أول خناقة بعد الجواز بيني وبين بحر..
- عاوز أفهم قصيتي شعرك ليه؟
_ حبيت أعملك تغيير..
ملحقتش أكمل الجملة، قرب مني وغضب الكون باين عليه، كنت مرعوبة، ثورته مكانتش مبشرة بالخير، جسمي انتفض، وغصب عني حطيت إيدي على وشي، خوفًا!
فضلت دقيقة، اتنين، تلاتة، شيلت إيدي، لقيته رايح جاي ف أخر الأوضة، كان متوتر، بيبص لي، فضلت واقفة مكاني، قاطع سكوتنا صوت جاي من بلكونة جيراننا" أنا هويــــته وانتهيــــت، وليه بقى لوم العــــــزول، وليه يحب إني أقـــول يا.. ريت الحـــب ده عني يــــزول" بدأ يقلل حركته وبصاته، الغضب بيتلاشى من على وشه، قرب مني وهو بيردد بصوت واطي" إهدي، أنا مش هاجي جمبك، متخافيش مني، متكسرنيش بخوفك، أنا بحر حبيبك يا ليل" قرب مني، أخدني ف حضنه لحد ما هديت..
_ بالراحة كده أنا طلبت منك تعملي تغيير؟ ويوم ما تعملي تغيير يبقى ف شعرك يا ليل، شعرك؟ بتهزري ولا قاصدة تعصبيني وخلاص؟
معرفش جبت الجرأة منين، لقتني ببعده وبقوله " أنا حرة، جسمي، شعري، ملكي" بص لي بلوم وعتاب وقالي "اللي تشوفيه يا بنت الأصول" الكلمة هزتني، حسيت إنه يقصد كتير، قاطع سرحاننا صوت سيد درويش" ما دمت أنا بهجره ارتضيت، خلي بقى اللى يقول يقول" قلبي انقبض، أنا فعلا عارفة إن أكتر حاجة يكرهها بحر قص شعري، كنت لما بكون نايمة بلاقيه ماسكه، مقرب من شعري وبيشمه وأما أسأله واستغرب يقولي" هنا بحس بهدوء العالم وحنيته، أنا بحب شعرك" إيه خلاني اسمع كلام صحبتي عن النسوية ويكون لي صوت، أنا ماكنتش محتاجة أحتج أساسًا لإنه عمره ما سلب مني حريتي، بالعكس واقف معايا ف شغلي، ولما بتلبخ بطلب منه المساعدة، عمره ما فرض عليا رأيي، إزاي بعت افكاري وحياتنا كده، ساعات الصاحب بيسحبك لطريق مش بتاعك، قربت منه وقعدت قصاده هو ع طرف السرير وأنا ع الأرض، نمت ع رجله وحطيت إيده ع شعري، ودندنت" أحبه حتى فى الخصام، وبعـده عني يا ناس حرام، ما دمت أنا بهجره ارتضيت.. مني على الدنيــا الســـــلام"
شير كتير، ورأيكم❤
