب فكري تاني
- ياماما أنا مش عاوزة أتجوز دلوقتي الله يرضي عنك كفاية.
ولو جينا للحق مش عاوزة أتجوز خالص تتحرق الرجالة علي بعض.
- يابنتي الجدع إبن حلال و يعني.. يعني عارف ظروفك.
- انا مش معيوبة علشان تقولي ظروفك.
اتنهدت - انتِ ست البنات بس كلام الناس مبيرحمش ومحدش هيسيبك في حالك يابنتي.
ظروفك، ظروفك، ظروفك أية هي ظروفي مجرد ست عندها 27 سنة ومطلقة بعد كتب كتابها بأسبوع..
مطلقة قرب قطر الجواز يدوس عليها وكلام الناس يهريسها تحت رجلهم ولية ؟ علشان أطلقت.
بنت في أواخر العشرينات تطلع عليها مليون سمعة وسمعة
تسمع إهانات حتي من عيلتها وتعمل أية ؟ تحط أيدها علي بوئها وتغمض عيونها لدموعها تفضحها، الضعيفة مش هتعيش وسطهم، القوية بس الي تعيش وهي بتبني حواليها الف سور من أشباه الرجال. علشان احنا مجتمع ناقص عقل و دين، علشان معندناش عقيدة قوية ولا نعرف رسولنا وصي بأية.
